今日想分享一下最近內心嘅掙扎……
原本諗住將呢件事收埋就算，但諗諗下其實喺呢個page，無論係我當初去澳洲公司做嘢、到失業、到我爸爸中風、到而家得得戚戚接到啲廣告謀生，一直以嚟我都係有咩就講咩，冇咩需要遮掩，或者可能係我本身冇咩嘢特別叻，唯一能夠做得嘅就係「真實」，不嬲大家都知道我一直以嚟係點成長過來……
是咁的，話說前嗰排有間喺澳洲、香港人開嘅學校諗住搵我賣廣告，主要係宣傳叫人去讀，順勢移埋民。如果有留意近大半年無論加拿大、英國或者澳洲，都有推出為香港人而設嘅簽證，而澳洲喺過去一個月都推出咗一個較為容易嘅升學移民計劃（呢個唔多講，有興趣自己去search）……
呢間學校都頗為出名，原本只係傾幫佢賣廣告，但同負責人傾傾下，其實我都好有興趣去讀，甚至移民，仲可以sponsor我添！
首先大家都知之前我係做澳洲航空公司，都做得非常開心，過去三年喺維珍嘅生活，令我愛上澳洲呢個地方，同埋識咗好多喺澳洲嘅朋友，至今我都仍然對澳洲念念不忘。
第二係回想起我過去嘅工作經驗，我曾經喺英國廣告公司實習過，畢業之後亦都喺外國或本地公司返過工，呢啲工作經驗都比我知道自己expressive嘅性格都比較適合喺外國公司做嘢，較易同外國公司打成一片，香港公司反而成日得罪人……加上本身英文都OK（ielts 7.5分），溝通起上嚟都唔算有大問題，甚至比起本地公司更容易融入、適應……
最後就係其實屋企人都支持我去，慶幸係我阿媽係同我同顏色，都一樣覺得香港……（下刪一萬字）
就係咁，基於以上種種原因，原本我都決定好、把心一劃就去澳洲了……
但喺我決定咗之後，無那那呢幾個月，自從喺南豐紗廠搞完主題市集之後，真係越嚟越多品牌搵我合作，仲開始傾2021年下半年甚至2021年頭嘅大projects……可能大家都見到我呢個page，近來都有唔少廣告……
於是，我就開始卻步了……卻步嘅原因並唔係因為錢，大家可能見我好似多咗機會，但其實努力畫埋畫埋一個月都係同之前做空少差唔多人工，仲辛苦咗n倍添……卻步嘅原因係，如果要澳洲讀書，就要去讀一科可能係自己完全冇興趣、完全唔關事嘅科，去滿足移民嘅職業清單；或者就算去讀返一科關事嘅科，可能我都會失去咗喺香港嘅機會……
睇開呢個page都知，喺呢個page我成日講追夢追夢，而我嘅夢想不嬲都係成為一個少女系嘅插畫家，曾經都出過幾本繪本作品，直到上年辭職之後反而多咗機會、多咗人認識……
我會諗，去到澳洲之後，我究竟做咩呢？可能會做幼稚園老師、做廚師，一份完全唔關事嘅工……但係我嘅夢想可能就會因為咁樣而終止……到時，就再唔會有乜乜主題市集、乜乜書展……
所以，最後我就同嗰間學校say咗No了……
唔去其實仲有一個原因係，我真係好唔捨得我隻貓，我一諗起要丟低佢已經想喊喇……有人同我講，你可以帶埋勿演一齊去。其實係可以嘅，不過我聽過好多故事係隻貓搭完飛機，再去檢疫，未捱到返新屋已經瓜咗，同埋其實自家父中風之後，我屋企就得返我兩母子，如果去我都想留返隻貓陪阿媽……
Any肥，而家決定咗應該唔去啦……有人可能會覺得，香港呢個地方，仲適合追夢嗎？
其實我都唔知……我已經幻想唔到未來會變成點，或者第日我會後悔，冇好好把握呢個機會，走，離開呢個地方……
但至少而家，我好似都仲做緊自己鍾意做嘅嘢，我仲係好鍾意創作、好鍾意畫畫，仍然有好多人畀機會我，我唔想就咁樣就放棄晒香港嘅一切呢……
同埋，我畫嘅嘢係講廣東話，我係喺香港出道嘅本地插畫家，香港嘅書局會見到小弟嘅書；呢個地方，無論變成點都好，都好似係我創作嘅根……
最後，多謝你繼續睇我、Like我，支持我、嚟我嘅市集、買我啲嘢……
無論香港變成點，仲有一個小伙子仍然繼續堅持著……
2月年宵見，嘻嘻。
澳洲移民職業清單2021 在 AMEC 澳洲留學網路電台- 🔴 2020/2021 職業清單🧾出爐！ ... 的推薦與評價
2020/2021 職業清單 出爐！ #澳洲移民#職業清單. ... <看更多>