［韓啤攻略—大同江啤酒，北韓的驕傲（好多圖）］
呢枝係一枝啤酒，冇乜特別。當然醒少少（其實都唔使好醒）嘅，會知道上面寫嘅係韓文。而都唔使識韓文，再醒少少，去過韓國嘅，應該冇見過呢種啤酒。
各位觀眾，呢枝就係北韓人的驕傲，北韓嘅大同江啤酒。聞說在中國東北丹東，或者首爾都可能有得賣，特別係北韓菜館，但我冇見過（亦冇去過）。北京都好似有
講返呢支大同江啤酒，冇誇張，真係北韓人嘅驕傲。亦都真係冇誇張，非常好飲。
留意韓戰1953年結束後，兩韓分治（其實再早啲已經係）。而要知道，韓戰開始時，北韓幾日已經攻佔漢城（而家首爾） — 好合理，因為你望下地圖，首爾離三八線40公里左右，話咁快就到。唔止，南韓軍備極雞，又冇準備，好快手（個半月）北韓軍已經攻佔咗朝鮮半島百份之九十幾，「其實可以強拍」。南韓軍係退到去釡山，朝鮮半島最南咁滯。然後先有仁川登陸聯軍反擊，收復漢城再打返過三八線，再有中共參戰之類。
________________________________________
講呢啲主要係想講，兩韓分治初期，北韓國力明顯強過南韓。唔單止係軍事，工業亦都係（亦多得日治時代嘅分工，北工南農）。最重要係，行社會主義嘅北韓，經濟係好過資本主義嘅南韓嘅！呢個兩韓分治初期，講緊係頭二十年。然後南韓先追返上嚟。足足去到1970年，韓戰廿年後，南韓嘅人均GDP先追過北韓 — 夠晒諷刺嘅係，除咗外國勢力，主要係多得獨裁者朴正熙
不過呢啲已經係咸豐年代嘅事。舊文有寫（http://bit.ly/2I4Kv7t），而家南北韓經濟差天共地，北韓差不多世界最窮（但其實都未真係包尾，低處未算低）。南韓就其中一個最富裕嘅國家。
想講嘅係，點解大同江啤酒係北韓人嘅驕傲？因為，啤酒似乎係北韓而家唯一一樣勝過南韓嘅東西。以前在運動可能係（北韓世界盃一早入過八強，唔使靠出術添），但而家南韓差不多每一方面（除咗軍隊人數）都勝過北韓
就係啤酒例外。
當然呢個，亦都多得南韓嘅啤酒實在好難飲。係世界知名嘅西啤。我同好多男仔唔同，我幾鍾意韓國，甚至嘢食都係。唯獨係啲啤酒就真係唔掂。其實啲燒酒露我都好怕。冇正式統計，但觀乎啲韓國佬真係嗜酒如命，就連啲後生韓妹都係千杯不醉咁。啲燒酒啤酒廣告好多都係韓國女明星做代言 — 在香港好似唔見噃。
而亦有人反駁，啤酒呢啲嘢，好大程度係marketing。個個話好飲難飲，只係偏見。Blind test 根本冇幾多人分到，
可能係，我唔敢講我味蕾好敏感。但就連經濟學人都話南韓啤酒很西（https://econ.st/2zuH1FP），唯一一樣北韓叻過佢嘅嘢
關於南韓啤酒點解咁西，篇文有講。主要都係因為冇競爭，兩大巨頭玩晒。
一係就喜達／海特（Hite）。55% market share，完全係痴線，特別係啤酒呢啲咁激烈而消費者價格好敏感嘅行業。又，而家真露都係呢間嘢出。而家代言人係Red Velvet個隊長，之前N年係IU。又話說呢隻咁嘅Hite 啤在日本好賣得，明顯係啲架佬鹹濕，硬晒就分唔到咩味，或者隔離飯香。
唔係喜達，就係OB ，Oriental Brewery。Cass啤亦都係佢。而家係外國AB InBev擁有。
呢兩間嘢加埋，好似係98定99% market share。而家加埋日韓交惡，杯葛日本啤酒（其實本身都好少人飲）。
經濟學人自己實地研究，唔止味道差不多，根本就連價錢都一樣 — 典型嘅Duopoly合謀定價。
