［韓仔害人不淺］不過打靶嘅嘢，梗係打得快好世界，打得摩冇鼻哥。例如以下呢兩間。
又，呢篇文2000字，連埋整圖，我只係用咗半個鐘
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
告個急先：Ivan已被炒，已成失業人士。未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。 一星期至少出返六篇文．月頭訂最抵！月費80
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
1. 今次呢單嘢比較好寫，因為真係唔難明，唔使好專業都知咩事（https://bityl.co/6BA5），亦唔使點爭拗。反正唔少人都借過孖展，未借過都大約知咩咩一回事。你有堆貨，我咪借錢畀你，但堆股票就係抵抽品，有乜依郁跌咗落嚟我就追你補孖展，一兩日錢唔到嘅，同你不問價沽晒出街。你冇得怨，因為當初啲合約都咁寫，亦係行規。
2. 當你堆貨當時值100萬，我借咗50萬畀你，咁可能去到跌三成（呢啲可以傾）我就叫你抬錢（或抬貨都得），否則我就幫你射晒出街。點解咁做？我唔咁做嘅，你著咗草爆咗爆我點算？再跌多啲，堆嘢跌到30萬嘅，我斬晒出街都未夠填你爭我條數喎。
3. 以上呢啲操作，本人都做過，幸好係斬人嗰個，唔係被斬嗰個。當然我唔係刁拿（其實係讀 D拿），又唔係credit，亦唔係「老細」，但都會有參加下。
4. 當中呢，仲有不少學問嘅。留意今次重災區就係瑞信同野村。咁多數呢啲友仔呢，一間借就間間借架啦（你以為有TU？雖然你睇CCASS花紙都會知），多數都係「積犯」（在個客面前當然唔係咁講），借落幾廿條街數架啦，好人好姐唔會搵上門啦下話，唔通李嘉誠拎啲長實嚟問康宏借錢咩。但冇嘢嘅，計數啫，我咪借少啲畀你咯，或者收高啲息。當年咩漢能（656）嗰啲，有啲行收二三十厘息，你四年唔爆煲嘅我已經賺返晒啦
5. 戲肉啦喎，明明週末你聽到係高盛同 摩根士丹利係風眼，但你見股價都冇乜點跌。點解？因為佢地都有講，冇乜大影響。
6. 點解冇乜大影響？因為佢地係最早 meng雞（as in meng車邊）打佢靶嘅行！咪輸得少。
7. 你想像到個情況，我高盛不問價咁射出街，當然會惡性循環質低個股價。但話得不問價射出街，咪就係不問價！插到佢跌九成都好，都執返少少，因為再遲可能一成都冇（例如隻嘢停埋牌就仆街了，香港成日見）
8. 但，如果有幾間行都係「苦主」，就有趣。就係典型嘅Game Theory 囚徒兩難啦。理論上，梗係大家按兵不動啦，冇人開槍咪冇乜事。一有第一個做，第二個就跟住做，然後齊齊插水。
9. 但實際上，咪玩啦，稱兄道弟自己友，皇氣到大難臨頭各自走嘛！梗係做第一個有著數。高盛咪做咗第一個，咪輸得少
10. （當然實務上唔同行有唔同街拉啦，亦都真係好多時有啲行要請示幾撚十個高層，簽得名嚟都蚊訓。我舊行嘅老細就真係親自落去刁寧房睇住個刁拿將個愙打靶的，效率呀）
11. 然後你又睇到，投行業務難做呀。呀韓仔原本已經係黑名單，但高盛都仲係開返戶口畀佢。咁冇嘅，冇永遠嘅敵人，睇錢份上咯。都係嗰句，計數啦，乜風險都唔take嘅，去做食環啦（都有風險）
12. 講返，瑞信同野村呢，就重災區了，唔知係exposure 大，定沽得慢，定內部啲溝通太多層。野村話埋你知，輸呢壇嘢輸200億（梗係美金，唔通YEN？）。咁但講真，你以為好多錢，又係咪好多錢？都
13. 答案：都多多地啦。量化嘛。可能一兩季甚至全年嘅利潤都泡湯（懶查）。但公司蝕錢不等於爆煲，個Book 大約2600億，咁輸咗200億，8%—咪好似打機咁畀人一招扣咗8% 能源咯，甘唔甘？都甘甘地。仲要金融機構呢，唔使扣到0%先GG，一般去到50%已經叫晒救命 變紫色 滿天星斗任人打架啦。
14. 咁所以，野村同瑞信呢啲跌幅，差不多啦。但暫時望落，你睇各樣嘢，都唔似係咩系統性風險。「日日都有人打靶架啦」「不過今次大啲咁解」。留意你睇係咪金融風險，唔止睇股嘅，你睇埋啲VIX呀，Junk Bond呀，OIS呀，LIBOR呀，匯市呀等等，正常嘅。
15. 咁講完啲苦主，講返被沽出街嗰啲股票。真係留意，係雪球效應，堆嘢本身都碌落嚟，去到某個點先再觸發以上講嗰啲人踩人。ViaComCBS／Discovery寫過啦，本身啲估值都誇張，業務又冇乜特別。所以理論上應該斬完呢啲友股價就屙清輝，但你見ViaComCBS都仲跌緊
16. 照計啲中概股就過癮啲，都大約止咗血。但真係除你牌，都唔多好玩。未必變廢紙，但限你一個時間前沽晒就夠煩。況且，有啲公司本身都相當有問題啦。拿無證無據唔好屈人，而反正有人覺得「大陸啲嘢都係假」，但真係程度有深淺。瑞幸咖啡之類，你見都好少見。而你咩「跟誰學」嗰啲，一路都畀人話有問題架啦，自己心照。
17. 最安全係邊隻？反而係百度。因為已經返咗香港第二上市，你咪除牌咯，真係冇乜影響。但百度偏偏係業務比較廢嘅一隻。係咁架啦，邊有完美。
18. 咁真係搏嘅，我會揀騰訊音樂TME，當然輸死冇得賠，貴客自理，又唔係我拎支槍叫你買。你咪到時屌仆街死財演累你輸錢。但我只係將頭先呢句講多次。
19. 騰訊音樂話晒啲業務正常啲，大股東又可靠啲，況且仲有外資瑞典Spotify做股東，啲嘢點都有個譜，照計除牌都未搞著佢（希望），加上公司仲話回購。
20. 但當然，就真係有畀人除牌嘅風險。實則買親股票都有風險。叫你好地地買QQQ又嫌悶，ASML又話升得多，咁就冇計。
21. 拿，發唔發現呢幾日寫多好多文？冇乜新Patreon讀者呀，以上種種，全部在Patreon寫過。記得訂。唔得閒睇？唔緊要架，「好多人都只係支持下」。又，唔使等4月頭啦，今日訂嘅，我會回水畀你。
＝＝＝＝＝＝＝＝＝＝＝＝＝＝
2021比別人知得多。subscribe now。Ivan Patreon，港美市場評點，專題號外，每日一圖，好文推介。每星期6篇，月費80，半年已1400人訂！（https://bityl.co/4Y0h）。 年費仲有85折
