【火鍋店逆境求存 外賣幫你過足邊爐癮】#歡迎留言推介雞煲店火鍋店
香港人一年四季都鍾意食雞煲同打邊爐，除咗嘢食選擇種類夠多，最開心係一大班人圍爐取暖，舉杯暢飲，嬉笑怒罵又一晚。不過一次疫情來襲，加上發生「邊爐家族」事件，令到唔少雞煲火鍋店，由平時大排長龍，變到近排水靜河飛，小弟經過見到都不禁搖頭嘆息。
做生意最緊要識變通，與其望天打掛等運到，不如改變市場策略，正所謂「窮則變，變則通，通則久」。邊個話食雞煲打邊爐一定要堂食，食客屋企都可以化身迷你雞煲店、火鍋店。眼見有火鍋店最近轉攻外賣市場，推出雞煲邊爐外賣套餐，先將雞件炒好，連同打邊爐食材，借埋個煲同Gas爐，由外賣專員送上門，務求令客人安在家中，一樣享受到店舖服務同食物質素，一解對雞煲邊爐相思之苦，認真唔話得！
雖然疫情總有一日完結，但唔代表做生意嘅可以捱到嗰一日。我身為雞煲邊爐狂熱分子，都好擔心高質火鍋小店，會受到今次疫情影響，導致最後結業收場。所以小弟希望盡少少綿力，幫全港火鍋小店宣傳一下，歡迎大家喺依個post度留言，分享返你支持嘅雞煲店或者火鍋店(最好有做外賣)，等大家止一止雞煲邊爐癮之餘，發揮香港人互助精神，一齊同小店共渡難關，幫得一間得一間！
