[給 18 歲的你]
祝願槍傷嘅同學，早日康復。
Medium friend link (唔使戶口都睇到):
https://medium.com/…/%E7%B5%A6-18-%E6%AD%B2%E7%9A%84%E4%BD%…
//
同學你好：
我係賴叔，你唔識我，但我同全香港 700 萬人一樣，認識你。
18 歲，係一個咩概念？由我呢個，理論上夠秤做你老豆嘅阿叔口中講出嚟，或者你會覺得有啲滑稽。
18 歲嗰年，我讀緊中七。係，當年香港仲行緊三四三學制，有會考同 A-Level 。當時嘅校園生活，不外乎上堂自修 (係，我唔多聽書嘅，自己讀，更加入腦) 、打波、喺學校捉下啲唔攝衫或者 Gel 頭、著黑襪嘅同學。好簡單。
呀，網上好似有人話， 18 歲先至讀中五，係個咩人？啲語氣，好輕蔑。我同你講，唔使擔心，學無前後，達者為先。我而家先至讀返一個我十幾年前應該讀嘅學位，遲咗啲，冇所謂嘅。
18 歲嗰年，我嘅課外活動就係談戀愛，遊天地。聽住陳奕迅嘅 "Shall we talk?" ，咀嚼林夕嘅歌詞，以為明白溝通、對話嘅意義。
18 歲嗰年，香港爆發「沙士」，非典型肺炎，死咗好多人，包括挺身救治病人嘅醫護人員。當年嘅高官楊永強，最終喺問責制之下，下台，絕少現身公眾場合，冇再指指點點。
18 歲嗰年，香港第一次出現大規模，講緊 50 萬人 (有說係 100 萬) 大遊行，為嘅係反對《基本法》 23 條立法。然後，政府一意孤行，直至商界代表辭任行政會議，力推立法嘅官員問責下台。葉劉淑儀捍衛唔到自己嘅掃把頭，而家轉咗髮型，依然冇捍衛香港人嘅自由。我相信你都知道。
18 歲嗰年，司徒華、劉慧卿等仍然被奉為民主鬥士，梁國雄仍然只係「四五行動」，即係每次示威都只得幾丁友嘅「雄仔」。冇所謂嘅「和理非」，因為根本冇「勇武」。香港當年，仍然美好，市民和平表達訴求，政府會讓步。我以為香港人贏咗，保住咗「一國兩制、高度自治」。
18 歲嗰年，手提電話最好玩嘅遊戲叫貪食蛇，上網速度好慢，下載一首歌嘅時間，夠淥一個杯麵。當年冇 Facebook 或者 Youtube ，有得玩 ICQ ，同朋友 group chat 已經覺得好過癮。唔好講話玩 Telegram 、上連登，諗都冇諗過。
18 歲嗰年，畢業之前，我喺學校壁報板上面寫咗一句說話，字體極醜：「我們無憾，因為我們存在過。」而家睇返，所謂存在，都不甚了了。所謂存在，都只係為咗小我，為咗自 high 而冇人睇過嘅畢業同學錄，其實都係過眼雲煙。
18 歲嗰年，要面對嘅強權，都只不過係出名好仆街嘅校長。我哋背住佢叫「何老狗」，但兜口兜面，咪又係叫聲「何校長」，鞠躬握手，懦弱到不得了。
18 歲嗰年，警務處處長名叫曾蔭培。冇錯，係香港第二任特首曾蔭權嘅細佬。你未必記得佢，因為佢冇咩名言，唔會好似某啲繼任人咁鬼話連篇、擘大眼講大話。
18 歲嗰年，我已經知道有個仆街叫梁振英，背景深紅過豬紅。後來佢講過好多嘢，例如要武力鎮壓示威，最終一一實現。冇實現嘅，得兩樣：係佢「 N 年都唔選」，以及佢會「開誠佈公」。
如果你知道梁振英向你嘅學校施壓，敦促校方革除你嘅學籍，我相信，你唔會害怕。亦請你唔好驚，香港大把人撐你。唔使理會嗰個連任唔到，家下掛住個虛銜，終日喺網上製造白色恐怖嘅人渣。
同學，希望你早日康復，可以同你嘅好朋友一同齊上齊落。香港人，一個都不能少。你嘅人生先至啱啱開始，承受過嘅傷害，只會令你更堅強、更堅壯。
賴叔敬上
2019.10.03
圖片來源： https://www.gettyimages.hk/…/this-picture-taken…/1173019038…
shall we talk 背景 在 您真的聽懂《Shall We Talk》嗎？解讀林夕愛的哲學 - YouTube 的推薦與評價
《趙氏讀書生活》，一個歷史學者的視頻，分享學術、社會、政治經濟觀察請以每月5元支持收費平台：https://www.patreon.com/Chiusreading同步上 ... ... <看更多>
相關內容