【龔成問答信箱】（Q16681-Q16700）
Q16681：
你好，老師，非常感謝你分享有關吸引力法則的方法，有少少疑問想請教一下你。
吸引力法則最困難地方係要真心相信自己所想的能實現，請問想像願望是否不能太離地呢？即例如我本身揾2萬一個月，諗到自己揾10萬一個月？距離太遠，會好難實現？
另外我需要好詳細去想像細節嗎？例如將來份工作返幾日，什麼類型等等？需要只想像正面的事？
請問每晚學你咁靜思或想像前，需怎樣清負能量？有時靜思可能會有好多不滿情緒。
感謝你
祝心想事成！
龔成老師：
世上沒有免費的午餐，你要有所付出，如果你現時收入$20000，你可以想象自己收入$10萬去進行吸引力法則，但你都要有心理準備，自己要有好大的付出，否則，太過誇張的目標，你心底根本不會相信。
所以，我會比較建議貼地少少的目標，例如$40000，你心底會認為較合理，同時你要付出時，都可以應付到。
不一定要有細節，要有目標，有方向。目標是最重要的，因為完成目標有好多方法。你要想象已完成目標，感受當中的美好。我建議你睇《秘密》《思考致富聖經》，都會對你訓練有好大幫助。
至於靜思的訓練，你要平靜心靈，將情緒因素盡力減少，如果出現一些負面情緒，就試下專注於自己的呼吸。慢慢平靜下來，初期可能要較長時間，但這會對你的情緒較好。
------------------------------------------------
Q16682：
你好老師，我最近留意一隻股票1297中國擎天軟件，我看見它每年業績的每股盈利不斷增長，但股價卻跌至7年低位。
我想知道如排除財務數據做假的情況，它現在4.16的市盈率豈不非常超值的投資？
我亦看見最近大股東及機構投資者紛紛增持其股票，我想知道此刻投資該股是否正確？謝謝！
龔成老師：
中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價是便宜的。
這股的其中風險，就是規模較細，以及行業存有風險。
現價其實有投資價值，但就唔建議太過大注。
------------------------------------------------
Q16683：
老師，我真心好灰心，我係澳門人，現在澳門樓市便宜咗少少，但係我買不起、慘痛經歷人生。本人32歲、買樓都係要買優質樓、謝謝你先龔成。
龔成老師：
你32歲，仍是好年輕，只要有耐性，要買到樓不是問題。你從基本功做起，儲蓄、投資，穩步增值，我知股市增長唔快，但有D野無得急，太心急去賺快錢，反而會出現虧損。
唔好失去希望，你已經行緊去終點，保持一步步行就得，這刻努力做好儲蓄、投資、增加知識，滾存更多財富買樓，這是可以做到，只要儲蓄加適當投資就得，當然你都要有投資知識。
比起大環境，你要調整好你的心態，保持正面，我之前拍左條片講《秘密》，如果你負面心態，就會有負面結果，如果你心態正面，就會有不一樣的結果！
------------------------------------------------
Q16684：
龔sir , 已翻看你在大富翁內提及的西環物業部分，看完有以下問題：
1.書中提及的膠椅洲計劃，因明日大嶼受到多方抨擊，看來會一直膠著，請問有需要重新評估西環投資價值嗎？
2.看過多過西環二手樓盤（450-600萬）後，發現近3年升幅其實欠奉，冇乜升跌，投資的是否不應選此區？
3.就算扣除一萬至萬二租金後，每月也要再供起碼9千至萬三，完全形成不了現金流，是否不應該買？
麻煩老師指點
龔成老師：
1）相信明日大嶼的變數好多，這點我認同，計劃一定比預期更多變化，可能規模較細，或更遲，甚至搞唔成。不過，西環始終有本身的質素，因此不用擔心，你可以視明日大嶼是一個加分位，不是核心投資因素。
2）其實之前自從港鐵通車後，佢的升幅有一段時間跑贏大市，反而到近年，佢升幅相對較少。不過，我地一定從長遠分析，這區近中環，供應有限，現時會去翻與大市同步水平，因此投資仍是有價值。
3）從投資價值角度分析，只是一般，但現時香港整體的租金回報率不高，反映投資價值，並不是好吸引，投資其他市場會較好。但在自住的角度，仍有購買的價值。
所以，是否投資，要睇翻你本身的財富情況，這刻的確不是最好時機，但樓市由於自住需求大，因此好難大跌。
------------------------------------------------
Q16685：
老師，我想講其實你真係每日都做緊好事、啟發好多人。
早前行SOGO Thankful Week, 如果以前我已經買咗五、六千元無謂嘢，但今日我諗五、六千元差不多可以買一手823，於是我竟然完全無買嘢！
