大家都係摸緊行到幾遠
【#毒果早唞 不過唔係而家唞】
我哋成日嗌 #毒果早唞，因為毒果記者文盲、用字奶共、IT垃圾、管理不善。唔信？睇吓我哋呢幾年落 #毒果早唞 harshtag嘅post，一地都係錯。呢間嘢能夠生存到而家都只係因為香港其他媒體早已染紅淪為中共喉舌，喺冇選擇之下被香港人捧上神枱。喺一個正常社會之下，咁嘅垃圾媒體理應早被淘汰。
但係香港唔係一個正常社會。呢幾年嚟，新聞自由被不斷收窄，先有刀手襲擊總編，後有政府冷待網媒，各傳統媒體亦因為種種原因，一係淪為中共傳聲筒，一係自我審查反對聲音；各報各聲，百花齊放嘅景象已不復見，只剩党的声音不絕於耳。近年黑警打壓傳媒更趨猖狂，隨意阻撓記者正常採訪，以求掩飾警暴真相。国家机器背後種種操作，誓要掏空香港，令「香港人」呢個身份從世界上消失。
自契丹[1]強行通過技安法以嚟，先前植根香港嘅無形魔爪終於有「法律依據」浮上水面，共產黨特工隨意用「莫須有」三字即可拉人封艇，大肆營造白色恐怖；任何人只要出過一聲反對，即要終日擔心自身安危。更甚者，喺兩個禮拜前，技安人員及屬下狗隻拘捕壹傳媒高層並大肆搜查壹傳媒大樓，喺冇授權下查閲新聞資料、阻撓記者工作，正式向國際社會明示香港政府視新聞自由為無物。
唇亡則齒寒，「新聞噏乜9」作為專門恥笑香港新聞事事旦旦，荒謬絕倫嘅社交媒體專頁，亦依靠香港人嘅共同核心價值：新聞自由、言論自由 而存在，先可以自由地恥笑同批評香港各媒體。共產黨今日搜報館，聽日就拉批評土共喉舌嘅人，後日甚至單單用紅線間低政權邏輯謬誤嘅人都可能被鎖。 香港蘋果日報 作為香港僅餘少數未被習近平魔爪染指嘅傳媒，縱然我哋唔支持佢哋編採取向，我哋亦不得不承認佢喺而家呢個黑暗時代存在嘅必要。
我哋經常話毒果應該早唞執笠，不過前提係佢哋要因為管理不善內容乏陳，讀者唔再支持而被市場淘汰，而唔係因為獨裁者鎮壓反對聲音，為清除眼中釘而被政權噤聲。喺呢個時代之下，每一把反對聲音，都係一份對抗極權嘅力量；我哋依然樂見毒果執笠，不過喺香港重光之後再討論其去向，亦未遲。
#毒果早唞，但係唔係咁樣唞。
（歡迎用今日蘋果日報廣告 #__早唞 入面嘅空格寫低你最想早唞嘅人或組織，影低share出嚟！）
總編按：今日宜戴口罩出街呼吸新鮮空氣，暫停服務一日
[1] 本文採用 寰雨膠事錄 國際新聞 Gaus.ee 台 譯名及欽定名稱，契丹一詞來源可參考 https://gaus.ee/gau-trans/kitay/
新聞噏乜9柒聞無處不在：
Facebook https://fb.com/upmud9.nu - Twitter / Instagram: @newsupmud9
#新聞噏乜9年度最9大獎 恥笑最柒媒體：https://awards.upmud9.nu
見到媒體出錯？報料攻略：https://bit.ly/3lrsmlT
倒錢落海 資助我哋吃喝玩樂：https://donorbox.org/upmud9-dump-money
總編後話（吹水谷）：https://bit.ly/3b9cqzT
ad design by 妙計 Muu Design
