《沒有口罩常在家的日子第6日》
冇錯，我已經吽咗喺屋企六日冇出街，我諗大家都陷入咗一個世紀矛盾：出街就要口罩，但係冇口罩喺手，於是你就只可以唔出街。而家口罩就好似 asia miles啲飛行里數咁，你有幾多口罩，你就可以去得幾遠。
之前政府成日話，大家著眼點只係擺喺香港，應該放眼世界，放眼大灣區，我而家知道，原來你冇口罩，你個世界就會淨返屋企個幾十呎。
就嚟可以取消港幣呢個貨幣，可以用口罩以物易物，大家為咗個口罩打劫打交，係咪大家有啲想坐監？監獄就係生產口罩嘅地方，入咗監獄你就有口罩，你就唔使死，唔使排幾個鐘可以等配給！
今日睇完新聞我對香港致府真係絕望，我發現原來香港政府係衰過大陸嘅市政府， 本身係唔應該同一個差過自己嘅人比較， 但而家竟然發覺比自己差嘅人都超越自己， make sense 實幹。人哋冇醫院冇隔離病房就24小時興建火神山同雷神山醫院。 我哋起醫院剩係揾塊地都要揾地產商捐出來。 湖北黃岡市防疫指揮衛健委主任，因為做唔到野，惹起公憤，竟然畀人提名革職，原來大陸係可以對地區官員不滿，提名炒鳩咗佢。 前線醫生有精神壓力，叫有共產黨黨籍嘅醫生做前線，為人民負責，嗰種你係黨員，責無旁貸， 冇得卸膊嘅強制執行， 真係好應該 apply喺行會成員，特首委任同民建聯黨員身上，平時講到咁擁護黨，又唔做嘢。
唔好講防疫工作，唔好講地區管治，問責機制，特區政府係連普通順豐速遞做到嘅logistic 都做唔到。一個咁緊急嘅情況，所有口罩變成中央分配，指定單位先可以售賣，就可以避免有人囤積口罩或者炒賣口罩。你有咁多區議員，send 口罩俾區議員，叫啲市民去區議員辦事處買咪得囉， 唔只可以解決口罩嘅問題，仲可以順便take attendance, 睇下啲區議員係咪做嘢，真係一舉兩得。 一個順豐速遞都做到嘅物流問題， 都搞到有人要打劫口罩，打交暴動，fedex, sf express, hk post 都集體睇唔起你啦。
今日見到林鄭月娥又出嚟開記者會， 佢令我諗起我一個，無論人哋send咩email畀佢，佢都forward畀其他人嘅同事， 無論記者問佢啲乜嘢問題，佢都forward畀另一個局長解答。其實大家都知道林鄭月娥係解決唔到問題，但係你不停將個問題forward畀其他局長，連俾大家屌你嘅機會都冇， 點會唔暴動呢？佢唔應該叫carrie lam 佢應該叫forward lam.
#交俾局長解答
#交埋你份糧俾佢啦屌
#除咗唔出街唔知做得啲乜
#我原來無路可退_停留在重災區_著了燈_仍呆坐這裡
#無言同路的一對_看著殘酷的世界_還能做做愛侶_還是要忍下去
#呢個其實係科學實驗_到底一個人留喺屋企幾多日會痴線
