公司有個old seafood一向唔受歡迎，因為佢好鍾意認屎認屁，特點就係睇唔起人同埋唱反調，總之就要衝出嚟刷存在感。
同事爆數，佢話人哋跟緊嘅客好易湊，純粹靠運，簡單嚟講就係佢最叻。
奴域斯基退役，佢第一時間share個post，而其實佢係完全唔識NBA。
成班同事lunch話去食雲吞麵，佢一個人話唔好，結果全部人就佢去飲茶，點知去到佢唔揀嘢食，點心嚟到就彈三彈四，問人點解揀呢樣，點解揀嗰樣。佢食到一半加碟炒粉麵，嚟到唔好食唔出聲，食完一碗仔就第一個放低筷子：「我飽喇，你哋搞掂埋佢。」
噚日安心事件佢又嚟料，大家喺度討論緊嘅時候，佢衝出嚟講：「聖母院單嘢先係最慘呀，香港每日150個單程證你哋唔擔心，娛樂新聞就走嚟八卦，仲為咗咁而去登記睇蘋果，唉，香港人。」
今次班同事著火喇，有一個開facebook畀佢睇，較早前已經講過聖母院事件，唔係唔關心；另外一個話自己睇新聞播眾人唱聖詩一幕都有喊；仲有兩個人分別喺手機開一張去法國時影嘅聖母院照片畀佢睇；有一位仁兄更加進擊，兜口兜面問佢：「其實你去過聖母院未？」
Old seafood又點會認輸：「未去過聖母院唔關心得？」
得，當然得啦！既然奴域斯基係邊個都唔知一樣可以share post，聖母院咁大件事一定關你事啦！
其實今次偷食事件牽涉好多情感同價值觀問題，當然好多人都係八卦，但一對陪伴大家成長嘅模範情侶亦係我哋嘅集體回憶，覺得震驚、失望、心碎，甚至懷疑愛情，絕對係人之常情。
有同事話：「我係Mi fans，浪族闊少爺鍾意到而家，係咪連唔開心同失落嘅權利都冇？要呢個時候同你講單程證？」
另一個同事又講：「雨傘嗰陣我出旺角瞓足咁多晚，我唔係唔關心香港嘢，係我關心嗰陣你唔講，今日睇一單娛樂新聞你話我唔係香港人？」
仲有同事話：「關心聖母院，一樣可以關心偷食事件，兩回事嚟，定係一個人有限額，只可以揀其中一樣關心？」
又有人話：「我最初以為係標題黨，嘗試登記入去睇清楚，如果發現只係劇照，本身打算留言屌爆佢。」
最進擊嗰位同事：「其實非洲內戰都死好多人，你關心咗未？聖母院事件當然令人惋惜，我仲睇咗好多報道，不過你都係答返我非洲內戰死咁多人，你有冇拎出嚟講？嗰啲直情係人命喎！」
我哋對偷食事件憤慨同關注，唔代表唔關心聖母院事件，真正嘅香港人，係有資格同埋權利去討論任何事，而唔係討論任何事都要被批判同限制。
不過最嬲嘅係，噚晚7點old seafood仲未走，有同事特登扮print嘢兜去佢後面睇下咩料，原來old seafood唔出聲喺個位開咗蘋果live睇記招。
#世界級同事系列
#我指佢好關心世界大事
#我關心聖母院事件
#都有權關心其他事
