【西營盤】新咖啡店仍然係排山倒海，有一期都興致勃勃keep住追。呢輪腳步放慢番，計一計開始搞搬屋到而家只係去過兩間咖啡店，哈哈。其中有西營盤The Third Bakery (元朗The Third分店) 總有朋友仔去cafe為食嘢(甜品)多過飲咖啡，呢度啱哂你😬
咖啡店以淡綠色為主調，高樓底突顯空間感，一排單邊座位加兩張木大枱，可以容納嘅人又唔係話好多。新店總有熱潮，平日下午茶全店滿座呢😂開放式吧枱，洞洞板整齊收納用具，餅櫃一目了然，仲不時會見到新鮮製作同出爐嘅pastry。呢度主打蛋糕、鬆餅、曲奇等，非咖啡類就只有抹茶焙茶喇。
👉Basque Burnt Cheesecake $65
👉Flan Cake $60
👉Morange $50
👉White $40
蛋糕定價偏少少，巴斯克係暫時食過價格最高嘅，有做餅底，餅底都香，口感上冇咁單一，蛋糕外皮焦黑色，好在冇乜燶味。芝士香濃，如果鐘意半熟軟滑效果嘅燒芝士蛋糕，會滿意嘅☺️而家愈來愈多做呢款蛋糕做得出色嘅朋友，所以我覺得呢件貴咗啲。
布丁蛋糕有新鮮感嘅，布丁同蛋糕比倒接近半半，上碟時會伴脆脆同蜜糖😛布丁蛋味濃郁，偏挺身，個人喜好軟嫩布丁。蛋糕層都係實淨嘅，食落濕軟，唔係蓬鬆空氣感路線。如果布丁層做番焦糖漿，相信會比就咁倒蜜糖多層次又冇咁死甜。
咖啡之前喺元朗已經飲過，偏淡咗啲；比較喜歡呢度嘅特調，Morange係帶橙香嘅摩卡，好易入口，味道討喜。
-
The Third Bakery
地址：西營盤東邊街40號
