因為前女友，我變成超級電腦（下）
上集：https://bit.ly/3giMTIk
我唯一嘅欲望，就係報復曼曼。
我萬念俱灰，都冇咩可以畀人呃。
我跟老闆嘅指示，去組織度接受一連串嘅手術。
其實我都唔知佢哋做咗啲咩，總之，我醒番嗰陣，個世界唔同晒。
老闆企喺我面前，我望向佢件衫，個腦馬上分析，呢件係Gieves&Hawkes嘅純羊西裝，價值$6740。
西裝上有佢秘書嘅指紋，主要集中喺腰部同肩頸位置，應該係擁抱造成嘅。
得出最大可能性結果：老闆同佢秘書有路。
原來，同電腦結合嘅感覺係咁正，好似所有嘢都在我掌握中。
老闆將我帶去組織嘅總部，有人幫我安排工作，都係通過分析，去做兼有數據同人性化嘅決定。
我嘅人工好高，而且我仲可以自己買股票，增大我嘅資產。
我好快就有一大筆錢，但我唔開心。
應該話，我感受唔到開心。
住大屋、揸靚車、俾人羨慕，我一啲感覺都冇，連食好嘢都唔覺得好味。
我連味覺都漸漸喪失，好似逐漸變成一個有人形外殼嘅電腦。
唯一可以令我開心嘅嘢，就係報復曼曼。
有咗咁龐大嘅資源，我唔滿足於只係炫耀我嘅財富，再令曼曼後悔。
我要令佢嘅心靈受盡折磨，我要令佢下半世不得安寧。
通過資料庫嘅比對，我知道晒曼曼嘅行蹤。
從搜索記錄、聊天記錄、手機定位到信用卡消費，電腦先係全世界最了解你嗰個。
我知道曼曼同緊一個有錢仔拍拖。
論條件，曼曼遠遠配唔上個有錢仔，只係個有錢仔鍾意睇波，咁啱曼曼又係少數鍾意睇波嘅女仔，志趣相投啫。
如果有另一個志趣相投，而且比曼曼更優秀嘅女仔出現呢？
喺我嘅設計下，一個鍾意睇波、又靚又單純嘅女仔，成為有錢仔嘅助理。
佢得到呢份工係必然，因為所有比佢更優秀嘅求職者，Email履歷去公司嗰陣，都俾我攔截咗。
佢哋手機上成日見到嘅Post、廣告，都經過我精心挑選，兩個人愈嚟愈夾。
與此同時，我都設計咗幾個條件唔錯嘅追求者畀曼曼，等佢以為自己好有市場。
感情，可以好脆弱，特別係只為條件嗰啲所謂「愛情」。
於是，喺某一次爭執中，曼曼同有錢仔分手。
曼曼點估到，分手後，所有追求者都突然遇到更好嘅對象。
之後，佢每一次嘅希望都變成失望。
我同超級電腦嘅融合度愈嚟愈高，我設置咗一個程式，令曼曼喺愛情嘅痛苦中輪迴，每一次佢以為釣到金龜，都只會令佢傷得更重。
漸漸地，我幾乎忘記咗呢件事。
直到有一日，曼曼出現喺我面前。
我查一查資料庫，先發現佢已經三十歲。
佢曾經講過，希望喺三十歲前結婚。
曼曼當然唔知我已經係半部超級電腦，佢只知我發咗達，而佢仲係單身。
佢話，佢遇過好多好多男人，但發現真心嘅只有我一個。
佢聲淚俱下咁回憶我哋嘅過往，目的只有一個：復合。
經過計算，要對曼曼造成最大嘅傷害，最好嘅方法係同佢復合，再狠狠咁傷害佢。
但呢一刻，我望住佢扭曲嘅神情，我冇任何報仇嘅快感。
冇愛亦冇恨。
我忽然意識到，我已經忘記咗曼曼。
忘記一個人，唔係你唔記得咗佢嘅存在，唔記得咗佢叫咩名。
而係佢企喺你面前，你清楚記得你哋嘅所有過往，就好似一部電腦對住一個人咁，咩都知道，但冇任何情緒波動。
既然我已經唔再恨曼曼，我係咪應該取消咗「令曼曼喺愛情嘅痛苦中輪迴」嘅程式？
但既然我都唔鍾意曼曼，點解我要取消呢個程式？
我喺呢兩個問題中循環，得唔到答案。
一直以嚟，我都唔知變成超級電腦後，我失去咗乜嘢。
原來，當我擁有無數個答案後，我就失去咗答案。
—完—
新書《真實虛擬一鏡過》已經出版了，現正發售中，
詳情可點擊這裡：https://bit.ly/3eTPuHL
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #因為前女友我變成超級電腦
虛擬女友聊天 在 如何假裝自己有女朋友？虛擬女友聊天機器人 - 有趣板 | Dcard 的推薦與評價
各位Dcard 的單身狗大家好～為了解決我朋友想要假裝自己有女朋友的問題，小弟我做了一個虛擬女友聊天機器人Cindy，給那些想要假裝或體驗有女朋友的 ... ... <看更多>