真係好多謝你，如果我早啲識你就好了。
龔成老師：
可以幫到你實在太好，我希望教大家，正確的理財知識，明白「先投資，後享受」，理財是一個長期過程，你要保持進行，同時保持進步！
------------------------------------------------
Q16686：
龔sir你好，我四十多歲，倆公婆都有做野，個仔讀緊大學。家庭月入四万幾。我有一事請教，想請你畀D意見我。
我在澳門有自住樓，7年前抱著揸磚頭好過揸現金嘅諗法，洗咗六十万人民幣係中山坦洲買咗一個住宅單位，因為冇任何裝修，就冇出租，每个月交管理費大概二佰蚊。
個單位現值一佰萬左右。之前本打算投入十万左右人仔，簡單裝修后出租，但考慮到出租也只能租到兩仟蚊左右一個月，就放棄咗呢个打算，一直空置到依家。
現在諗返頗覺浪費，后悔當初應該收樓之後就即刻裝修出租。
想請問龔sir，我大陸層樓已空置咗7年有多，而我自己打算十五年後退休，現階段我應該裝修出租還是出售后用嗰筆錢投入股票市場？
至于股票我目前有
1000股9988,平均价$186
1000股700,平均价$410
5000股883,平均价7.1
謝謝龔sir
龔成老師：
你應該裝修，因為你現時無法為物業產生任何現金流，但如果你投資$10萬，就可以每月有$2000，即是一年有$24000。
某程度，可以話這$10萬的投資，每年回報為24%，又或4年就能收回成本，之後就能有持續的現金流，因此，值得花錢裝修。
你可以成為日後，退休時，持續有現金流的資產項。
至於目前的股票，基本上都不差的，可以持有，中海油（0883）不應持有太多，但當過多5-10年，你就應該投資較多收息類股票。
------------------------------------------------
Q16687：
龔成老師，你好！我想詢問一下你有關我的投資策略與安排。
我25歲，剛畢業工作，人工約三萬一個月，暫時儲蓄有約10萬。
我想投資一下股票，所以之前買了你的書，以下是我的問題：
1. 你在書中介紹了金沙，比亞迪，六福，領展和福壽園等股票。現時我開始以月供和分注買入。想問一下我應該把金額集中在一兩隻股票上還是平均投資較好？
2.另外，現時油價下跌對電動車如比亞迪的發展會否產生長期影響？
3. 最後是我想買你所著的《80萬2百萬富翁》不過好像書局網上都買不到，想問那裏可以買到？
謝謝！期待你的回覆！
龔成老師：
1）你可以分間到3-5隻股票，如果日後財富金額更多（如去到$100萬，就可以分到10隻股票）。
你可以利用月供的方法，以盈富（2800）為核心，然後再加上其他優質股，上述的都可以。
2）正面因素會略略減，不過，中國政府在政策上，長遠希望發展電動車，因此行業仍是正面，比起油價因素，本身的技術、配套，會更加是關鍵因素。
3）聽出版社講，應該好多書店都賣斷貨，出版社話會在1個月左右加印，你遲少少再去書店問下。
------------------------------------------------
Q16688：
老師，我MPF户口，年初至今已蝕3萬幾，應止蝕轉番低風險嗎？
龔成老師：
要睇翻你的年齡情況，如果你不是要在5年內退休，其實仍有時間守，可以等個市上翻D，耐心睇位先轉到其他組合。
如果你年輕，就更加不用理會，因為強積金中短期上落好正常，不同擔心，長線投資就得。
------------------------------------------------
Q16689：
老師你好。本人33歲，每月月入八萬，可儲四萬。現持現金約80萬，月供基金約30萬（已停供），月供股票40萬，一手手的股票有約10萬。
月供股票的分布如下：
盈富@2000
港鐵 @2000
領展 @2000
恒基 @2000
煤氣 @2000
港交所 @2000
友邦 @2000
中國平安 @2000
恒生 @2000
比亞迪@2000
騰訊@2000
每月會用$22,000月供股票，即每月儲起$18,000。
1. 老師，請問以上月供組合會否太散？如果會的話，你會建議刪減那些股票呢？
2. 我是由18年6月開始供的，已供約2年。請問月供股票的操作是否要月供幾年，然後就要停供讓它自我滾存？
我好像從你的post 看過要月供 約3年後就停供，由它自我滾存5, 6年。但我不確定所以想問問你。
謝謝老師抽空回答。
龔成老師：
1）的確是有點散，你應該集中去供約5-7隻股票。
盈富（2800）的金額可以增加。而有些同類的，可以減，例如減煤氣（0003）保留恆基（0012），保留平安（2318）減友邦（1299）。至於其他，都是好優質的股，你可以自己衡量較睇好那一隻而決定留。
