致好想我提吓佢嘅偽低調貴公子
我成日都講，我並非矢志要做旅遊記者的，而令我陰差陽錯當上旅遊記者嘅係一位亦師亦友嘅上司。
記得見工時，我答完一輪台灣韓國專題，之後佢問我有冇想去嘅國家，我不加思索就答咗想去挪威，原因係覺得好靚好想去，冇咩驚天動地泣鬼神原因，果陣心諗佢應該覺得我好膚淺，結果又戲劇性地佢請咗我。（後來先發現旅遊記者係好難見的，我真係一萬個幸運。又又戲劇上地愛上旅遊記者呢份工）
第一日返工直至最後一日，我都坐佢旁邊位置，日常物資會被佢佔用、更要提經常性失憶嘅佢各種必做事項，我成日笑稱自己似佢秘書。而且更要承受佢每日言語攻擊「你究竟忙緊乜」、「你個樣點解咁西」。（雖然我都攻擊佢唔少身高衣着同貴公子格）
佢係我遇過說話最喜歡兜圈嘅人，每次聽到佢同同事兜圈婉婉轉轉地似ban非ban，我就會插嘴叫佢直接啲。雖然佢成日兜到出太平洋都唔入正題，但佢真係會聽意見改吓自己，例如而家兜圈最多只兜出維港。因為其實佢好在乎每個同事感受，所以每次「坐櫈仔」、「坐梳化」都會不時進行心理輔導，有時會諗究竟佢係喜歡吹水定真係會將同事擺係心頭上。但半夜都會同你傾成個鐘計嘅，應該都係有人性嘅人類。
雖然大部分時間同佢似朋友，但佢都不時令人恨得牙癢癢。例如係醫院叫我拍個一星旅行團、叫我坐輪椅去拍嘢，果刻恨得想將佢推落山。
當跌入黑洞、不斷懷疑人生，反思自己冇故仔做得好，定天性處女座嘅我根本唔適合當記者嘅時候（利申太陽月亮都是處女座，入黑洞時可以入到很深的）佢會不斷提醒我其實有乜可取之處。當一個人跌入黑洞漩渦時，呢啲說話真係會拯救到你。
佢身為半個旅遊人瑞，好多故仔題都逃唔過佢法眼，大家都比佢ban過無數trip同題。但佢好肯比我試，我話要去台南拍條純畫面配音樂嘅呷冰片，佢只講咗句「拍靚啲」。儘管都一如所料冇乜人睇，事隔兩年佢仍會講其實幾好睇，係good try。又我話要去首爾拍個系列係講買衫嘅，仲吹大到每個國家都做一條，佢同樣講句「good try」，拍完返嚟成績唔理想，佢又係話其實幾好的，叫我繼續拍，一齊諗點令多啲人睇。
唔係純安撫你、唔係只睇數字結果，做咗咁多年人，職場上拎個心出嚟工作同相處，件事好有溫度。
好多大家喜歡睇嘅故仔，會credit記者、production同事，其實都要credit呢個人，地獄式訓練同事。
再講落去會矯情到不可收拾，以後冇人踢爆你身高得173，但都請你以後食多啲supplement控制腦退化，畢竟你身邊少咗個優秀嘅處女座。（ME)
啊，呢位偽低調貴公子叫Charles，好似成30歲先第一次食車仔麵嘅離地人類。
圖一係佢每日唔知我忙緊乜嘅視覺
圖二係每日都催佢快L啲睇晒啲片嘅視覺
#肝臟受損的日子
一星旅行團 在 一星旅行團 的推薦與評價
$10寂寞的心俱樂部85歲老人日坐10小時睇電視：「我哋一齊等死」 #一星旅行團. 果籽 ... 泰式槌仔按摩變雷神記者：有一種閃電的感覺#一星旅行團. 果籽. 70K views•2 years ... ... <看更多>