星期日唔知做咩好？梗係去拍賣行睇預展啦！
佳士得亞洲藝術週即將舉槌，今屆的拍品比上屆的相宜一點，由幾百鎊至幾萬鎊也有交易。作為一個新手，收藏亞洲藝術最大的問題就是很容易買到「高仿」，即係假貨啦。一萬幾千買假貨唔係問題，大佬呀，俾人呃去買個蝕錢掘礦合約都十萬啦。呃錢唔緊要，但唔好傷害我的脆弱小心靈，更加唔好講會被朋友永遠瘋狂恥笑。所以你問我，我真心建議新手揀去拍賣行度買，起碼點都有個譜。
事不宜遲，我地即刻去相！你問我，我會話第七幅圖一組三件的花瓶幾抵買，品相完好之餘，個膽仲要係一個康熙年代的花瓶。估價只係800-1200鎊，如果以下限成交，平均2千零港紙一件，蔗渣嘅價錢，包埋康熙年代的貨色，你去裕華國貨買個花樽都幾舊水啦，真係無得挑剔太多。
除此以外，還有詹甯斯先生的舊歲拍賣，當然不能將他的藏品和安思遠的相比。但是看到這些外國人這麼努力地拯救、研究和修復中國藝術品，還是很令人肅然起敬。老實說，我看中了他的其中一件藏品，是件便宜的小玩意，要是幸運拍下來，我再和大家分享吧！
好啦好啦，我知，理科人行拍賣行很悶是吧？咁我地唔講亞洲藝術— 霍金同愛恩斯坦，你又岩唔岩？
「站在巨人的肩上」網上拍賣已經開始，這個網拍囊括了霍金的日用品以至親筆簽名論文，還有愛恩斯坦的書信和親筆簽名照。若果你對於這些天才人物感興趣，自己上網bid啦下，11月8號截止，大家自己睇時間啦。
最後，同場加映「混然天成」拍賣，賣的都是史前化石、天外隕石和稀奇礦物。各位怪獸家家會不會考慮花3000英鎊，買舊菊石化石俾呀仔帶返學校做「暑期功課」的石頭搜集？不過陳太你又唔駛擔心，我介紹你買返舊來自月亮的隕石，一招就收佢皮。不過，如果要成為同學的焦點，識帶一定帶暴龍的牙齒化石，都係3000英鎊一隻，保證佢驚艷全場！
然後地理科老師心諗：JM9啊... （拿我無講粗口架！！）
最後的最後，各位師奶，無理由淨係買野俾呀仔，然後自己得個桔架？拿，咪話人妻先生唔益你，最後一張圖，知唔知係乜？係呀，就係傳說中嘅聖旨！估價2000-3000英鎊，買返屋企自己拎住黎嗡「附屬卡任碌」、「死佬需在七時半前返屋企」、「呀媽同我跌落海必須救我先」，以後做乜都奉旨，問你死未？
拍賣日程：
https://www.christies.com/calendar/
#其實拍賣行可以好好玩
#利申唔L係廣告
#點可能俾你寫到咁癡線
#最喜歡坑舊同事
#另外倫敦佳士得嘅咖啡係好飲嘅
#隱世免費茶水任飲攻略
#做人自重真係唔好寫攻略
