彈番呢個出嚟，啱晒喇。
記住，高先電影院今日開幕。
記住，西環，堅尼地城，逆市開戲院。
咩人會咁做？「多謝高登先」嘅 Winnie Tsang。
一個我認識超過廿年，一個真心熱愛電影，
有眼光有熱誠有傻勁，出心出力出錢，
人生大部分都係奉獻咗俾電影嘅人。
有冇咁嚴重？有。
我識之時，佢已經係電影發行高層，入行可能已經起碼廿年，為香港買入好多好電影，發行好多本地及外國好戲，我哋有咁多多元化、口味品味國際化嘅電影睇，佢係其中一個推手，令香港觀眾嘅電影味蕾同視野，可以更廣闊。
佢唔係淨買商業片，cult片藝術片，怪片奇片、好片佢就買，佢係相信電影嘅人。
而且佢好早就支持香港電影，本地製作。
新人、新導演、新公司，佢支持。香港在電影艱難嘅市道，仍然有本土電影出品，有人投資發行，佢就係時常拿出硬頸、資源、人脈、財力、憑著信念同膽識，仲有三兩義氣去一起拼博、守住一寸本土，一份堅持嘅人。
香港電影，有啲好似下面講嗰啲咁，冇尊重自己、冇尊重觀眾，當好多人趕合拍片潮流，賺easy money之時，Winnie卻在未必鋤強一定扶弱。
《點五步》、《一念無明》、《淪落人》，都有她的手影，為其發行，《狂舞派》、《紅Van》佢直情投資埋。
你可能認為這些港產片都有不足，但它們欠的是一個機會，當年，就靠人肯俾一個機會佢哋，一些創作、一些製作，才有機會面世，一個工業，一些電影人，不同單位，才有機會接力、成長。
簡單講句，香港起飛之後，不欠錢，尤其被炫富暴發價值腐化之後，整個社會不同工業，欠品。
藥房、金舖、時裝、以致樓盤，一律集體惡俗，高登先和Winnie Tsang於電影，仍然有品。
投資、發行，沒有電影院配合，有些電影排不到幾多場次，沒有足夠的屏幕放映，掙扎也不容易，她索性如今開埋戲院，問你服未！(咁大項投資，過程仲要峰迴路轉、驚心動魄、奇情兇險，兼而有之)
如今收成正果，正式開張，可喜可賀。
所有愛電影的人，唔該你哋，今日、明天，將來，多多去贈慶，等呢間戲院，證明一下呢種香港人精神，係硬頸地長映長有嘅！
多謝高登先！
#高先電影院
#今日開幕
#快啲去買飛睇戲