2）首先，月供一定是長期的，3-5年是基本。
如果企業有質素，保持發展，一直月供其實無問題。但如果去到一些位，佢的增長力減少左，或你認為持貨已夠，就可以轉供另一隻。
另外，如果你人生階段改變，例如之前想增值，過多年後想收息，都可以轉其他類別的股。
------------------------------------------------
Q16690：
成哥，啲人成日話邊隻邊隻有潛力，究竟如何定義？就好似1829中國機械工程，有好幾個fd都睇好叫我買，但聽你講過自己唔熟悉唔好買。
另一方面，我都想問下你點睇隻中國機械工程？
唔該唒成哥
龔成老師：
自己認識是重要的，好多人輸錢，就是買了一D唔識，一知半解的股票。
潛力股的真正定義，就是有潛力的企業，企業這刻未必好大間，但有相當的發展空間，企業價值在長遠會有明顯增長，這就會帶動股價倍計上升，這就是典型的潛力股。
中國機械工程（1829）質素算是中等，這是考慮佢業務的獨特性，以及財務數據上的反映，生意的增長力不強，規模不大。
但現價唔貴加上派息，都是吸引的地方，可能是這因素，令到有些人會視這股有潛力，睇翻整體的情況，由於股價唔貴，潛力度不是沒有的，但本質唔算強，因此，如投資，小注不是不可。
------------------------------------------------
Q16691：
請問啲儲蓄保險買唔買得過？
我平時都已經好忙，唔想日日夜夜顧住啲股票同埋研究
聽啲Agent講話儲蓄保險年增長有4-6%，好似幾吸引
龔成老師：
我地進行理財，應該建立一個「攻守兼備」的組合。
這類儲蓄保險，是較為防守性的項目，在理財中都可以投資，不過，你不應太集中投資這些產品，因為這類產品進攻力弱，你要同時投資其他較有進攻力的產品。
我會建議你部分資金投資儲蓄保險，同時，部分資金以「月供股票」的模式，累積優質股，如果你不懂選股，就簡單投資盈富基金（2800）。我相信這策略會比較適合你。
------------------------------------------------
Q16692：
1585（因為佢將會內地科創板上市，有望升到20），819（近排疫情下升得好勁），902 各買左1萬股，老師，你覺得呢幾隻可以長放嗎，在什麼價位沽出會比較好呢？
龔成老師：
科創板上市，是一些加分位，但我地最重要是睇翻企業的本質，這才是決定佢將來價值的因素。
雅迪控股（1585）的確有增長力，但現價唔算平，加上過往股價甚為波動，而預期上到幾多錢，這點無人知的。只可以話現價的值博率，中等，如投資唔建議太大注。
天能動力（0819）本質不差的，就算近期升了一倍，仍未到貴的水平，你持有可以的，或者你可以用「升一倍，放一半」的策略進行，但這股不建議太大注。
華能國際電力股份（0902）質素中等，不算差，但增長力不強，持有價值算是中等。
------------------------------------------------
Q16693：
老師
媽媽退休有100萬儲蓄
想每個穩定收息
可以如何運用資金？
有冇可能每個月有4至5千蚊收入？做定期加買收息股？
請指教
龔成老師：
你可以將這$100萬，分成5部分。
第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息
（你可睇下《50穩健收息股》當中仲有好多）。
你平衡的投資這些股，除了可以得到穩健的收息收，同時可有效的分散風險。
第二，投資債券，你可以選擇A評級的債券，年期較長都可以，但利息卻不高。你可以到銀行問問。
第三，投資年金，你可以睇睇，這是適合你們的產品，零風險，可以有穩定回報。
第四，你亦可投資銀行低風險類的產品，你可自行到銀行了解下，總之是「低風險，持續現金流」的。
第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。
你可以將$100萬資金，平衡地分配在上述的項目上，對你來說是最好平衡風險，同時有穩定的現金流。
有些產品，可能入場費較高，如果無法分配，最簡單的方法，是分配在「收息股」及「現金」。
------------------------------------------------
Q16694：
老師，有個問題諗左成個月想問下你意見，有見最近股市有大跌勢頭，想準備一下現金睇下有冇機會買平貨。我想問銀行借錢，但因為我每個月有月供股票，所以有以下問題：
1. 保持原本月供金額再加上每月固定金額還款，但就唔會另外儲到現金，計過數都負擔到但就會好拮据咁過幾年
