【《王者天下》：點樣50人打得贏8萬人？】
《王者天下》係舊年日本十大票房入面，香港唯一一套冇上映嘅真人電影，亦係舊年日本年度最高票房真人電影，第二集已經拍緊。雲集堆大卡士，又有戰爭大場面，亦係日本好鍾意嘅戰國背景題材，但估你唔到咁鬼悶。
冇睇過動漫原作，就咁睇呢個故事，就覺得太過冗長，亦不難想像好典型日本動漫改篇電影咁，將好長嘅故事過份濃縮，變咗部份人物同支節可有可無。套戲長達超過兩小時，虛構個贏政喺細佬政變之下，點樣重新奪權嘅故事，同時又有個熱血少年保護贏政一路殺上去。
前大半段即使偶有唔錯嘅武打場面，大部份時間都係講多過做、不斷係咁講各國形勢同戰略，講完又唔會令你投入到果種，而呢位熱血少年都一如好多典型日本漫畫中嘅設定，滿腔熱血式金句，加埋男主角山崎異人不斷係咁鳩叫，愈睇愈覺得煩厭。
嚟到壓軸重頭一戰，鋪排上都極為散亂，點睇都難以理解，呢班人戰術到底有幾勁，勁到可以用50精兵就打贏8萬人，尤其俾人萬箭從上而下圍攻，竟然完全冇事，咁都講得通，真係你話乜就乜，難以想像。我唔知漫畫有冇講呢班人係刀槍不入異能人啦，就咁睇套戲我唔理解。雖然呢幕長達超過45分鐘嘅大戰拍得爽快刺激，但如果抽離一下去睇當中嘅戰術，真係好難說服，到底點樣以小勝多。比例上嚟講，分分鐘仲慘烈過《戰狼300》，但係我又唔覺。
唯一可取應該係客串性質嘅長澤正美，中後段先正式出場，又型又有霸氣，唔似得成班角色唔係陰陽怪氣就係不斷鳩叫。
📣即訂Patreon加強版，閱讀更多精選深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