呢啲亦都係多得以前啲法律，保護財閥。依法治國嘛，以前啤酒廠，要有100萬升嘅產能先拎到牌，否則只能自己即場賣，咁即係細廠唔使玩。早幾年先放鬆到12萬升
最正嘅係，經濟學人呢篇文，聽聞就在韓國引起掀然大波，迫使南韓政府都改例。後來文在寅上台，自己祖藉係北韓人，明顯冇上手咁敵視北韓。韓國人甚至聯署話要引入大同江啤酒，搞到南韓啤酒廠大力反對云云—因為驚唔夠人鬥。
________________________________________
掛住講南韓啤點解咁難飲，都未講北韓。北韓啤唔止比南韓好飲，同其他地方相比都絶不失禮。我甚至覺得係我飲過最好嘅啤酒 — 不過，亦好可能係我浪漫嘅想像，加上幾日幾夜冇啖好食，有啲正常嘢就覺得好好飲。應該都搞次Blind Test．丹東我就唔去，北韓都冇打算再去，但聽聞首爾有。下個月就去試下。唔使等再去北京
科學啲嚟講，就話其實因為北韓太窮，窮到污染都冇（真？），所以啲水最靚咁話。另外，個人口味，但大同江啤酒酒花含量低，可能我比較鍾意。仲有導遊（英國佬）補充，啲大同江啤酒好似冇消毒冇防腐，所以不能放得耐，亦夠晒純正。
講開，呢個大同江啤酒，其實歷史唔長。係千禧年嘅事。係肥仔金個老豆金正日引入嘅。設備係英國嘢，即時明晒。之後仲有德國技術。2009年呢隻東西仲拍咗北韓電視史上第一條商業廣告。兩分幾鐘架大佬!（http://bit.ly/2zmB6mt）
真係唔呃你，在北韓幾日，的確冇啖好食。對，我是麻撚煩嬌生慣養的港仔，但都係講事實。當然唔會食唔飽，實飽。我亦唔會拎幾個杯麵入北韓（話時話，酒店好似有辛辣麵賣）。
即係，早餐反而還不錯，有麵包有豬內。啲正餐（午餐晚餐）係唔掂的。除咗最後一餐韓燒（北韓當然都有韓燒）鴨肉好啲。
而第一晚就係最唔掂，因為睇完大匯演《阿里郎》，好似成九點幾十點先返酒店，當然就剩低啲咁嘅東西。
又話時話，有狗肉食的說！有幾出奇？南韓都有狗肉食。最正嘅係，呢味東西係要加錢先有得食的，要預訂。結果得一個團友（鬼佬）舉手要食。而更正嘅係，去到真係食時，其他啲冇畀錢嘅鬼佬鬼婆又話要試一啖，嘻。仲一路食一路講poor puppy，虛偽到。
________________________________________
最後嘅一個故事：
話說去北韓平壤，嚟嚟去去都係住嗰一兩間酒店，我地就住羊角島。當然唔會玩半夜閃出去呢啲嘢。酒店有賭場，但全部係大陸佬。好似有得唱K，但冇玩。更加正係有乒乓波打 — 本身唔特別，但如果你一個去呢，個北韓大媽服務員會係落場同你對打戥腳的！
呀仲有，按摩。當然係正骨。
我同朋友一齊膽粗粗去試，咁當然係兩個加埋過百歲嘅北韓大媽。識講啲普通話，但明顯聽到唔係母語。我地兩個入去到，係同一間房，兩張按摩床。然後大媽甲同我講：「你，脫衣服」。
於是我照做
然後大媽乙同我朋友講：「你也脫。」
於是我朋友都照做
幸好佢地下一步唔係叫我地互摸格劍。
好啦，按摩按摩，呀北韓大媽對我地相當有興趣，係咁聊我地傾計。特別係問完我朋友做乜，同埋我做乜，之後。好似仲有問埋我地結咗婚未（！）
然後按按下，其中一個大媽，用啲機械普通話同我地講：
「要不要我們去喝啤酒，大同江啤酒」
咁，就當然bu qu啦。唔係大唔大媽問題，即係如果係後生女仲驚。但大媽都好，都驚嘛。
但，留意，大媽去引誘我地地嘅，唔係LV 唔係 靚車，就係，大同江啤酒。