2. 減少月供股票金額，令月供金額加上每月還款總數等於或只略為高於和之前月供額一樣,但係咁就雖然一手手儲多左，但好似月供又少返,會唔會冇咩意義
1 & 2應該點樣選擇？
另外想請教因為資金少，如果真係好想盡力把握大跌市，老師你係唔係都仲建議最最少保留六個月生活資金唔好投資，定係可以減少到幾多？
當年老師盡力掃貨果陣都有留生活資金？仲有以之前幾次歷史，大跌市大約會持續幾耐到？恢復期又會大約幾耐？
感謝！！
龔成老師：
銀行借錢投資，有利有弊，你要明白當中的風險先可以進行，同時，要確保「有正回報」先去做。
如果要在上述選擇，（1）會比較平衡的，始終大市波動，要小心運用資金。
至於備用現金方面，一般會預留3-6個月，這是基本的要求，當然每個人情況不用。
其實每一次的大跌市，都是不同的，例如2000年科網股爆破後，跌到2003年先見底，到了2008年，下跌一年後已大幅反彈，所以根本無絕對的準則。
------------------------------------------------
Q16695：
成哥 我25歲 已經睇左你既自由行 3百萬富翁 獲益良多 亦都明白前期資金幾重要以及以家有左計畫之後成個人都變得更加正面 所以想再請教多你一個問題
1.黎緊我都月供股票1萬 另外再儲5-6千現金 想請問我依家直接定好月供組合會唔會比大比率供盈富更好？
我心目中既組合係3千盈富 3千比亞迪 3千金沙 1千收息股（港鐵或其他）
而現金儲到6個月生活費緊急流動後再用黎加大投入 或睇好入市再買貨 請問呢個方向及組合好唔好
2. 月供1成收息股果到其實我唔肯定好唔好 定係你認為張果1成抽返出黎放返係盈富會更加好？
龔成老師：
1）現時大市在合理區中下部，建議你保持月供先，但如果大市進一步向下，你就可以動用資金，以一手手模式去入貨。
你現時的選股，無問題，可以進行，或者可以加大少少盈富（2800）的金額。
這刻，保持「一邊月供，一邊儲現金」。
2）你25歲，收息股可以唔供，但如果你本身是低風險人士，或對股票的認識不多，就可以投資少少收息股。
------------------------------------------------
Q16696：
老師，我想同你分享個好消息。上完你的堂之後，用你教的方法篩選出一隻股票(澳優)！
向你請教時亦投資了兩手(9.8入)，直至近期先無聊看一看它的股價(16)，這是60%升幅（因為我已學左你，唔會成日睇股價）！
當然我是會聽你的說話，(忍住誘惑地)不會就這様售出。
先說一句多謝你，期望下次向你報告第二/三...隻，然後就是我的第一個一百萬。
不過我還有一個問題想龔SIR幫我解決。
[就是早知入多少少，明明仲有不少可動用的現金。]我知這個想法十分危險，好可能導致失誤，我想請教你有冇少少心理輔導可以指教我。謝謝
龔成老師：
太好了！你已掌握了價值投資法，這不是我發明，而是所有投資最賺錢的人，都會用這方法，而我地都是用這方法，因此，長遠會賺到理想的財富！
期望你再到更多優質股！
至於你的投資心態，這反映仍有進步的空間，投資好講理性，你要建立一個平衡的組合，各股票投資「適合」的數，如果當時適合，就無問題。
同時，你唔不需要睇翻轉頭，無意義的。
這些心理的情況，會在將來經常出現，這都是學習之一，我已經令到自己「程式化」，所以好理性。
------------------------------------------------
Q16697：
老師你好，爸爸幾年前臨走之時，過咗一些股票比我同佢嘅買入價。我一路都冇理會，只係每年派息就直接傳比阿媽。
但係呢幾年增加左自己嘅財務知識，同睇你嘅文章同書，覺得應該要有啲改變。不過好多垃圾股已經跌咗超過9成，甚至停咗牌，所以有啲不知所措，現在想請教老師可否俾啲意見。謝
7 - 10000股 $2.4
202 - 10000股 $1
309 - 20000股 $2.2
340 - 100000 股 $2.03
857 - 30000 股 $9.6
959 - 6000 股 $7
1051 - 30000 股 $6.5
1288 - 100000 股 $4.07
3886 - 25000 股 $4.34
3988 - 100000 股 $2.9
6136 - 20000 股 $4.36
3886 停咗牌超過一年，係咪即係冇晒？又有冇嘢可以做呢？ Thank you
龔成老師：
你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
