[方以文問兩句][強尼][ViuTV][暖男爸爸]
強尼 繼上次喺《Chill Club》開口唱歌備受讚賞之後，喺《暖男爸爸》第4集嘅演出再次令到歡眾喜出望外。繼主持、講波、製作、唱歌之後，強尼又成功挑戰多一個領域，連登網友封佢做「全尼 - 全能強尼」。
多謝連登巴打
「我真係好多謝連登巴打一直以來嘅愛戴，仲改咗呢個名畀我，希望好多嘢可以再做好啲。今次《暖男爸爸》Lantau呢個角色，係我加入ViuTV以來拍劇同電影裡面，最完整立體有故事線嘅角色。當初聽到演員陣容時，我係吓咗出聲，內心好滾動。」
Lantau對於鄭中基飾演嘅主角阿榮嚟講，可以話係前半劇繼老婆鯨魚之後最親近嘅角色。強尼知道同鄭中基做老友時有冇壓力？「我自己冇擔心嘅，因為Ronald係大家都好熟悉嘅演員，我又有follow佢嘅戲、social media等等，掌握到佢呢個人嘅質感。我哋年紀接近，我都幾有信心做到朋友嘅感覺。Ronald去到現場好快同大家打成一片，演員間嘅相處都好大幫助。」依家播出嚟個效果真係唔錯，老友鬼鬼。
緣起《假設性無罪》
Lantau嗰種賤賤哋嘅感覺，開正強尼嗰瓣，之前喺另一套劇《假設性無罪》做阿齊已經好賤，原來今次監製搵佢入劇都同《假設性無罪》有關。
《暖》嘅監製除咗兼任編劇嘅戚家基之外，仲有另一位監製何劍雄，同埋導演梁崇勳，兩位都同強尼喺《假》合作過。「多謝梁崇勳介紹我畀戚家基，佢哋睇完《假設性無罪》我演阿齊呢個賤人角色，覺得我演到Lantau嘅部份元素，所以搵我演呢個角色，多謝佢哋嘅信任。」
Lantau冇諗過自己鍾意乜
不過Lantau唔係淨係得賤，係賤中有愛，仲要係得不到的愛嗰種，鍾意咗老友個女友。第4集一口氣幫Lantau呢個角色建立咗好立體嘅型象。「我有三幕都好鍾意嘅，第一幕係同Ronald睇返阿榮嘅結婚片，嗰時拍到剛剛入黑時間，好有feel。另外係我喺車裡面嗰幕，係我做戲以來第一次拍咁多情感流露嘅戲，自己都擔心出到嚟好唔好。」做得好呀，嗰幕真係聞者傷心。「Lantau係30幾歲打後嘅典型都巿人寫照。香港人營營役役，感情、工作、生活都快嚟快去，不停有新嘢出現，冇乜機會諗吓自己鍾意啲乜，去到咁上下年紀先會問自己。鯨魚對於Lantau嚟講係好特別，但面對工作同其他女朋友，可能個感覺好快變得冇咁強烈。」又係一個到失去先知咩係重要嘅故事。
「仲有一幕我好鍾意，就係同Renci（楊偲泳）喺便利店嗰幕。最初劇本係冇呢段，Peter（戚家基）喺拍之前早一日whatsapp我，話送份禮物畀我，就加咗呢一場戲。呢場戲令到Lantau個角色完整立體咗，Renci肯嚟幫手演呢個角色又好難得。我哋成段只係分咗兩三part去拍，希望語氣直落連接啲。出到嚟嘅效果都滿意。要多謝Peter、Renci仲有導演Tony。」
同Hailey希望夾出演員默契
咁同套劇嘅另一個主要對手Hailey夾成點呢？「我哋咁熟，合作時有咩都可以講，都因為咁大家各自都有啲小堅持，但都ok嘅係流暢嘅。我哋希望出到嚟唔似平時做主持做綜藝嗰種感覺，希望大家見到嘅係兩個演員嘅默契。」
至於有網民叫全尼征服埋跳舞呢個領域，強尼話真係有諗過學跳舞。「不過唔係要嚟表演，而係想透過學跳舞了解多啲自己嘅肢體動作，應該對做戲有幫助。」學咗識咗先，或者之後有機會show畀大家睇呢~
📺 《暖男爸爸》99台 逢周一至五 2130~2230
[重溫] https://viu.tv/encore/single-papa
#方以文問兩句 #強尼 #許博文 #ViuTV #暖男爸爸 #fem #方以文
強尼許博文老婆 在 許博文- Jelajah 的推薦與評價
講起強尼，大家會想睇吓佢主持嘅節目；講起Keyman同張丕德，大家又會想聽吓佢哋講波！ 佢哋3個係今屆香港賽馬會青少年體育記者培訓計劃嘅導師，如果你都想喺佢哋身上 ... ... <看更多>