華為繼 2019 年推出咗外摺曲面手機 Mate X 之後，2020 年 2 月就發表咗後繼機 Huawei 華為 Mate Xs 5G，今日就同大家介紹吓！
Mate Xs 系列配備華為最新嘅自家處理器 Kirin 990。相對上一代嘅 Kirin 980，除咗效能大幅提升之外，Kirin 990 亦都內置咗 5G 數據機，唔洗好似上一代咁另外加一粒晶片作為 5G 用，對於操作嘅流暢性以致電量嘅優化都有所提升。
Mate Xs 無論喺外觀、大細同埋屏幕解像度都同上一代 Mate X一樣，當摺合嘅時候，主、副 OLED 屏幕大細分別係 6.6 寸同埋 6.38 寸，而打開就係一個八吋嘅平板，重量大約係 300 克左右。接合嘅鉸鏈位亦都有加強，比上一代更加紮實同穩固。
Mate Xs 亦都配備咗全新嘅冷卻降溫系統，就算高速串流或者下載超高清片段，又或者玩 3D 嘅圖像遊戲，手機都唔會因為過熱而影響表現。
鏡頭方面，Mate Xs 配備 Leica 四鏡，分別係 4000 萬像素嘅廣角、1600 萬像素嘅超廣角、800 萬像素嘅景深鏡、同埋一個華為ToF鏡，雖然數字上面未及對手嘅 1 億 800 萬像素鏡頭，但係以華為一貫超水平嘅相片表現，相信大家都唔使太擔心嘅。
有靚嘅鏡頭，影相嘅軟件就要花啲心思。華為善用咗 Mate Xs 嘅外摺雙屏，無論幫你揸機嘅定係你自己，都可以同時睇到相片嘅取景，以後搵人幫手影相，就唔使下下影完先睇返有冇問題咁尷尬喇！
有得咁大個 mon， 多 App 多功同時操咗就梗係唔少得啦！Mate Xs俾用戶可以同時喺左右開唔同嘅App，甚至配合浮動視窗技術，將唔同嘅資料由一個 app 拉去第二個 app，配合常用應用程式欄，喺唔同嘅 app 之間操作就變得簡單喇！
Mate Xs 配備 4500mAh 電力，足夠一日使用，支援 55W 嘅華為 Super charge 技術，半個鐘就可以為手機充滿 85% 嘅電力，夜晚唔記得充電，晨早瞓醒補飛都唔怕遲到啦！
Mate Xs 5G 將會配備開源嘅 Android 10 系統，搭載華為自家嘅 EMUI 介面，雖然無 Google Play，不過華為嘅 App Gallery 亦都係排名第三嘅流動手機應用程式商店，大部份嘅軟件都可以喺入邊搵到，不過部份同 Google 有關嘅，可能就用其他方法安裝喇。
Mate Xs 5G 內置 8GB 記憶體同 512GB 儲存空間，國際版本嘅價錢係 2499 歐羅，折合港幣 $21,200 左右，馬幣 $11,400 左右，預計2020 年 3月5號上市，唔知你又會唔會心動呢
《Z世代達人》
麥卓華
