成日有人問，你話香港係美中共管，美國唔係當香港係空氣，但點解美國左派到而家都唔出手云云。我嘅答案係，你要人救，要怪人，請你做好自己先。
打比喻：香港自己有間房，永世唔執，成日都等老母（有啲父權）幫手執，連有隻壁虎都鬼殺咁嘈，老母如果一直睇唔過眼，乜家務都做曬，咁將來香港讀完大學要獨立，就會缺乏自理能力。自理能力低唔緊要，但搬到出去，容乜易畀地產經紀呃，甚至連住緊凶宅都唔知，柒足一世？
試想像美國而家主動出手，好似對待台灣咁幫香港加持，二零二零年香港正式獨立，到時香港民族係咪已經有堅定意志去守衛香港？中共近在咫尺，硬有硬打，軟有軟滲，香港空有國體而無國魂，獨立又有冇可能長久？
暴政壓境，抗爭示威，烈士死亡，係香港獨立一定要經過嘅磨練。國魂必須以血汗鍊成，此乃等價交換。美國之所以放任中共，一方面，固然係新自由主義之下，要第三世界世界工廠幫佢搵錢，但另一方面，香港民意未夠硬淨，主流唔明美國嘅立場，香港人亦未夠成熟去接受美援。大家成日話大國之間當香港係貨物去同中共傾deal拎著數，但諗人地點睇我地之前，睇返自己身為香港人，九七到而家，付出過幾多血汗，去證明香港真係奇貨可居？自由行有錢賺，商家歡天喜地；北京主辦奧運，爭住認中國人；一國兩制破產，重有泛民成員主動去美國國會議員講只係殘而不廢。更加不得不提嘅係，香港有幾多人理直氣壯咁講緊呢類言論：
1. 港獨唔可行，肯去犧牲自己性命嘅人有幾多？（今年已經有）
2. 中共咁惡，英國當年都縮，香港勝算又有幾大？（等人地幫）
3. 國際形勢好重要，有幾多國家會為香港放棄利益？（又係等人地幫）
一邊話港獨唔可行，一邊自己封閉自己，又唔去接觸認為可行嘅理論，盡力去轉危為機，呢啲柒到裂開嘅香港刻板形象，在在反映香港人輕視自由，人地美援唔到，合情合理。
價值，係要自己爭取，埋怨人地睇唔到自己有幾好，有幾努力，只係代表你未盡全力。美國總統只為美國利益負責，但小國有助美國防禦他國入侵，加入印太地區拱衛美國，就會身價百倍。美援係咪假希望，由始至終，都唔係香港人要去諗嘅事，因為除咗所謂美援，我地並無選擇。所謂美援嘅真正意義，在於香港有冇決心去加入以西方為首嘅自由陣營，藉此換取陣營領袖嘅認可，而人地自由民主行得快過我地咁多，睇過世上咁多所謂XXX之春到最後都係臨陣退縮，無以為繼，睇定啲至落籌碼，都係合情合理。
美國總統JFK就職宣言句嘢，我好中意，因為佢真係點出一種好撚正確嘅人生態度。「Ask not what your country can do for you, ask what you can do for your country. 」唔好問美國同香港畀到啲乜你，問吓你自己有啲乜值得美國送香港畀你。
只有心態開始轉變，明白精進自身有幾重要，只諗你想香港變成點，唔諗香港可以變成點，香港未來至會有國魂，然後有國體。
------
"The American left should speak alongside Hong Kong activists. Hong Kong has been passed from one imperial power to another. No Hong Kong government has ever had a popular mandate to rule. There is a saying on Cantonese social media that can be roughly translated as “only Hong Kongers can save Hong Kong.” That needs to be at the forefront of any self-determination movement in Hong Kong—but residents could use some help, and they shouldn’t have to rely on Marco Rubio."
https://www.thenation.com/art…/democrats-hong-kong-autonomy/
