倫敦金真係一嚿金?
今日去咗台灣出席就業展覽, 會同當地學生分享下搵工心得, 同埋一啲求職陷阱, 包括傳銷同埋倫敦金點呃人, 我決定帶埋本「倫敦金」上飛機解悶, 呢本書個作者于日辰係我好欣賞嘅網絡作家, 佢用另一個角度去揭開呢個行業嘅黑幕, 笑中有淚之餘, 又可以知呢行點運作。
(By the way "于"字速成點打? 我係search google再copy粒字, 我唔想做第二個康仔, 唔敢whatsapp問人)
咁多種呃人投資嘅行業當中, 小編對倫敦金特別反感, 除咗因為銀碼大容易害死人之外, 細個唔識嘢嗰陣都差啲中招, 所以印象好深刻。
當時互聯網並未咁發達(出賣咗自己年齡添), 我記得我去一間投資公司應徵文員, 成個見工過程根本係有身份證就得, 我都唔記得咗佢開幾錢人工俾我, 只記得比一般文員市價高, 但條友就勸我不如做操盤手之類, 人工一樣, 公司仲會提供免費課程。
去到上堂, 嗰班大約有20個人左右, 大部份都係後生仔, 有幾個就年紀大啲, 第一、二堂都冇乜嘢, 真係教你計數同埋一啲財務常識, 應該係等人放下戒心, 跟住去上第三、四堂就開始嚟料, 個職員兼阿Sir話, 紙上談兵唔會領略到, 開個公司account試下投資啦, 我記得佢所謂嘅員工account大約要你擺12000 - 14000蚊入嚟, 有個貌似萬梓良嘅阿叔同學好快加入咗, 第四堂已經話自己賺咗少少, 而其他仲猶豫緊嘅同學, 有啲喺第五、第六堂都科水join咗。
其中一個男仔同我一樣, 都係冇乜錢, 因為嗰陣真係好細個, 我哋落咗堂都會食個飯傾下計, 佢最後問屋企人借咗錢開account, 至於冇開account嗰幾位同學包括我在內, 就俾阿sir捉入房, 話可以用優惠價7000蚊照開, 雖然我好細個, 但嗰一刻我已經意識到有問題, 呢啲應該係公價喎, 係好嘢又使乜大幅度減價氹你入局呢?
我同幾位冇科水嘅同學好快就「被辭職」, 我記得自己當時真係有唔開心架, 因為我以為搵到工可以賺下錢, 嗰陣細個諗嘢係單純啲, 直至有一日, 同我比較friend嗰個男仔打俾我, 佢話成件事係呃人架, 萬梓良同學根本就係職員, 佢只係做媒, 而佢自己投資咗萬幾蚊之後, 好快已經蝕晒, 然後公司叫佢補倉, 否則救唔返啲本金, 如是者佢輸咗接近30萬, 間公司仲打去佢屋企追數, 最後硬住頭皮同屋企人講, 要阿爸阿媽幫手還, 我當時雖然替佢難過, 但同時慶幸自己真係窮L一名, 所以先冇能力開account。
我覺得你去呃啲有錢嘅人, 佢哋只係當跌咗散紙, 但向一啲搵工嘅人埋手, 真係仆街到要落地獄再鞭屍。雖然經歷咗咁多年, 倫敦金嘅呃人手法已經不斷轉變, 我講呢個case已經過時, 而家係興男仔扮女仔上wechat, tinder呃啲咸濕仔, 又或者白撞扮做電話問卷, 攞咗你啲資料之後, 第日再用其他身份打嚟sell, 手法層出不窮, 不過只要你揸住一個宗旨, 就係唔貪呢啲快錢, 唔熟嘅嘢唔好投資唔好做, 總之搵錢要靠自己雙手, 咁你就安全架喇, 記住記住, 如果嗰樣嘢好賺錢, 人哋根本冇需要同你分享或者益埋你, 收埋自己賺都得啦。
#于日辰 #一日之計在於晨 #我在倫敦掘金的日子 #倫敦金班L樣要攞去鞭屍 #你本書真心好重
