［股壇奇趣錄］上市七日炒高兩倍幾就出盈警！
1. 上市頭七就盈警！見面四秒就合體！（我聽啲同事成日講，應該係六神合體機械動畫）
2. 是咁的，呢隻電子煙，斯摩爾，7月10號上市，20號就發盈警！計交易日，就真係7日咋。
3. 當然個通告唔係叫盈警，叫做「盈利更新」。但其實差不多同一回事啦
4. 你話，咁都得？10日就出盈警？！
5. 梗係得，其實仲未破紀錄。紀錄保持者，係隻強泰環保（1395）。星期五上市，星期一八點出盈警（https://bit.ly/2ZMp97v）！
6. 應該好難破呢個紀錄。睇下有冇公司可以第一晚就出。而我唔係律師，唔肯定。但應該理論上最快就係第一日上市嘅中午！或者夜晚。照計唔可以未trade就盈警。好似係咋下，唔係法律意見。
7. 好啦，不過都仲有少少唔同。隻強泰，就因為上市費用而出盈警。近一兩年少啲，港交所嚴打啤殼。但以前呢，你見有啲公司，集1億港紙但畀5000萬上市費，借大耳窿都唔洗。加埋本身可能都得幾千萬盈利，計埋畀投行才俊嘅上市費，咪盈利大跌甚至輸錢。但凡集資額細都有見呢啲。
8. 今次隻斯摩爾就威啲，唔係因為上市費！係因為「金融工具的公允價值變動所致，是公司財務報表中的非經常性和非現金項目」，revaluation loss 之類（＊），啲投資或衍生工具價值大跌嘛，公司話non cash，「但你買嗰時明明真金白銀」。
9. 但繼續諗，至少仲有幾個問題
10. 首先，喂，「7月到而家個市好差咩？」。唔係。咁應該係3月嗰浸。但，「6月中期業績冇反映咩？」。咁就鬼馬啦，留意返公司盤數呢，係去到舊年12月嘅（https://bit.ly/2CwIEYL）。而今次盈警咪就係中期業績！。希望冇睇錯，有嘅指正。見唔見公司係6月29號出招股書？剛好在半年結前，咁就可以用返舊年嘅業績上市。拖到7月就應該唔得了。亦因為咁，你見到點解6月尾一大堆公司上市。年尾亦係咁
11. 第二，喂，咁你出招股書時唔知咩？其實係知知地的。公司好似大約有提過下，25頁有講，「我們預期於2020年以股份為基礎的付款開支及可轉換優先股公平值變動之虧損將對我們的財務業績產生不利影響。」，唔知係咪呢舊嘢有關。咁你話，招股書咁Q長點睇晒？咁其實，呢度都係Summary 啫。17頁亦有類嘅東西
12. 所以我覺得去到呢度，都唔係好神奇。咁你明知盤數只係去到2019年尾，咁見今年年頭咁嘅市，應該不難估到中期業績會有呢堆嘢吧。
13. 所以其實更加得意嘅係，公司大可以一上市嗰晚就出盈警啦。點解頭七先出？真係啱啱先知條數？
14. 順手講下，之前隻嘢炒到飛天喎。咁有人懷疑，係炒到上去先出盈警。但公平講句，第一日已經31蚊，而家都係咁上下。咁而家出同當時出，股價水平係差不多嘅。就應該係管理層咁啱收到中期啲數，就已經褲都唔著第一時間飛出嚟話畀港交所知。一定係咁，次次都係咁。見唔見有時啲股票出咩內幕消息呀 畀人收購呀，都trade到三點幾先停？肯定係管理層一起身知道已經即時做啦。唔畀人訓得晏？
15. 況且，其實公司有講明，如果計core profit，公司有錢賺喎，直頭按年升幾成，應該盈喜添。不過會計報表就冇一樣嘢叫core profit（＊＊），呢樣嘢只存在於分析員，基金經理同公司心中。況且交易所嘅盈警機制，亦只會睇大數，reported net profit
（＊）寫港鐵時寫過，不重覆 （https://fbook.cc/3CaA）
（＊）以前講過易必打EBITDA，Earnings before interest, tax, depreciation and amortization。但而家啲公司，至少美國公司，EBITDA居然唔係呢堆嘢嘅簡寫，正如HSBC都唔係康江雙揩賓哥波喱唇咁。EBITDA可以係十分彈性嘅，管理層自訂嘅一種core profit．唔止，而家甚至有更型嘅，易必踢EBITDAC，C係乜？係Covid．出神入化，有機會再講
-------------------------------------------------------------------------
香港聯匯何去何從？新收費片已出，講足一個鐘，單次買200
想睇簡介嘅，呢度。亦有埋以前嘅片，有興趣可訂：https://bit.ly/3iYMD0F
報名嘅，呢度。今次課程編號填 CC005。唔想填信用卡亦可以FPS： https://bit.ly/3j0r9QZ
Log in 呢度：https://bit.ly/3gYXu9e
已付費嘅，log in後按最頂「按此觀看」就得。再唔係返呢度睇：https://bit.ly/3fyKbw0
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:「聯繫匯率會否脫勾？散戶應如何應對？」
影片/課程編號：CC005
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC005]
2/利用信用卡網上付款
3/及後有登入資料可以立即收看
查詢：whatsapp 63832145
