今日寫完個post發現好多人覺得只要病人或家屬想要，醫護就要尊重同服從。
但其實條線並非想像中咁簡單，舉幾個常見嘅兩難
1. 最常見的不作心肺復蘇CPR
其實法律上這個是一個醫療決定，醫生可以直接決定要不要CPR。但在晚期癌症或無可逆轉的長期疾病的病人上，進行CPR很多時候只會造成更大創傷而對生活質素或預後並無改善。
醫生跟病人和家屬一起商討是希望大家一起下shared decision，令大家明白為何醫護人員傾向不作CPR，好讓大家不會覺得有遺憾。
晚期病人好多CPR同插完喉，一試圖extubate就轉差，只能依靠呼吸機生存係唔係有品質嘅生活？
插喉插得耐又會易感染肺炎，敗血症時落唔落抗生素、落唔落強心針？落完但又甩唔到條喉時，又搞一輪之後再感染又敗血症，多重器官衰竭，係咪病人或家屬話要救，又再落抗生素同強心針、升壓劑等等？
無生活質素，需要依賴機器生存嘅時候，係咪對病人好呢？如果純粹因為病人或家屬話要，就隨便服從、我唔認為係負責任嘅做法
2. 輸液IV fluid與否
好多人覺得病人想要就應該俾，但其實IV fluid都係一個醫療決定，醫生同樣可以直接決定俾唔俾。的確醫生寫兩隻字唔難，輸液亦唔係咩高風險嘅治療。但其實對晚期紓緩治療嘅病人來講，要唔要輸液真係一個兩難。
好多病人無胃口進食困難，或因癌症壓迫食道或腸胃道而無法進食。的確你可以一直輸液buy time，但輸液要有IV access，唔係個個病人都有條PICC line或PORT可以長期輸液，打豆嘅話粒豆每幾日又要換。
老人家或者晚期癌症病人，特別有bone narrow infiltration嘅話，血小板唔高，次次打豆都會打到成身瘀晒。每幾日又要換豆，好多晚期病人本身都唔易打，又要打幾次先上，成身d靜脈都用哂去打豆，成身都瘀哂，對病人同家屬來講又係唔係容易消化同承受嘅事？
你輸液我當你慢輸80ml/hr，你每日要換兩包水，粒豆有時downstream obstruction部機又係咁beep beep叫，護士又要幫你調整下粒豆，每次都會整醒你，一日俾人整醒十幾廿次嘅生活又係唔係有質素呢？
輸得液嘅時候，好多醫院都要求有regular vital signs obs，我當你每日6次度血壓量心跳，又要整醒你搞你一輪。
但你進食唔到嘅病人就會覺得個人好乾，就算每日護士幫手做mouth care，都未必足夠，咁嘅時候要唔要輸液呢？輸完又wean唔Wean到？wean唔到係唔係要輸到2046到病人臨終嘅一日？
3. 病人同家屬決定就好，醫護無權幫人作決定
其實好多醫療決定，如果無醫護人員諮詢建議嘅話，只係想個責任同壓力拋俾病人同家屬。純粹係但求可以輕鬆覺得既然佢地都決定咗，就咁啦，尊重病人如家屬就好。
我認為重大醫療決定唔應該係單方面醫生或病人或家屬去做。而係一個shared decision，醫護人員盡力進行諮詢，係尊重病人同家屬意願同時，亦要以病人實際生活質素去考慮。
但呢個講就易，實際操作時其實好難

