小器一週年紀念日。
[方丈份人好小器]
多得好友發現， 始知報道出街後，我們竟然成了香港著名親子討論區的討論對像。
回來以後，一直最怕的，就是答那些「咁你用咗幾多錢呀？」「嘩！你實好有錢啦？」的問題。旅行對我們來說，就像名牌。即係，你死慳死抵幾千蚊買手機手袋耳機Pandora，我們一樣為張機票捱麥記、買特價Uniqlo、為慳錢過海太子行去尖沙咀搭＄2天星小輪。所以你問我點解成日都去旅行／去咁多地方的時候，我就會問你點解可以成日買新衫換新手機。
咁究竟，旅行本身，又是咪要好有錢先去到？答案我可以好肯定話你知：唔‧係‧囉！有數得計：衣，都係著買落的Uniqlo，即係＄0；食，豐儉尤人，但在出名貴的紐西蘭，＄40港紙都可以煮到塊扒，亦可以同樣價錢白灼意粉撈廚師腸食足幾餐；住，南美東南亞，中價床位＄6、70港紙，最貴的西歐澳紐，最平床位＄150港紙；行，廉航四圍都有，能夠時間換取金錢的話，長途火車巴士hitchhike甚至乎行路都幫你慳唔少。按此推算，如果拿著政府幾年前派的＄6000，不計算機票（始終買機票如買股票，日日有升有跌，執唔執到荀嘢全靠勤力與運氣），絕對有能力在東南亞存活至少一個月，在歐洲澳紐等先進國家玩一、兩星期也不大問題。
而＄6000，在香港連一個月200呎房房租都交唔到。
你可能會這樣話：「去旅行咁辛苦，搞足一日腰酸骨痛仲要捱麵包，我就唔＿去喇！」
我也可以這樣說：「供層樓咁辛苦，節衣縮食得個發水豆腐潤單位，我就唔＿供喇！」
其實人生永遠就是give and take，我佩服你可以為層樓棄絕娛樂，不會像鍾樹根笑王維基般，笑你得嗰少少錢就學人買樓，叫你收皮。我們放棄事業、金錢，去賺取熱血回憶，
作為旁觀者，支持的，你可以學G.E.M.勉勵梁特首咁向我們講聲加油；不支持的，你可以否定我們，覺得我們不直一晒，甚至罵我們毫無大志，但借我們過橋來無限上綱上線，再一竹篙打沉一整代80後，把所有社會問題一刀切歸究至不思上進的廢青，跟手呃自己外面世界一切正常。嘩！洗唔洗咁呀！！！
樓價升幅遠超人工升幅，關我去旅行＿事？
堅尼系數高企，關我去旅行＿事？
領匯霸權趕絕小商戶，關我去旅行＿事？
大陸熱錢炒貴樓價，關我去旅行＿事？
六百萬叫上車盤叫正常？
發水樓到發到窗台大過張床叫正常？
劏房棺材房都要幾千蚊租叫正常
官商勾結叫正常？
我只想說，你眼中的80後，現在不是「怨」政府，而是「屌」政府呀！作為一個努力工作，不攞綜緩、不申請公屋兼交足稅的良好公民，眼看政府施政失當、政策傾斜、利益輸送，點解唔可大大聲屌呀？點解要學你一樣做一隻逆來順受、默不作聲的羔羊？
我，開始明白離地老屎忽的可怕和可憐。
利申：報道有誤，沒有花光積蓄，10萬只是我們夾出來的本，在澳洲打工賺回來的錢，也是旅遊基金一部分，旅費全部自己一手一腳賺回來，家景不算富裕， 但慶幸家人支持。
P.S. 其實睇番個Post，還好會員bks2014的睇法只屬少數，其他大部份會員的留言都有理有節，唔少仲睇得我幾感動。
