［比利時法郎都佔6%，我真是醉了］順手講埋IMF投票權，意大利多過印度。
TL：DR – 班歐洲佬食老本，搞佢幾十年先肯起身讓倍
1. 上次講美匯指數篇文，反應不錯（https://bit.ly/2AzvVDP）。
2. 咁再講多啲。正如篇文提過，而家美匯指數嘅比重，歐元58%，日圓14%，英鎊12%，加拿大9%，瑞典克郎瑞士法郎各4%左右。呢個比重係極之混帳，而且好隨意嘅。
3. 重溫一次，最初係金本位制，有幾多金就有幾多貨幣，錢不能任印。後來二戰後，歐洲日本打到爛晒，英國又元氣大傷，退下舞台，中國就褲都未有得著。美國係唯一大國，仲要最多黃金。所以二次大戰後，就行Bretton Woods system。人人對美金固定匯率，而美金就對黃金固定，冇得貶值偷雞，亦冇得亂印。
4. 呢個系統，玩咗30年不夠，就玩完。去到1973年後，就美元唔再固定黃金，其他貨幣亦都自由浮自由貶，你可以話係進入咗任印嘅年代，甚至你可以話正因為咁，呢50年間股票升，樓升，金價升。因為狂印，基本上而家都係呢種體系。所以買唔起樓嘅，知道去邊度示威啦。
5. 而美匯指數，亦係1973年後搞出嚟的東西。以前固定匯率，使鬼美匯指數？日日都一樣整嚟把托？
6. 不過呢個美匯指數，真係過期到不得了。講過啦，1973年到而家，差不多五十年，個比重同成份，只係變過一次！就係1999年，歐元面世之時。但當其時，亦只係將以前嘅西德馬克（OK，99年唔係西德啦）法國法郎等等加返埋，變成歐元。
7. 然後結果，我係搵得返1973年嗰時嘅成份：就係呢個圖。介紹返，留意西德馬克法國法郎意大利里拉荷蘭盾比利時法郎，呢五個加埋，就係57.6%—就係而家歐元嘅比重。而其他咩瑞典瑞士，亦係1973年到而家冇變到。即係1999年嗰次，都冇順手再調整，只係將五大歐洲貨幣加埋一齊。幾咁求其
8. 但如果你觀察力強嘅，應該仲會有一個問題。西班牙呢？未建國？
9. For some reason，美匯指數係冇西班牙比薩塔嘅，原始版本都冇，之後因為冇改當然亦都冇。但點解冇？
10. 歐元區四大天王，德法意西。人口最多係呢四國，經濟規模（計GDP）又係呢四國，好長期都係呢四國。但點解連咩比利時荷蘭都有，而西班牙比薩塔冇份入美匯指數？
11. 詳細原因我唔知，但我估，應該係同西班牙好遲先加入EEC（歐洲經濟共同體）有關。
12. 呢度講少少二戰後嘅歐洲歷史。二戰後，歐洲打到殘晒，美國獨大，英國亦都仲撈到啲地位。歐洲各國開始覺得，再咁你打我我打你真係冇著數，打打殺殺冇前途，不如講和。而歐洲一體化嘅推手，當然係德國法國兩大強國。呢度指嘅歐洲一體化，係和平嗰種，唔係拿破崙或俾斯麥希特拉一統江湖嗰種。亦其實，即係歐盟嘅前身。
13. 歐盟之前已經有歐洲一體化嘅組織。最早就係甚麼歐洲煤鋼共同體，歐洲原子能共同體，加埋呢個EEC。
14. 而歐洲一體化嘅先行者，除咗德法外，仲有傳統上重貿易嘅荷比盧。另外就係，聞到著數即時仆埋去嘅，意大利！估唔到。例如歐洲煤鋼共同體，就係德法荷比盧加意大利。EEC最早期六國，亦係呢六國。所以講歐洲一體化先行者，就係呢六國，雖然係冇獎嘅。而我相信因為西班牙遲入，所以1973年嘅美匯指數就冇份了.
15. 另外仲要講，你見，呢個籃子，真係只反映1973年嘅世界秩序，而家五十年都嚟緊頭。一個美匯指數，可以冇人民幣，都係幾神奇。OK你鍾意講冇民主呀唔自由兌換呀等等，隨你。但，印度呢？巴西呢？澳洲呢？墨西哥呢？韓國呢？全部唔見影。
16. 同樣嘅問題，在IMF都有出現。咪講過咯，IMF，亦係二戰後出現嘅東西，戰後嘅秩序。
17. 咁所以，在IMF，都有呢類搞笑嘅問題。例如在2010年之前，啲投票權，都仲係極之舊世界嘅秩序。西班牙嘅票多過巴西，比利時多過印度，意大利多過中國，奧地利多過韓國。而明明呢堆新興國家，經濟規模超過啲歐洲舊朋友。咁點掂？
18. 幸好，經過啲新興國家嘈一大輪，卒之改革。改完之後，而家金豬四腳嘅中印巴俄，先在頭十名入面。但日本依然多過中國，意大利依然多過印度。繼續努力。一步一步嚟，朕不給你不能搶。
19. 不過又要講下，其實呢次改革，係多得美國成全。應該話，根本係美國獨力促成。是咁的，餅就咁大，咁有人拎多，當然有人要減，歐洲佬礙於形勢比人強，自己真係唔掂，亦想R著數R貿易，唯有被迫放棄啲投票權。況且道理上，金豬四腳咁大，你仲玩比利時多過印度，亦講唔通。
20. 但，最大嘅，當然係美國。有趣嘅係，IMF任何呢啲票數嘅改革，要85%成員通過—而美國自己就渣住超過17%票。實務上即係有一票否決權，佢可以否決任何佢唔贊成嘅嘢，那怕全世界所有國家都支持。
21. 但事實上，美國係讓咗步嘅。咩原因任你估，不外乎都係著數。但最重要係，美國投票權減咗少少，但依然係超過16%，繼續保持佢嘅veto power
22. 所以呢，改革唔緊要，唔好搞到大佬就得。
———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。
請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。
人民幣美金即時匯率 在 路透即時外匯-全球匯率美元人民幣| Anue鉅亨 的相關結果
06:39 · 美元/人民幣 · 6.8681 · -0.0064 · -0.09 · 6.8790 · 6.8650. ... <看更多>