相反，如果企業無質素，長期持有只會浪費了你的資金增長，因為你轉到另一企業增長會更加好。
香港金融集團（0007）質素中等，小注持有無都可。
潤中國際控股（0202）質素向下，賣出較好。
新華通訊頻媒（0309）質素向下，賣出較好。
潼關黃金（0340）質素向下，賣出較好。
中石油（0857），有質素，但不是最高之列，可以守。
世紀娛樂國際（0959）質素向下，賣出較好。
國際資源（1051）質素向下，賣出較好。
農業銀行（1288）有質素，持有無問題。
康健國際醫療（3886）停牌，暫時只有等，無野可以做到。
中行（3988）有質素，持有無問題。
康達環保（6136）質素一般，勉強可守住先。
------------------------------------------------
Q16698：
老師，我現在有30多萬現金，打算存放2年後備用，請問那一隻股份潛力教高，如分段入市，應該分多少期？謝謝
龔成老師：
如果投資期為2年，這只算一個中線投資，未到長線投資。由於投資企業，一般都要較長時間才能增值，因此你不能投資太進取的企業，只能投資平穩型，風險較少的企業。
你可以考慮盈富（2800）、恆基（0012）、中銀（2388）、港鐵（0066）、粵海（0270）、港交所（0388）、希慎（0014）、太古地產（1972）等，你可以了解下這些股票，然後從中選股。
你可以保留$15萬，現時用$15萬，在3個月內分注投資。餘下的$15萬，如果出現大跌市才動用。
當然，如果你會以更長時間投資，就可以投資其他，所以要睇翻你的具體情況。
------------------------------------------------
Q16699：
老師你好！我一直有看你解答大家問題，買了你幾本書籍，努力之下，終於儲到一些現金。
我希望自己擁有一間兩房樓作家庭自住。
疫情下，現看樓價不停上升，還是負擔不起買樓支出。
我應該繼續投資股票，還是買一間細價樓然後放租，再買一間大單位？還是其他投資方法？
今年33歲，現金連外幣共100萬，股票40萬
每月收入： $30,000
每月支出： $9，000
月供股票： $11，000
組合如下
$1500 @ 0003中華煤氣
$2000 @ 0823 領展
$1500 @1038 長江
$2000 @2800 盈富基金
$2000 @1211 比亞迪
$2000@ 0066 MTR
想問問老師意見， 謝謝！
龔成老師：
如果長遠有自住需要，你先考慮細單位是可以的。
香港經濟轉弱，樓市有可能有影響，但一定不會跌得多，長遠仍會向上。你已經可以睇下樓，如果找到合適的樓，已經可以考慮。
投資物業，最重要的原則是「供得起」，這點比分析樓價升跌更重要。因為就算不幸買入後樓價跌，只要你供得起，其實就無問題。
至於股票方面，都是有質素的，整體是正面。
------------------------------------------------
Q16700：
你好，老師 我而加23歲 覺得只靠儲錢太慢 打算開始接觸股票投資 以下有2個問題想問
1. 我而加有儲蓄三萬左右 想買入 (1手長實/1-2手盈富）請問買入邊隻會好啲? 定係老師你會有其他建議? 而且大約幾錢先至抵買 可以入市?
2. 我每個月會儲1萬 至 1萬5千 我想全部攞去投資 我暫時嘅目標係想5年內儲到100萬 請問有冇可能做到? 老師有咩建議?
（但係咪最好都係月供股票? 因為其實我比較傾向儲到一筆錢 一手一手咁買股票)Thank！
龔成老師：
1）盈富（2800）會較好，因為佢是一個組合，你可以有效減少單一股票的風險，建立平衡的組合。你可以這刻動用一半資金入，餘下等跌先再入。
2）你可以利用月供股票進行（如果不想月供，就自行分注投資）。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000
。
你可以考慮盈富（2800）$3000。
另外再加2隻（每隻$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。
如果你不懂股，就集中供盈富$7000。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
佰研歷史股價 在 佰研、位速、建達再創歷史新高！結束了嗎？還是會再一倍？下 ... 的推薦與評價
元宇宙+低軌道衛星+電動車即將爆發的超強飆股 股價 低到... 1 September jam 1:00 PG · 297 Paparan. 簡宏裕 ... ... <看更多>