《順風車初體驗》
終於終於係New Zealand 試左第一次全靠自己既力量係公路上面hitchhike。其實之前都試過一d超短途既，可能只係5-10分鐘路程，又或者係傾傾下計發現對方有車就順路一齊反hostel。不過講到要穿州過省，自己一個係條馬路邊伸隻手指公出黎就真係第一次。
事源係來回Waitomo/Auckland 既巴士full曬，但又唔想白白浪費一日。加上其實大部分既車都係去Auckland，路程大約只係3個鐘，一朝早出去截都應該無問題既。
其實好多人玩紐西蘭都會選擇hitchhike，而我亦絕對有理由相信呢度係hitchhiker 既天堂。除左呢個地方安全第一之外，呢度既人都好習慣停車載人。而我就總共上左4架車，用左3個鐘頭15分鐘就到達Auckland。不要去羨慕不要去妒忌，無錯，我前後加埋用左15分鐘就上到車，分分鐘重快過搭巴士。
至於你問我第一次hitchhike 有咩感受呢，我會答你其實都真係幾攰。唔係企係條馬路度好攰，而係遇到d唔岩嘴型既人，又要迫住同佢吹水真係好攰。好似我禁，成程車個幾鐘係禁比個大媽問oh!China? How's it in China? You are Chinese? Oh! So you study in China! 我真心唔想再同佢講野。I live in Hong Kong, and I never been to China...重覆左1000次，而佢好似完全filter左我講既野⋯果一刻我真係好想西面(可能已經西左)，但又一直要保持微笑你知唔知有幾辛苦。
不過當然都有遇到好人既，如果係backpackers 停車比你就通常都比較好傾，至少可以share下行程唔會dead air 先啦，如果夾既話唔定重可以一齊玩下一個point。
可能你會話人地停車比你就唔好禁多嗲啦！你岩，所以我盡可能都會帶上笑笑emoji面具。不過識我既人都應該知我其實好懶得同人social，不嬲唔鐘意就西面無面比。所以順風車呢家野，試過一次我已經好滿足，都係自己搭巴士做毒毒岩我多d。
-
如果你都想試下賣笑，here are some tips for you:)
1)首先請你早d起身，朝早來回城鎮既車一定係最多。
2)打開你既google map，將整段路分開幾段，目標係去下一個有人既鎮。(去到大城市當然最好)
3)企係單程公路既入口，截曬所有去果個方向既車。
4)企既位置要注意車速唔可以太快，同埋附近要有位比人地停車。
最後就緊要當然係要笑啦。大佬你依家賣笑丫，係咪笑都要教？如果你做足以上準備都截唔到車，um⋯你懂的。
The first place I hitchhike.
(Otorohanga, New Zealand)
