【偽中產回流英國之路remastered 3】
請理解個原post寫在17年，回看雨傘、偽中產、沉默大多數、社會同政府嘅感受同對自己離開嘅影響，滿以為已經好悲觀。點知短短幾年間，變化竟然係斷崖式嘅淪落。可悲嘅係香港已經真係壞咗，唯一可幸嘅係好多「沉默嘅大多數」醒咗。希望呢一次，大家可以持續咁齊心。我必須承認，那天睇錯了很多中產朋友，你地的確對年輕人嘅態度改變咗，今天我希望我繼續睇錯落去...錯咗就係錯，所以無改內容意思！
****************************************
正如之前所講，雖然香港政治環境討厭，但並唔足以迫走我（記住係2016年！）。只可以話呢香港呢十年幾嘅變化，直到近年就肯定係催化劑，令我一家人離開香港去英國重新生活嘅決心更堅定。坦白講與其話厭惡香港政府（當年CY，依家又如何？），本人更痛恨嘅反而係包括自己在內嘅一班偽中產。因為一隻手係拍唔響嘅，社會有咩人就自然做就乜嘅政府同議員。
今時今日嘅香港中產，即係所謂嘅廢老廢中，邊個唔係經歷過殖民地時代生活過？分別只係經歷過幾多，個金魚腦又記得幾多。唔該唔好再用「戀殖」做籍口，坦白啲諗下當時嘅社會同依家有咩分別。以前香港所有人都好專心咁「搵錢」，因為每個人都有機會向上流動機會，每個行業都有神話。雖則當年嘅香港社會，大部份都係政治白痴，剩係識講錢嘅「港豬」，但至少有個識用腦（叻唔叻無謂比較）嘅政府，無政治立場、唔貪污（亦唔打人講法治）嘅公務員團隊。
就算係無民主，但肯定有無盡嘅自由。唔只鬧呢個嗰個嘅政治批評，就算攞港督英女王黎笑，個社會都有一份包容性同幽默感，何來咁多忌諱同意識形態？當年更無人會介意自稱係「香港人」或者係「中國人」、甚至係「英國人」都無問題。本來呢種身份模糊，就係香港人响國際上嘅優勢同特質。其實香港人從前都有既愛國，又唔討厭英國嘅時候，邊個搞到大家分得咁清楚，互相詆毁同歧視？如果話係人心未回歸，咁點解殖民地時代，我見過老一輩會去國貨公司，買彩電同單車送上大陸？華東水災嘅時候，成家人仆到打去電視台捐錢？六四嗰時，阿爸同啲uncles對住部電視流晒馬尿？難道英國佬當年教香港人愛國，還是特區政府令到大家變咗「更愛做香港人」？
自問做咗幾十年香港人，當然明白凡事有因必有果，有啲事情的確係共業。就係九七前後嘅社會生態，就做成香港偽中產嘅錯覺，只要繼續有自由、法治同揾錢機會，無民主並唔緊要（因為嗰啲係天跌落黎嘅）。可惜佢地唔明白，當呢三樣嘢都慢慢減少嘅時候（估唔到16年後就唔係慢慢！），民主嘅重要性就突顯晒出黎，因為：「點衰點壞自己揀（仆街唔好喊）」。
不過可惡嘅係，班偽中產最怕無剩返嗰些少搵錢機會，仲驚自己層樓會跌，所以從來都選擇做「沉默嘅大多數」。當乜都無嘅年青人出聲嘅時候，反對得最大聲嘅必定係班偽中產，是因為支持政府有特點立場嗎？不是，說穿了就係驚失去已經擁有嗰小小，即係自私！班偽中產咩時候同年輕人最齊心呢？沙士嗰時，錢無得搵，樓跌到入骨，幾咁同聲同氣？搞到自己仔女國教嗰時，亦齊心非常，但雨傘嘅時候又咩取態呢？（真心希望香港人，尤其是中產，响2019年今次係真正嘅齊心，唔支持都唔好再指責。）
其實香港都唔係完全無選舉吖，大家睇下歷年嘅投票率，同啲中產選區選啲乜嘢人出黎？香港偽中產關於民主，證明咗兩樣嘢。第一，既要唔滿意，但唔鐘意投票，去投票，又驚選到出黎嘅人搞事，影響到自己。第二，呢幾十年，有無期望過有能力嘅政治人才（唔係剩係sell理念，含眼淚投嗰啲）？睇到咁都覺得無希望啦。慢慢唔理唔選唔出聲，結果係點？咪比嗰啲以前諗都未諗過，想象都想象唔到嘅人，例如類似義和團呀，大媽形狀呀，疑似社團人士嘅人士，人肉錄音機呀等等代表香港人，話自己有幾愛國囉。怪得邊個？（估唔到全部實現晒，仲加送DQ同又拉又鎖？！）
如果要我講一個理由，點解對香港死心，我會話係個社會多過政府。還記得雨傘嘅時候，自己生意唔見咗三成，都隻眼開隻眼閉咁比幾個年青同事早啲放工去金鐘。但當睇到嗰啲所謂反佔中嘅理由，有乜辦法唔心灰（嗰班「係咁㗎啦」「點解搞事」同「阻住返工揾食」）？無人要你地革命，亦唔係爭取獨立，只係要求多小小權利（仲要係年輕人幫埋你班友同仔女），咁都唔齊心小小？腦海裡面會問，就算比晒完全民主香港，結果係咪都一樣？
講講下已經離題，仲要寫到咁長，下次會講回流英國真正嘅決定性原因。
Photo Source: 我，2014年某日在旺角
#GoodbyeHKHelloUK
#偽中產回流英國之路
#Remastered
#偽中產講偽中產
#當日原來睇錯咗
+++++++++++++++++++++++++++++++++
英國居留簽證懶人包（香港人限定）
http://bit.ly/2MfFPPZ
偽中產回流英國之路remastered 1
http://bit.ly/2LdV35P
偽中產回流英國之路remastered 2
http://bit.ly/2LpEXX0
英國移民生活網
重要舊文重溫
www.goodbyehkhellouk.com
+++++++++++++++++++++++++++++++++
