［一年去四次日本］2019回顧之驛馬星動篇
1. 個題抄 Hong Lam 林奕康的。其實文好快寫完，但搞啲相呀搵返呀搞好耐，似乎我都係吹下水好過。
2.2019年，好似坐咗好多飛機。 「但其實以我標準計就唔多」。唔係話咩跨國企業高層，但之前的確多trip出，耆英年代多，星展都有啲，東盛或台灣佬年代都仲去下台灣或大陸，但而家近乎冇。呢度已經爭好遠。例如2012，我去咗唔知幾多次吉隆坡，兩次檳城，幾次新加坡，倫敦，慕尼黑，法蘭克福，然後放假去意大利。結婚再去悉尼，坎培拉（係！悉尼飛坎培拉！），烏魯魯，再去瓦努阿圖，年尾仲去埋古巴同墨西哥，邊有得比？都未計返大陸。另外，早兩年，囡囡在台北坐移民監時，我隔星期就去，一年去十幾廿次台北，邊有得比。
3.今年一個字講，就係全面淪陷，已經係連續N年我冇再去長途旅行。點長叫長途？香港仔就易定義啦，香港人成日講5鐘航程覆蓋世界一半嘅人口嘛（實則你在中國印度求其搵一度都係，unique selling point又一虛妄）。又或者，「你出trip可以坐商務嘅咪長途」。咁你坐台北都可以坐嘅就你勁。但根據我做嘅幾間公司，基本上都係四個鐘為限（日本嗰啲四個幾鐘唔知點計，我亦冇去過印尼出trip唔知計唔計）．再直接啲，即係歐洲，美加，澳紐。你有機會嘅就杜拜沙地阿拉伯（唔怕畀人分屍？）都計。反正我今年全部都冇去過
4.事實上打從2015年，我第一次去日本（亦第一次去韓國）打後，我就冇再去過長途旅行，除咗去咗次杜拜。搞到而家有人以為我係日本達人乜七。但其實之前我係每年去一次歐遊嘅，2015亦有 - 之後就冇去過了。呼。原因係乜，我都唔知，我估主要係懶。當然真係要拗嘅，星矢圍高達年代難拎長假亦係原因。但離開之後不見得我就去歐遊，所以都係懶。
5.好，今年去嘅，希望冇數漏。首先，去咗四次日本，人權超額完成，甚至計五次都仲得。因為有次去咗兩個幾星期，而其實原本係想返香港兩日再出返，後來發現把托，而行李係裝得晒嘅。上面個圖未update晒，仲爭剛剛新潟未計，所以應該係136。放心，係咁多年以嚟，唔係一年。但其實都係講緊由2015年11月開始，4年有咁嘅成績，我嘅人權幾好。
6.一月去咗熊本 — 阿蘇 — 福岡 — 長崎。前兩者冇去過，福岡去過5次，長崎去過一次，但今次同囡囡去。睇阿蘇火山，食咗很正嘅長崎蛋糕（http://bit.ly/367LKfF），有特色嘅長崎拉麵，熊本站嘅炸豬扒亦極好食。間福岡嘅米芝蓮兩星就麻麻。
7.三月去咗東京，TeamLab，東京鐵塔，然後飛廣島同囡囡會回，再坐船去松山，四國高知，愛瑗尋找《東京愛的故事》，最後在德島返香港。去道後溫泉，另外食咗好多鰹魚，Asahi啤酒廠，
8.十一月去咗東京 ，去埋川崎（遲下會寫），東京食咗魚翅，去咗澀谷新商場Scramble Square。然後飛函館，當去咗北海道，睇咗夜景。去青森會合囡囡 ，海鮮丼，意外見到太宰治展，弘前公園，盛岡短角和牛。 仙台尋找魯迅，食咗好多餐牛舌。去埋松島，去埋福島，東京回港。好滿足
9.然後聖誕去埋新潟幾日。麻麻地，但勝在平，里數就兩萬五一位，酒店五舊水。有去越後湯澤尋找川端康成，但其他就冇乜特別。凍，但又未落雪。加上之前都唔夠訓，有一日休息唔願郁，結果冇乜睇咗乜就返咗嚟香港。但都係嗰句，去澳門都唔止咁嘅價錢。
10.喔，仲要你睇下個圖，四次都係YEN比較平（講到自己拎幾百萬港紙掃貨咁）
