有人話鐘意睇擠黑頭嘅人壓力好大，所以睇到擠黑頭個個moment，見到有問題solve 到好治療...
今晚睇咗一陣擠黑頭YouTube，無啦啦諗起4年幾前寫嘅一個感受... (4年前嘅呢一篇，寫於乳鴿第三十日)
聽日係4月24日...
4年幾前可能係一個笑話，可笑係當時我好支持「擠黑頭」。當時有人覺得冇啦啦好地地擠佢做咩，亦有好多人事後笑你「擠黑頭」擠到有變黑洞，冇啦啦多撻瘌。
「擠黑頭」有冇帶來傷痛同壞處？可能啦，不過必定帶來烙印，個黑頭印應該永世都揮之不去了。
PS. 個9 個人我唔支持，但我確係喺4年幾前支持齊心擠黑頭，所以我反對拉任何一個有份擠黑頭嘅人...
《係咪想擠左粒黑頭？唔好猶豫啦，擠啦》
(必須要承認以下內容係有D 嘔心，我視以下文章為美容系列，如果引起你嘅不安，我代粒黑頭同你講聲唔好意思。)
有冇睇過YouTube嘅陳年黑頭粉刺針清系列？
我知道呢件事係有D 變態，其實我好鐘意睇YouTube嘅陳年黑頭粉刺針清系列。見到粒陳年黑頭成功擠出黎個一刻，真係好想企起身拍手掌；個種快感，難以言喻，就好似見到個深層問題係你眼前連根拔起一樣。如果你試過擠一粒擠左幾次都擠唔出嘅黑頭，有一日，無啦啦，你好輕以易舉咁成功擠佢出來，個種開心，總之你擠過，你懂的。
------------------------------------------------------------------------------------------
我想香港回歸呢17 年嘅問題多到，就好似一個出滿黑頭的士多啤梨鼻一樣...
-->其實大家都心知肚明，個士多啤梨鼻真係好鬼污衊。但你食到訓到痾到呼吸到，你就由得佢keep 住咁樣衰...
-->好多人都話，離遠睇唔多覺眼，唔望佢就唔覺架啦。
-->又有人話，我知係有黑頭呀，但你一擠佢，有可能只會將粒黑頭愈推愈入，仲衰多二錢重啦，無謂冒險啦。
-->仲有人話，野火燒不盡，春風吹又生，擠完都再生，不切實際啦。
------------------------------------------------------------------------------------------
縱使大家都睇死你擠唔到粒黑頭出來…只要你有決心，一定擠到出來架…
只要試過擠黑頭，你就會知道，鏟除黑頭係要比D 耐性同決心。有時已經出盡全力擠，甚至都已經發生流血事件，但粒黑頭真係比你想像中頑強得多。但唔怕架，你比D 耐性，從唔同的方向，向住粒黑頭擠，你會發現，粒黑頭都會有頂唔順嘅一刻，出黎投降架。
對於擠完黑頭要承擔嘅後果…
或者你會話擠完粒黑頭，都會有個洞啦。但你唔及早擠佢出來，唔乾淨之餘，個洞只會愈撐愈大，到時個毛孔就會完全呼吸唔到架啦。
「都擠左30 日啦…實在係令人氣餒」
想當初，我都以為係三，五，七日嘅事，勢估唔到，我一開始擠黑頭，發現粒黑頭比我想像中大好很多，真係out of my expectation。原來表面上我見到嘅黑頭，真係好似titanic 嘅冰山一樣，底下仲有一大舊。
不如一齊擠，一齊迎接擠乾淨個種爽皮感覺呀...
只要你有決心想皮膚好，唔好猶豫啦，擠啦。我相信有朝一日清哂D 黑頭，個種快感就等於你用biore 個隻黑頭貼，一野扯D 黑頭粉刺出來，扯出來唔係最爽，最爽係檢閱返塊黑頭貼嘅所有黑頭sss，係唔係好期待先？
PS. 黑頭嘅野，又豈止得一粒，但我想，只要你有「清得一粒得一粒」嘅理念，塊面會愈來愈SKII，愈來愈滑架啦。
再PS. 原先我想share陳年黑頭粉刺針清YouTube系列，但確實係一睇就停不了，大家想睇就上YouTube回味啦。
