寂寞如山（上）
寂寞。
寂寞，是一個人的歌。
我係一座山，千年嘅歲月，我經常唱歌，但一直都無聽眾。
其實我已經認命，聽講世上有好多座山，我應該有好多同類，
可惜山郁唔到，而我嘅位置，又見唔到另一座山。
我曾經以為，我嘅生命就係注定寂寞。
直到孫悟空出現，我曾經聽路過嘅雀鳥，講過佢嘅事跡，七十二變、闖龍宮奪定海神針......
我都幻想過佢係幾咁雄偉英武，但我從來無想像過，我哋第一次見面，會係咁猝不及防。
佛祖降伏孫悟空，將佢壓喺山下，即係我身下。
我冰冷嘅身體內，忽然間多咗一隻馬騮，一隻頹廢絕望嘅馬騮。
我都試過聊佢講嘢，但佢唔應我，我就繼續自己唱山歌。
孫悟空沉默咗一年，終於有一日，佢同我講：「你唱歌好難聽。」
我好不滿：「我係一座山，又唔係歌手，你有見過唱歌好聽嘅山咩？」
「至少唱得比你好，我細個住嘅地方，叫做花果山......」
孫悟空慢慢講出佢嘅經歷，由花果山美猴王，到練成七十二變，再做齊天大聖......
我聽得如痴如醉，千年以來，我第一次聽故仔，而唔係雀鳥飛過時零零碎碎嘅八卦。
孫悟空講咗三日三夜，然後停咗，我下意識問：「跟住呢？跟住點啊？」
孫悟空苦笑：「跟住，我就被壓咗喺呢度。」
我有啲愧疚：「我都無辦法放你出去。」
「唔關你事，係我技不如人！」孫悟空深深不忿。
我聆聽佢嘅憤怒，感受佢嘅不羈，佢都明白我嘅寂寞，我哋成為最好嘅朋友，或者講，唯一嘅朋友。
我好開心，但我知道，孫悟空唔開心。
佢嘅理想、佢嘅抱負，都需要更廣闊嘅天地。
山上貼住一張符紙，應該係制住孫悟空嘅關鍵，
我哀求路過嘅雀鳥幫手，但無論我哋點樣撕咬用力，都無辦法破壞張符紙。
孫悟空嘆氣：「或者，我命該如此，要永遠壓喺呢度啦。」
如是者，過咗五百年。
一個和尚經過，揭開張符紙，救出孫悟空，帶佢去西天取經。
我唔知西天喺邊，我只知道，孫悟空終於得到自由。
嗰一刻，我好開心，呢種開心甚至掩蓋咗「佢要離開我」嘅失落。
「加油！」山石隆隆滾下，係我為佢打氣嘅歡呼。
孫悟空笑住同我講：「阿山，我會返嚟㗎！」
孫悟空走咗，從此我又變番一座寂寞嘅山。
我寂寞，但我唔悶。
我每日最期待嘅事，就係聽路過嘅雀鳥，講孫悟空嘅威水戰績。
佢打妖怪、護唐僧、過咗九九八十一難，取到西經，被封為戰鬥勝佛。
佢贏咗，我感動到好似自己贏咗一樣。
但係，之後呢？
我滿心歡喜，以為孫悟空當日講嘅「我會返嚟」，係會返嚟住喺山上，同我永永遠遠喺埋一齊。
估唔到，佢只係返嚟同我傾吓計，然後就乘住筋斗雲走咗。
我望住孫悟空遠去嘅背影......唔係，係快到連背影都睇唔到，我個心好痛。
我知道佢有無限嘅精彩、有廣闊嘅天地，但我只有佢一個啊！
孫悟空無返嚟住，我寂寞，日復一日，寂寞變成嫉妒，嫉妒留喺佢身邊嘅人同物。
然後，嫉妒變成仇恨，我憎孫悟空，佢點解唔返嚟陪我？
我決定報復。
我郁唔到，我係一座山，我可以控制嘅只係我身上嘅嘢，包括山上嘅樹木、泥土，同埋......當年封印孫悟空嘅符紙。
當日唐僧揭開符紙後，符紙被風吹走，落喺山上嘅泥土中。
呢個係我唯一一樣，可以威脅到孫悟空嘅武器。
下集：http://bit.do/fnxS2
將專頁設定為「搶先看」/ "See first"，最新故仔馬上睇！
我老公養咗條蛇：https://goo.gl/ZroifF
我要學做孫悟空：http://bit.do/eNWtL
#短故 #短篇 #小說 #陳美濤 #廣東話 #粵語 #tomatochan #寂寞如山
花果山孫悟空 在 孫悟空成佛後為何不敢回花果山？因為他做了對不起眾猴的事？ 的推薦與評價
老儒知天下# 孫悟空 # 花果山 #西遊記. ... <看更多>