《作者，作為心靈雞，心靈真係好空，好虛...》
(真係比自己嘅記憶力嚇親，我好似有老人痴呆咁。)
岩先我喺fb 見到出版社老闆share 左一個「出一點」眾籌出版社幫作者出書嘅新聞，話呢間「出一點」出版社收左眾籌嘅錢，冇比版稅D 作者，冇同作者申請書籍註冊，冇問過D 作者，就將出版左嘅書，放上第三方平台轉售，而且更有讀者喺「出一點」網站比左錢支持眾籌，最後冇收到書，作者同讀者都成為受害者。
見到呢單新聞，好有興趣follow 下，然後我一search 「出一點」，發現我竟然search 到自己兩年前寫嘅一篇文，評論「出一點」呢間出版社。最正係當年有人留言話我，唔應該criticize 一間有理想嘅新公司。
事發兩年有多，對於呢間以「幫作者實現夢想，唔打算賺錢」嘅眾籌出版社，最後以騙局作結... um… 呢件事真係醜陋過性交轉運...
有人話，呢個年頭做作者同做雞冇分別，我覺得呢個講法好錯...作者係慘過做雞
如果叫雞唔比錢，係會比世界鄙視，雞係得到社會聲援。你做作者，讀者唔出錢買書，出版社唔比版稅，好多人會同你講「你為夢想寫作，係唔應該諗住收到錢架」...
書係精神食糧，心靈雞...湯，咁我地一班作者，作為心靈雞，挖空左思慧，出賣自己嘅情感換錢，提供左心靈雞服務，再收唔到錢... 心靈真係好空，好虛...
最正係，你打劫都去銀行搵有錢人啦，我地班作者，作為社會心靈雞，低下階層嘅地庫，有咩錢比人呃，咩係乞兒兜拿飯食，咪呢D 囉。
尋日好多人share 一篇文《你買書，係為左交租畀地產商》...
篇文係一間crowdfunding 文創平台， 出一點 Chapter One寫嘅，篇文有幾個重點：
1. 一本書嘅錢，作者只會收到10%，書局有50%，出版社有40%。
2. 讀者買書，大部份係去左地產商度，因為書店租金貴。
3. 作者收入少，所以佢地只可以業餘寫作。
4. 大部份嘅錢都去左地產商個度，出版社喺出書，培育新作者，推唔同類型書嘅時候，有好多商業考慮。
5. 香港愈來愈少書店，書嘅類型亦愈來愈窄。
6. 出一點唔想做大企業，想做小店，無商業同政治考慮。
篇文一出，其中一位出版社嘅朋友就message 我...
朋友指出《你買書，係為左交租畀地產商》篇文及圖表，收入百分比並唔合理，出版社同書店無圖表指出賺咁多，出一點彷彿扯左書店落水，屈書店賺好多。
※※※※※※※※※※※
睇完篇文，我有好多想法...
(出一點以「為別人成就出書夢」嘅出發點而籌組；我就從一個作者嘅出發點去睇成件事)
1. 「你買書，係為左交租畀地產商」，一本書大多數嘅收入去左租金，呢個係所有零售商品嘅現象，大家受到地產霸權迫害，呢點我認同，但唔需要為「書籍」及「文創」感到份外悲哀，因為我從不覺得書比其他商品「特別」高尚。
2. 點解愈來愈少人買書？如果你話因為租金貴，愈來愈少書店，所以愈來愈少人買書，我唔完全同意。呢個因素唔夠力，而且並唔直接。書店係令一書本曝光嘅一個渠道，唔係唯一一個渠道。點解愈來愈少人買書，愈來愈少書店？原因根本係愈來愈少人睇書。
大家誠實啲，對上一次買書，同睇哂成本書係幾時？我自爆，上一次已經係《一獄一世界》，你好想買書，就唔會因為無書店而唔買書。歸根究底，大家少左睇書，甚至唔睇書。睇fb post都覺得長篇大論，於是睇GIF，再唔係睇圖。資訊太多，大家無耐性。王迪詩都主打金句，做張圖，寫句sound bites 式金句，大家就瘋傳。
「大家都要搵食，邊有時間睇書」，我地無睇書嘅習慣，從來都唔係某某嘅忠實讀者，只追話題作。你去問啲 friends，鐘意睇咩書，佢會話近來「興」咩書，人人都睇達文西密碼，就去揭兩揭，人人都睇雷格，我又睇，香港地只有為左話題而睇書，無人為左睇書而睇書。
尋日好多人share 出一點呢篇文，話一定撐本地文創，唔想個世界只有middle 鄘神...
個世界只有middle 鄘神，只有情情塔塔，只有一類書，係唔係因為出版社見好賣所以只投資佢地？其一啦，其次係大家一邊又要鬧佢地無內涵，一邊又唔承認「大家都無內涵」。其實大家無咩資格睇唔起middle 鄘神，因為大家都係同一種人。如果話出版社考慮商業因素，書店考慮租金因素，搞到個世界只剩下middle 鄘神，我會話搞到書嘅種類窄呢件事，讀者有好大責任。
3. 出一點話唔想做大企業，想做小店...
任何一件文創，包括書，電影，音樂，公開要人買，必定要考慮商業因素。我地唔應該expect 一間「慈善機構的誕生」。大家點解一夜勁share出一點篇文，因為大家都用左同情心，同成就別人嘅夢想去睇成件事，大家點撐？用把口撐囉。「人人都有夢想，但大部份人都落空，有人無條件咁付出，好偉大呀」。大家去support一個作者，應該係出於喜愛，而唔係「做下好心」，創作人要嘅係賞識而非同情。
即使小店集資，依然要考慮商業因素...
出一點以集資，甚或任何其他方式成就出書人嘅夢想，都走唔甩要承擔出書印刷發行宣傳嘅成本，如果要作者賺取更大部份，迎合市場，有商業考慮，係非常合理嘅一件事。一版書2000本，唔可能每次「捱義氣」，求人買湊數，唔考慮商業因素，此事無可能長久，成件事無持續實踐性。
4. 就算出書為左賺錢，都絕不可恥...
我作為一個作者，覺得大家無需要神化出書呢件事，「出書係夢，唔賺錢都要做，好文青好藝術好型呀」。其實出書為左賺錢並唔可悲，亦唔可恥。我係想賺錢，同時實現作者夢，所以出書，我唔係姑姑，要開飯嘅。無需要描述到為左夢想，就必須放棄金錢，其實魚與熊掌可同時追求。
我覺得支持小店係啱，但我只會支持做得好嘅小店，而唔係「小店永遠是對的」。任何成就到市場多樣化嘅舉動，我都支持，但唔好盲撐，因為我地係製造緊大家喜愛嘅文創，而唔係製造緊希望工程。
最後係，出一點出發點當然好，但唔需要放棄商業考慮。一開始，已經講到「我只係為左夢，唔係為賺錢，無商業同政治考慮」，他日你有一絲嘅商業考慮，就要承受大眾翻舊帳，同批鬥架啦。
無圖gif 在 [趣圖] Gif圖- 看板joke - 批踢踢實業坊 的推薦與評價
相簿
1
2
3
4
5
6
7
8
9
10
11
12
--
※ 發信站: 批踢踢實業坊(ptt.cc), 來自: 101.10.107.6 (臺灣)
※ 文章網址: https://www.ptt.cc/bbs/joke/M.1683610558.A.C88.html
... <看更多>