Samsung Galaxy Note20 Ultra、Note20 詳細介紹！galaxy note20 ultra 開箱
Samsung三星喺香港時間2020年8月5日晚上，於網上發佈咗今年嘅Galaxy Note 20 系列手機，即刻同大家睇吓！
Note20 系列包括咗 Note 20 同埋 Note 20 Ultra兩部手機。Note 20 Ultra繼續上一代 Note 10 嘅方角同埋兩邊曲屏設計，而Note 20 就一改變成圓角位同埋全平面屏幕設計，外表睇落兩部機並唔係太似。Note20 同埋 Note20 Ultra 分別採用咗6.7寸同埋6.9寸嘅Dynamic AMOLED 2x Infinity-O屏幕，內置高通Snapdragon 865 Plus處理器，分別內置8GB同埋12GB嘅記憶體，硬件喺數據上絕對無得輸。
Note 20 Ultra 嘅 Dynamic AMOLED 2X 屏幕支援 120Hz嘅更新率，解像度高達3088 x 1440，Samsung形容對比其他手機分別之大，睇慣咗就返唔到轉頭。比同系S20 Ultra 要犧牲解像度換取高更新率，Note 20 Ultra可以按內容自行調整更新率，一來起解像度同埋更新咗之間取得平衡，二來亦都可以達到慳電嘅效果。Note20 嘅屏幕就只有 2400 x 1080，亦只支援 60Hz 嘅更新率。
S Pen 係 Samsung Note系列嘅精髓，Note 20 系列望一步改善S Pen嘅設計，配合 Note20 Ultra嘅120Hz更新率以及屏幕嘅觸控反應，寫字效果貼近真實嘅體驗，亦加入咗更多以SPen遙距操控嘅手勢，㩒住SPen嘅按鈕，無論播歌定做簡報，都操作自如㗎！
相機方面，雖然鏡頭數量唔及S20 Ultra多，但其真影相嘅效果絕對唔洗懷疑。Note20 同埋 Note20 Ultra都配備1000萬像素嘅前置開孔自拍鏡頭，後置主鏡方面，Galaxy Note20 Ultra 配備1億800萬像素嘅廣角主鏡、1200萬像素嘅超廣角鏡同埋1200萬像素嘅遠攝鏡共三個鏡頭，支援5倍光學變焦同埋50倍Space Zoom，配合雷射自動對焦感應，對焦同影相都更快更準。Galaxy Note20就配置咗1200萬像素嘅廣角、1200萬像素嘅超廣角同埋6400萬像素嘅遠攝鏡頭，支援3倍混合式光學變焦同埋30倍超高解像度變焦，影相出嚟嘅效果亦唔失禮。
三星除咗喺相機軟件方面，保留咗一貫嘅Night Mode同埋好多其他實用嘅功能之外，今次Samsung亦喺拍片方面落足功夫。除咗支援8K拍攝之外，亦支援咪高峰操控，隨時支援選擇以手機嘅前或者後嘅咪收音，更加可以選擇以藍牙耳機收音拍片，唔洗再另配藍牙咪或者有線咪，更支援調整景深，用手機拍片都可以有單反相機嘅焦距效果！
網絡連接方面，Note20 系列支援5G以及Wi-Fi 6，4G規格亦都支援最高2Gbps下載嘅Cat20，配合頂級嘅硬件配置，速度絕對冇得輸！官方網頁表示Note20系列支援ESim，不過會唔會好似S20系列咁，喺香港推出嘅時候無咗呢個功能，就要睇香港嘅三星點處理喇！
電量方面，Note20 Ultra 同埋 Note20 分別配備4500mAh同埋4300mAh嘅電量，足夠一日使用，透過快充更加可以喺半個鐘入面幫手機增加50%嘅電量，唔記得叉電都唔再係大問題啦！
今次Samsung亦強調喺新常態下，手機同日常工作以及生活嘅整合，好似Notes App嘅跨平台雲端處理同埋同Microsoft嘅多平合整合咁，將來我哋會繼續同大家詳細介紹㗎！
顏色方面，Note20 Ultra 同埋 Note20 都有推出今年主打嘅霧光銅色，另外，Note20 Ultra就有亮光黑同亮光白共三款顏色，而Note20 就另外有霧光綠同霧光灰嘅顏色選擇。Note20系列嘅內存由128GB起跳，而Note20 Ultra將提供最高512GB嘅內存空間。
Note20系列由2020年8月6日起接受預訂，8月21日會喺部份市場開售。Note20 同埋 Note20 Ultra嘅開售價分別係US$999同埋 US$1299。
#note20ultra #note20 #galaxynote20ultra
