【 #搞乜郊野 】郊公主題樂園狂想曲
財政預算案預留5億係郊野公園增設 #樹頂歷奇 同搞 #豪華露營(glamping)等，另撥5500萬比旅遊事務署升級 十條熱門行山徑。消息一出，「行山界」劣評如潮，擔心政府又搞亂檔。
呢5億5千萬撥款，唔單止「搞亂檔」咁簡單，仲意味政府或已調整「搞郊野公園」嘅方法－由明刀明槍開發邊陲地帶，轉為低調「私有化」及「旅遊化」郊野公園，先淘空同破壞郊野公園本身嘅根基，再打開開發郊野公園嘅 #潘多拉盒子。
▍「私有化」、「豪華化」 破壞郊野公園公共性
雖然政府無提供進一步資料，但合理推斷豪華營地及樹頂歷奇屬商業營運收費設施，本質上與樸實及免費設施格格不入。郊野公園40多年歷史中未曾出現過類似豪華設施，若成事將顛覆郊野公園嘅 #公共性，將其變成一件可被私人開發嘅資源，後患無窮。
《郊野公園條例》通過時，麥理浩曾經講過：「沙灘同山丘（指郊野公園）屬於大眾，遊艇、哥爾夫球場呢啲豪華設施，係小眾玩意。」(...the beaches and the mountains are for the many what the yacht and golf course are for the few.) 【註1】。呢個大眾免費享用所有設施嘅精神亦體現喺郊野公園策劃同管理上。翻查一份關於郊野公園康樂目標嘅解密文件【註2】，政府不應以成本或時限限制市民進入郊野公園享用設施(there are no restriction on entry into the Country Park in terms of time or cost)，所以係郊野公園範圍內搞豪華露營，基層朋友將無法負擔，破壞郊野公園向大眾開放嘅根基，亦係「#私有化」郊野公園嘅第一步。
▍曾有發展商擬發展「西貢昂平哥爾夫球場」被否決
過往亦試過有財團對郊野公園虎視眈眈。今日極受歡迎嘅野餐露營地點－#西貢昂平高原，40年前差點成為哥爾夫球度假村，除咗有球場外、仲有野生動物園(safari park)，仲有纜車接駁（昂平纜車?）。呢個瘋狂計劃，最終因為政府唔信發展商能夠以相宜價錢開放比公眾使用而被否決【註3】，昂平高原亦得以倖存，足以體現郊野公園嘅免費原則。
▍豪華娛樂設施 唔應該「踩過界」入郊公
不過郊外亦可以有私人參建嘅康樂設施，但當年港英政府已經講明唔可以「#踩過界」，原則上，私人、收費或豪華形式嘅康樂，都要係郊野公園以外。
翻查奠基郊野公園文件 "The Countryside and the People" 【註4】，政府將郊外康樂設施分為兩類：
Þ #公營普及康樂設施(General recreational facilities): 基本且適合大眾使用嘅康樂設施，例如燒烤爐、郊遊徑，費用全免；
Þ #私營特殊康樂設施(Specialized recreational facilities):有特定受眾嘅特殊設施，例如歷奇營、宿舍，甚或乎係豪華康樂設施，可以收費。
文件清楚指出，郊野公園及周邊地區嘅康樂設施策劃上，必須是「#先普及、#後特殊」（private organizations...should not be given undue preference in the allocation of land to the prejudice of the community in general) 。而私營特殊康樂設施通常環境足印較大，策劃時要小心考慮對周邊景觀(having regard to the likely detraction from scenic amenity)，所以呢類康樂設施都係郊野公園門口，例如大網仔、北潭涌，而非郊野公園核心。今次「升級」營地，即代表係郊野公園內現存營地落手，違反初衷。
根據郊野公園成立原則，豪華營地同樹頂歷奇，同「西貢昂平哥爾夫球場」一樣唔應該係郊野公園入面出現。
▍郊野公園 旅遊化、「打卡化」打開開發缺口
郊野公園並唔係主題樂園。解密檔案提到，郊野公園嘅成立有 #四大目標，包括「保育，康樂，資訊及教育」【註2】。而呢四大目標當中，保育被視為係重中之重（Conservation is one of the main theme that runs through all the park planning work），郊公入面嘅設施不得違背其精神。即係話，同保育無直接或間接關係嘅活動，例如樹頂歷奇同住豪華營地（同住酒店差唔多）呢啲主題式樂園活動，就只應該留返係郊野公園以外。
呢啲私有化、豪華化同旅遊化郊野公園嘅措施，一步步嘗試改變郊野公園屬性，慢慢將佢由公共財產，變成一個可開發嘅旅遊資源。若此缺口一開，不能排除旅遊化計劃例如度假村、XXYY樂園，將會接踵而來。
【參考文件】
香港歷史檔案編號 HKRS 1075-4-87 Sai Kung Country Park
香港歷史檔案編號 HKRS 684-3-24 Recreational Development and Nature Conservation Advisory Committee (NT) (General)
【註1】HONG KONG LEGISLATIVE COUNCIL — 8th October 1975 Official Records of Proceedings https://www.legco.gov.hk/yr75-76/english/lc_sitg/hansard/h751008.pdf
【註2】Country Parks Board Planning and Management Committee- Country Parks Planning an Introduction; Working Paper CPB/PMO/3/88. March 1988.
【註3】【馬鞍山郊野公園成立之初 已有地產商「睺住」】https://www.facebook.com/localresearch/photos/3665203243575722
【註4】The Countryside and the People- Report of the Provisional Council for the Use and Conservation of the Countryside. June 1968.
#財政預算案
#郊野公園研究
#搞乜郊野
▍研究到底 參與小額月捐支持
https://liber-research.com/support-us/
recreational land use 在 RECREATIONAL LAND: 5 Benefits That May Surprise You 的推薦與評價
Are you looking to purchase land for hunting, fishing or camping?Do you already own recreational land ?While you may be taking full advantage ... ... <看更多>