「操」past paper，好多人既理解都係「做」past paper，結果就係見到有啲同學日做夜做，做極都無進步，真係好無奈，啲時間就咁浪費晒。其實所謂「操」past paper，「做」只係其中一個步驟，連埋其餘四個步驟，五個步驟真係缺一不可。
1. 溫習
如果你做past paper前完全無溫過書，咩都唔識，其實你唔應該期望你做完全有啲咩得著。正如我而家俾啲泰文既練習你做，你一個字都睇唔明，其實就算做完俾埋答案詳解你睇，你都係唔會識得泰文。所以每做一個topic既past paper，你第一步係要先溫書，溫到去一個地步，就算你係錯左，睇返詳解都大概知道係發生緊咩事。
2. 做
呢步其實個個都明，係咪？
3. 對答案
我親眼見過有人係老師派返份功課或者試卷俾佢，佢睇一睇個分就黎手丟左佢落垃圾筒，有兩個可能性，一佢係天才，對佢黎講操練係多餘既，但我見過最多既，係連自己係啱係錯都唔知既，佢地通常就係最底層既人，對呢啲人黎講，其實所謂做past paper，完全就係浪費緊時間，好似你唔會覺得一個人係咁對住空氣射箭，會射到有一日佢可以百發百中，因為好簡單，喺佢既練習入面，根本就射唔射得中呢個concept。
4. 分析
無乜人係做完past paper唔對答案，但就係有好多人做完past paper唔識分析。分析啲咩？唔係分析條題目，唔係分析個答案，係分析你點解做錯。好似片中咁講，其實錯既原因最常見都係嗰幾個，Concept唔清、無skills、理解唔到題目、數學問題等等，每一個原因既跟進其實都唔一樣，如果你錯Concept，但就以為自己只係唔小心理解錯題目，只係識得叫自己小心啲，咁你做多一百幾十條都會係咁錯落去，因為你根本就斷錯症，呢個亦係最多人操極卷都無進步既原因。
5. 跟進
分析得啱之後，最後係要跟進返，從頭去計劃一吓下次可以點做先唔會再錯同一樣嘢，例如我自己會將啲錯過既concept或者係題目既陰濕位抄低晒佢，下次再做past paper前溫一溫呢堆嘢先再做，如果某啲題目我無skill既，而老師又教唔到我，我就會拎晒所有相關既題型既問題出黎，嘗試諗一個Skill係可以應乎晒相關既問題，然後係咁練習。
所以所謂「操」past paper，其實唔係剩係一個動作，你要有齊溫習、做、對答案、分析、跟進，呢五個Steps不斷循環去做，咁樣先叫做有意義地「操」past paper。希望幫到大家。
