【《#婚姻故事》（Marriage Story）：愛你變成恨你，再見可成朋友嗎？】
#晞Netflix記事
#到底可以有幾好睇系列
聽到好多朋友話好悶好唔得，所以一直冇興致睇，見佢咁多提名開嚟睇，個人就覺得一啲都唔悶，仲好得！
雖然叫就叫《婚姻故事》，但絕對唔係粉飾太平、Happily ever after愛情童話，真正嘅愛情就只有開場一小部份，成套戲都係講對夫婦點處理離婚，累鬥累。
結婚果時好多問題冇好好處理、對方仲喺身邊果時冇好好溝通，明明雙方都係對的人、明明大家心底裡仲係有愛、仲係唔捨得對方，但有啲嘢做咗就返唔到轉頭、講咗就只會做成永久傷害。誤會冇去好好解決，最終對簿工堂，唔應該講嘅都講埋出口，正宗係，「抹面」。
或者我從來唔係樂觀嘅人，感情路上都見過太多陰暗面，我會睇愛情喜劇，但我唔會超投入果種愛情觀念，反而更鍾意呢一類寫實嘅作品。《婚姻故事》拍一段愛情殘酷物語，唔會流於「金句式」或者過度戲劇化，就係用最平實最貼地、寫實到你心痛嘅拍法，講呢個殘酷故事，效果一啲都唔悶（或者講睇你投唔投入到）仲覺得好有戲味。
兩位主角火花四濺，Scarlett Johansson唔係遇上Renée Zellweger，分分鐘可以成為影后大熱人選，而Adam Driver慢慢蘊釀到爆發嘅情感，睇到想隔住個mon俾個擁抱佢，同佢講句：「會過去的。」原來高潮一鏡直落場爆發戲，足足拍咗50次，兩位演員嘅演出，精彩到不得了。
雖然套戲建基於編劇兼導演Noah Baumbach嘅真實故事，都好明顯用咗好多男性視點，但鍾意個視點不時都會轉返去女方身上，而且都仲有柔情一面，唔係一味妖魔化女性，呢個Balance做得好好。無論係「大閘」果個鏡頭，定還是女主角獨白回憶，都好細膩。
其實Adam Driver之前都有過套「恐怖婚姻故事」，可能大家冇乜留意，《幸福魔天倫》都係好精彩嘅作品，可惜當時上映反應一般。
兩套戲種可能好難對比，但係兩套「Netflix頒獎禮之途」作品，我鍾意《婚姻故事》多過《愛爾蘭人》。
睇你用咩心態，如果你當愛情喜劇甚至倫理片睇，應該會覺得中伏，但係用比較寫實小品角度去細味，《婚姻故事》非常精彩，呢137分鐘，冇白花。
再見未必可成朋友，唔洗搞到抹面變仇人，已經足夠。
🌟第6屆「晞。觀影記事」讀者電影投選現已接受投票，請即參加：http://bit.ly/2SXmUva
‼最後機會‼小弟執筆之原創小說已賣剩最後一批，售完即止，請即訂購：http://bit.ly/2PKXYFA
【IG請follow】www.instagram.com/travelerwithmovie