11.仲有？仲有去咗兩次韓國，六月剛過普碑唇就去一次，食咗間米芝蓮兩星，睇咗企鵝。然後最後嗰日搞到班機都miss埋（而落機要返工）。
12.九月再去一次。首爾玩咗汗蒸幕，去埋大邱。然後會合囡囡，食咗間米芝蓮兩星慶祝結婚七周年。仲食咗米芝蓮一星嘅醬蟹。
13.仲有？仲去咗次台北，十分趕，因為主要係去做體檢，同埋打疫苗（德國麻疹）。
14.Exotic啲嘅？生日去咗次柬埔寨（吳若希都去可以有幾Exotic？），暹粒同金邊。暹粒就當然係吳哥，金邊就有去S-21集中營，柬埔寨的餐廳相當不錯，但當然多得當地窮到PK。然後仲去埋曼谷 — 係喎，嚴格嚟講我冇去過曼谷，應該話冇留過夜。之前轉機閃出去食個飯，或者出trip機場—寫字樓（人地） — 機場嗰啲唔計。在曼谷食咗兩餐米芝蓮兩星做生日。
15仲有冇？居然仲有，三月返新工前去咗次越南，胡志明市，印象認真麻麻。因為食錯嘢，唔知係食錦麗定另一間嘢。加上酒店冷氣又麻麻地，總之就病足一日。但唔係第一次去越南，早兩年去咗河內 — 亦係返新工之前。
16.特別嘅嘢，其實唔係好多。不過數數下，我原來都超過60日唔在香港。
17.邊撚度有咁多假？「其實係有的」，有紅日同星期六日。同埋，咪話我三月前未返新工嘛，去阿蘇熊本福岡長崎，東京四國，同埋越南都係嗰時去。
18.下年嘅計劃？係冇嘅。當然無論如何都要去一次台灣，要去返一個星期，拎居留證。其他未知。會唔會去歐洲？我估未必會了。身體佷誠實，懶了。但可能再下年吧。
________________________________________
19.For the sake of completeness，仲有呢個，東南西北睇下邊個最鹹濕。就係睇下你去過最東，最西（除咗香港），最南，最北嘅地方。
20.以下係本人嘅紀錄
東：瓦努阿圖Tanna火山島 東經169度—2012年10月
南： 澳洲塔斯曼尼亞Holbart 南緯42度—2012年10月
西：墨西哥城 西經 100度—2012年冬天
北： 挪威北角北緯 71度 — 2009年夏
21.See？全部都係2012年前嘅事，之後就開始冇咗嗰種精神，咁啱又係2014年被炒，我覺得都有啲關係。滿足了，浮士德了，呢一刻太好了，complacent了—咁就會畀人打死。
22.東呢，最東去到瓦努阿圖，其實仲有機會。去次紐西蘭就得，雖然短期冇乜咁嘅計畫。或者去菲濟，去湯加尋找高路斯都得（話時話，我真係寫過email去湯加足總拎神射手簽名）
23.南，又係都仲有機會，要南過Tasmania 唔太難，亦係去次紐西蘭就會搞掂。可以諗下，一次過滿足最東最南兩個願望。或者去次阿根廷或智利都得，呢啲都曾經想去。唔使玩到去南極。
24.西，其實我就唔夠西，大把人西過我。我最西墨西哥城之嘛，唔使話西岸，美國加拿大中部好多地方都西過墨西哥城，照計你啲網友好多都西過我
25.北，應該冇乜機會再突破，就算去阿拉斯加加拿大格稜蘭都要去到好北，只為刷紀錄，唔會了。邊個去得北過我嘅可以講下。又，冰島？咪撚玩，成個冰島都未入北極圈，震驚未？係仲南過以假波，同埋聖誕老人出名嘅芬蘭露凡尼米Rovaniemi
26. 即係，去次紐西蘭，去次北美咁咯。其實唔難。
中部汗蒸幕 在 GRACE~台中沙鹿這樣玩| 親子飯店有汗蒸幕? - YouTube 的推薦與評價
台中沙鹿親子餐旅館開箱PART2 飯店有 汗蒸幕 放鬆爸爸媽媽的心情二樓的室內遊戲室布舒芙玩翻天還在沙區找到寶石? 晚上開車到台中港路找到比香港還要好吃 ... ... <看更多>