書生捕獵團（上）
落魄嘅書生，路過一個小鎮。
佢遇上一個富家小姐，欣賞佢嘅才華，以身相許，兩個人私訂終身。
小姐仲畀晒自己嘅私房錢，畀書生做盤纏。
書生得到愛情同金錢嘅鼓勵，信心滿滿咁上京趕考，順利考到狀元。
赴過瓊林宴，打馬御街前。
書生不忘舊情，大紅花轎迎接小姐。
小姐成為官夫人，人人艷羨，兩個人幸福快樂咁生活落去。
耶！
嗱，呢個就係「書生與小姐」嘅理想故事。
呢個故事我已經聽咗一百次，但故事依然未實現。
自我介紹一下，我叫露珠，係一個丫環，我自細就同小姐一齊長大。
小姐自然係富家小姐，靚女一名，老爺係做生意嘅，都算有錢。
老爺點樣有錢都好，佢始終係商人。
係呢個年代，商人就係俾人睇唔起嘅，滿身銅臭。
所以，小姐自細嘅心願，就係嫁畀一個做官嘅男人，成為眾人艷羨嘅官夫人。
小姐長大後，先發現呢個心願有幾難。
官員之間會聯姻，大家都要面子，根本唔會娶一個富商嘅女。
就算有啲官員等錢洗，大把巨富之家嘅千金，等住嫁去做官夫人。
相比之下，以老爺副身家，真係排隊都輪唔到。
所以，小姐嘅計劃都有所變動。
既然冇可能嫁畀「已經做官嘅男人」，唯有喺男人未做官前，趁低吸納，建立感情。
換句話講，即係要溝考中科舉嘅男人，狀元榜眼探花嗰啲。
小姐嘅「書生捕獵計劃」正式開始。
小姐吩咐我收集資料，了解路過呢個鎮，上京趕考嘅書生。
要了解佢哋嘅年紀、屋企有冇老婆、性格、愛好，最緊要係成績好，有潛質考中科舉。
有錢洗得鬼推磨，我哋好快就整理咗一本「書生記事錄」，仲不定期更新。
小姐嘅目標，就係年輕單身、成績優異嘅書生，實現「書生與小姐」嘅美好未來。
計劃嘅第一步「勾引書生」，往往係成功嘅。
想像吓，當你一貧如洗，寒窗苦讀嗰陣，突然有個美麗嘅富家小姐，話仰慕你嘅才華，願意以身相許。
十個男人，九個都唔會拒絕。
到目前為止，小姐已經成功勾引咗十八個書生，送埋盤纏畀佢哋上京趕考。
但問題係，到目前為止，仲未有一個書生考中科舉，返嚟娶小姐。
應該話，都有三、四個書生考中咗，但佢哋全部都唔認數，仲有人喺京城娶咗大官嘅女。
當小姐託人寄信去京城，要佢哋兌現承諾，勿忘白頭之約。
嗯，每一封信都石沉大海。
有一次，小姐唔服氣，仲千里迢迢去咗京城，拎住訂情信物，搵中咗舉嘅書生。
但嗰個書生居然唔認數，話唔識小姐，激到小姐爭啲嘔血。
唉，冇良心嘅人實在太多啦。
小姐好困擾，突然有一日，小姐問我：「露珠，你話我係咪應該……生個小朋友呢？」
一直以嚟，小姐雖然對唔同人以身相許，但自己都有小心避孕。
小姐嘅意思係，佢唔再避孕，咁書生中舉後，就可以抱住個小朋友，去逼書生認數。
「小姐，如果你生咗，但個書生冇中舉呢？個個都知你做咗阿媽，你點樣去識下一個書生？」
我一連拋出幾個問題，小姐啞口無言。
呢啲道理小姐都明白，只係佢年紀愈嚟愈大，仲未搵到書生埋單，開始慌張。
我同小姐情同姐妹，見住佢勾引一個又一個嘅書生，一次又一次咁失望，我都好心痛。
我終於忍唔住講：「小姐，不如放棄啦。」
做官夫人雖然威風，但做唔到丫嘛。
下集：https://bit.ly/3nXfac7
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #書生捕獵團
一諾千金故事 在 成語故事：一諾千金- YouTube 的推薦與評價
成語 故事 ： 一諾千金 ... 貓小帥- 兒童 故事 - 卡通動畫- 睡前 故事 •18K views ... 兔小贝成语 故事 065 一诺千金 丨兔小贝Beckybunny ｜成语 故事 ｜儿童 ... ... <看更多>