🔵🟡⚫️🟢🔴
《關於奧運》
今屆奧運由第一面金牌開始，令所有香港人咆哮尖叫，全部人嘅眼球都落喺健兒身上！香港死氣沉沉得太耐，但由兩位家朗相繼為我地打出好成績，我哋先如夢初醒地發現香港嘅運動員咁強！未必係功利主義，只係有時忘記咗。運動員嘅光芒，俾太多難過嘅日常覆蓋咗，當日日都烽煙四起嘅時候，我哋注重嘅唔係跑得快定慢，而係逃生路線，出口喺邊度呢？每一日嘅新聞都係灰灰沉沉，幾難得開心兩個禮拜！實在冇嘢開心得過可以為香港人開心！又或者應該係話為運動員開心而開心。
運動員燃燒自己嘅生命去爭取超越自己嘅成績，有幾努力付出，就有點樣嘅收穫，呢個世界好簡單直接，超越到上次嘅自己就有燦爛嘅笑容；落敗就係唔甘心嘅眼淚，以及要反敗為勝嘅決心！運動員與運動員之間互相鼓勵，識英雄重英雄！咁嘅世界係幾咁美好？達成到目標嘅人喺鏡頭前面講低自己嘅信念，觀眾睇到覺得有用就拎去使，你攞咗都要自己去參透，透過你自己努力嘅方法，透過去搵自己擅長嘅項目，每個人都可以係運動員，只要你一日未運動完，你就係自己人生條跑道上面嘅跑手/泳手/單車/滑板選手，自己揀！係幾咁熱血嘅兩個禮拜！
雖然，如果東京係運動城市，我哋都係另一種運動城市，我哋係不准運動城市，周圍都可以睇到運動嘅標示㗎，不過係「不准踩板、不准踩單車、不准踐踏草地」，每個公園都有無限嘅banner、指示牌，俾條滑梯你玩就玩滑梯！點解要喺公園進行球類運動呢？點解奧運有嘅攀石香港人冇份參加，因為我哋冇地方訓練，而如果我哋冇地方練習，更加唔會有獎牌，冇獎牌，當局又唔會想抽水，扮撥多啲資源比呢一項運動發展，喺香港，parkour係不負責任；滑板係製造麻煩；單車係阻住馬路，好多運動都被劃上一啲標籤，規矩就永遠都係綁手綁腳嘅，令人卻步咁樣，不如如果我哋永遠同規矩作對，我哋就要花好多時間去鑽牛角尖，然後都唔知爭唔爭取到自己想要嘅嘢，與其鑽牛角尖不如捐窿捐罅，諗辦法做自己想做嘅嘢，我哋嘅目標又唔係參加奧運，就算係，可能都要諗吓發兜一個大圈做到一啲成績，先有條件同人講條件。冇嘢係做唔到，只係睇你肯唔肯諗其他方法，機會嚟到嘅時候，起碼你要裝備好自己。
我哋做過好多嘢，其實我哋從來都唔係為下一代爭取，我哋係為我哋自己呢一代去努力，自己想得到嘅嘢就自己去爭取！無論有幾艱難，有時退到冇得再退就要進攻，好似今屆東京奧運整體本身就係一個逆境波，由搞唔到、由個個都唔睇好、個個都唔明點解要繼續，做到最後人人都刮目相看，仲要喺入面得到好多能量，證明咗俾大家睇，的確去到最後都可能損失好多嘢，但係大家攞到比數字更加緊要嘅一啲元素，每個人都唔同。
去到我哋而家咁樣嘅年代，就算話俾你知，今屆奧運可能係最後一屆，都可能有人相信，冇乜人知道聽日會發生乜嘢事，過咗呢兩個禮拜體育世界，好大機會又會返返去日日都係陰天嘅港聞世界，都係逆境波，同東京奧運一樣，十萬件壞事衝埋嚟，真係未必處理得切，不過逐件處理啦，專注、用心地完成一件事，就算結果唔係我哋想像咁樣，但起碼我哋盡力過，可以無悔。唔好成日垂頭放屁喇，搞搞大家個心態啦，何詩蓓話佔80%㗎！搞掂呢一part，贏咗八成㗎啦！所以加油啊香港人！香港加油！
再一次多謝香港咁多位運動員！同埋每一個努力緊嘅人！提醒咗我哋點樣爭氣！我冇辦法以文字表達我對咁多位嘅謝意！多謝！
東京事變 - put your camera down
#宇宙船 #生物觀察日記
