［Less is more？］Google 股價大跌，因為披露youtube收入？
1. 首先，我知上司公司係Alphabet，但實在好討厭「Google母公司Alphabet」呢類講法，我以為呢度啲讀者都知。不過又不排除有新讀者，結果又要打呢段嘢。無論如何，明啦
2. Google出完業績，股價表現麻麻地。奇怪嘅係，明明盈利就遠超預期。係遠超喎，當然我冇再細睇係咪因為啲一次性嘢，但似乎呢，出面講法話個收入差過預期云云。咁呢啲情況都唔係極罕見，有時啲人又唔係睇盈利，睇下收入。但今次個盈利好咁多都仲只係睇收入，又有啲神奇。當然亦可能只係之前升得多。不重要，反正股票唔會話你知點解升點解跌
3. 但另一方面，一個幾重要嘅看點係，Google失驚無神咁提供咗啲碧丹（http://bit.ly/31rEGc7），佢啲不同業務嘅碧丹。
4. 眾所周知，你唔知就我話你知，舊文都寫過（http://bit.ly/2OpMcic），Google財報嘅透明度其實極低。抄舊文一段：
收入呢，就咁叫Google廣告收入，Google 其他收入，同埋other bets，that’s all．冇呃你，後面啲footnote都冇，廣告，係咩廣告呀？幾多係Youtube？唔知。Google 買左Youtube 13年，但Youtube貢獻幾多盈利？佔收入幾多？係賺係蝕？一概唔知。好啦，硬件呢（有手機嘛）？Android呢？雲端呢？Google Pay呢？得一條大數，叫「其他」，你自己估。
5. 今次，就忽然有拆開，而且之前冇任何預示，有啲奇（例如蘋果都會講，下季開始唔再披露乜乜乜之類）。有報導話，因為Google換咗CEO。其實證監都有鋤過Google呢個問題，但Google一路話CEO都冇呢個資料，所以冇公佈。但換完CEO後，新CEO就話係知嘅，所以唯有公布云云。
6. 當然另一陰謀論就話，公佈嘅，正係增長最快嘅部份。唔掂嘅先唔會畀你睇。至於Android呀，Google Map呀，Gmail呀，都係冇嘅。其他
7. 好啦，今次有少少進步，特別係在Youtube方面，亦係大家嘅焦點。Youtube當然無人唔識，但其實有冇諗過，壇嘢賺唔賺到錢，at all？街外人可能以為好popular，好賺錢（兩者冇乜必然關係，例如UBER都係蝕到仆街），但行內同金融撚共識係，根本賺唔到錢，至少而家未。原因好多，但幾簡單嘅證據係：如果賺到錢Google就會講啦—事實今次亦都只係公佈收入，冇講分部盈利—如果賺錢點會唔講？但呢個本身不重要，反正都冇人預係賺錢。
8. Mashable 話Youtube嘅收入直頭mind boggling（http://bit.ly/2RXVJPS），twitter甚至話 YouTube’s basically printing money for parent company, Alphabet.
9. printing money，really？吾等金融撚，都係一句，給我profit 其他免談，即係UBER之類都仲妖言惑眾咗一輪，但去到Wework已經不Work．printing money？收入可能係，但UBER都係架。但，盈利呢？Where is the beef？
10. 當然創業家覺得，屌你啲外行人咪咁撚短視，你隔行八重山識條撚。我地改變世界搶份額，革命成功一統天下就自然大把錢賺。「UBER都係咁講」。但，Tesla都係要賺錢後股價先起飛。而又當然，可能好快Youtube都賺錢，但提提大家，Google買咗Youtube十幾年啦喎，仲搶份額？仲要等？等幾時？
11. 不過，又唔好睇死住。睇到Youtube嘅收入，增長都仲係好快嘅。2017年80億美金，2019年已經一個開去到150億美金，玩咗十幾年仲有咁增速，又係不錯
12. 但另一方面睇，其實Youtube亦只係佔Google收入10%左右，還不錯。但都係Search單天保至尊，一瓣擔起超過一半收入。咁冇嘅，蘋果都係埃瘋擔起超過一半收入。就真係半杯水。正如蘋果，「服務」收入佔15%左右，但市場見到有新增長引擎，就好興奮（http://bit.ly/2Je57bb）。咁點解Youtube唔得？
13. 當中個分別，可能係始終冇講Youtube嘅開支。蘋果啲服務收入，應該相當scalable，同賣電話唔同，做服務嘅，照計你收入升三成，成本唔使點乜大升。Youtube呢？可能都係，但未必咁正。Youtube最大開支係乜？我估，應該係畀Youtuber嘅錢。
14. 呢個亦係一樣我唔係好諗得明嘅地方：Facebook真係強，一個仙都唔畀你班仆街，但你地一樣日日貼嘢，免費供應內容畀佢，仲要睇廣告，佢仲可以收廣告商錢。Youtube都係收廣告商錢，但要派錢畀Youtuber喎，潛台詞即係唔派錢就唔會咁多人拍正嘢（定，過多幾年會減？），冇人拍嘢咪冇人上，冇人上廣告咪收唔到錢。個分別在邊呢？
15. BTW，其實Google Cloud收入（以前又係冇拆出嚟）都係兩年升一個開，唔會慢過Youtube，但金額仍細，總收入5%，同埋見到2019增長都慢咗好多，何解？但我估係競爭，雖則我唔知實際上同Amazon Microsoft係咪直接爭，但幾明顯，Youtube係少競爭嘅（當然有Facebook啦下）
16. 睇完有乜結論？都係冇嘅。睇返報導，話股價唔得，主要其實係Google Search嘅收入增長慢過預期，始終呢瓣係單天保至尊。增長仲要慢過Facebook同Amazon（係喎，Amazon都有廣告收入，暫時只係放「其他」。怛似乎動力甚好）。
17. 但我估呢幾年嘅著眼點都會係Youtube點轉盈為虧（當佢虧先啦，應該都係）。亦都有話，雖然Google一路冇披露Youtube收入，但doesnt stop analyst from 估ing（咩英文？），似乎醜婦出嚟，都係家翁唔滿意。唔賺錢就預咗，但收入，其實都係低過預期。所以，printing money，really？
