【Kongner編輯室】
瘋子愷：香港特色的自由主義
早前有觀眾係直播度問過「咩係自由主義」，本人就係度好求其咁講兩句啦。
自由主義原本就真係講自由嘅。啟蒙時代果陣，因科學嘅發展，人民開始擺脫傳統封建思想，開始思考每個人嘅自身權利，思想嘅自主等等，繼而開始產生咗對人權同民主等等嘅訴求，例如就好似法國哲學家盧梭所提出嘅《人的自然權利以及社會契約理論》更加係對往後嘅自由主義思潮有著深遠嘅影響。
因此簡單咁講，自由主義嘅重點在於尊重每個人嘅基本權利，包括人身自由、私有財產、以及公民嘅政治權利等等。咁點解生活咁自由都重要理啲咩政治權利呢？因為自由主義嘅支持者都明白就係只有民主政體先能夠保障人民嘅自由不被強權所剝削及侵犯，亦係最能表現出人民擺脫封建時代嘅象徵。
然而，自由主義始終都只係一套思想，實際上點樣去實行，各人就各自有唔同嘅演繹啦。因為唔同人對自由嘅執行，或者著眼點都唔一樣，所以導致到只要同「自由」有關係嘅意識形態，都可以稱之為「乜乜自由主義」，所以大家會見到左至主張平均分配社會資源以達至人民享受同等自由權利嘅「社會自由主義」，右至主張只有市場嘅經濟活動完全自由先能夠最有效地保障人民財富自由嘅「經濟自由主義」都可以稱之為「自由主義」。不過萬變不離其宗，稱得上「自由主義」嘅思想，都會對民主有著不同程度上嘅追求，因為就正如上一段所講，無民主就無自由。
而綜觀香港走嘅所謂「新自由主義」可以話係「古典經濟自由主義」嘅新版本，除咗更加積極地主張減少政府干預市場外，亦加入好多全球化視野於其中，而實際執行上依然都係以「大市場，小政府」、「反干預」為依歸。無錯，香港的確做到全球最自由嘅經濟體，但諗深一層，似乎香港喺政制上面達唔到「自由主義」嘅前題，就係民主。呢個問題在於「新自由主義」本身就只係「自由主義」嘅經濟果part嘅延伸，所以某程度上只係一套經濟學說，因此本身就忽略或無需要再提民主等政治概念。打個比喻就係，如果「自由主義」係武功祕笈原典，「新自由主義」就只能算係後人所創嘅一招招式。換言之，香港政府一直以來都只係借經濟理論來裝模作樣，掩飾政制上嘅落後，出一招招式扮識晒成套祕笈。久而久之，黔驢就自然技窮喇。
不過有趣嘅係，香港政府經常強調自己完善嘅法制再加上「積極不干預」政策就係香港成功嘅秘訣，但其實呢個秘訣只係香港「經濟」成功嘅秘訣，其他方面亦無成功過，例如好似環保、人民幸福指數、公民權利等等，都係無成功過嘅。當然，香港政府就係咁不斷灌輸呢種以為經濟成功就當自己咩都掂嘅意識形態，再加上不干預嘅原則，事實上一開始就無任何基礎同市民講民主，講自由，就好似「新自由主義」一樣，本身就唔存在深入探討民主自由嘅內容，淨係同你講「經濟自由是最好的」，講到底就只係一套「經濟放任主義」，其中缺點大家都有眼睇㗎喇。
而最好笑嘅就係，由於近來都出現唔少人都話香港真係好自由，特別係唔知佢哋買唔買到口罩同紙巾嘅藍絲們。具體嘅情況就係喺香港呢個號稱「最自由經濟體」嘅地方卻連言論自由都無，但都重有一班人認為香港好自由好爽，但呢班人同時又會鬧政府點解唔干預市場派口罩喎，咁政府喺呢個時候就理所當然地睬佢地都生芒果喇。而對於呢個咁奇妙嘅現象，本人認為現階段無任何一套學說可以完美演繹到香港嘅現況，所以決定稱呢套由香港特衰政府帶頭所造成嘅現象為「中國香港特色嘅自由主義」，意思就好似「習近平新時代中國特色嘅社會主義」係只有習近平，沒有社會主義一樣，「中國香港特色嘅自由主義」當然係只有中國香港人，沒有自由㗎啦，但由於都係太長，所以決定將佢簡稱為「藍絲自由主義」算啦，反正都係同一個意思。
（本欄逢周四更新。敬希讀者垂注）
-------------------------------------------------------------------
HappyKongner 招稿喇！！！
我哋嚟緊會喺逢星期一、五加設 【Kongner投稿天地】 ，俾廣大Kongner 弟兄姊妹能夠有發表佢哋意見嘅地方，亦都可以鼓勵大家多啲運用自己嘅闡述能力。
有興趣嘅朋友歡迎直接Facebook Send Message 俾我哋，又或者Email 去 happykongner@gmail.com 同我哋傾都得。
期待收到大家嘅鴻文大作！
納稿標準：合乎邏輯，文句通順，言之成理即可，不過編輯部同事比較嚴謹，大家自己小心。
社會自由主義 在 CH12-4. 新自由主義全球化與社會分配不平等 - YouTube 的推薦與評價
新 自由主義 全球化與 社會 分配不平等. 159 views159 views. Jul 31, 2018. 1. Dislike. Share. Save. 臺灣通識網General Education TW-開放式課程GET. ... <看更多>