【#狂迷投稿】 《Tom And Jerry 大電影》
\\ 力Sell 新潮但更老套 \\ 文：電影人在野
「老套，真係好老套。」呢個係我走出戲院後最大既感覺。
.
雖然人到中老，但係有時對有興趣既兒童電影都會入場睇，例如《古靈精怪大酒店》、《美食瘋球》、《樂高大電影》，適時調低智力，同在座咁多位小朋友一齊睇一齊笑也融融。
.
坊間兒童電影有兩種，一種係打著正宗兒童旗號比小朋友睇，一種係大人小朋友睇都有樂趣。後者例如彼思既電影，大部份係大人眼中都有另一種含意同教育意味，而《Tom and Jerry大電影》想做到前者，但可惜係唔成功。
.
係我入場既時候，其實都有十零位小朋友一齊睇，但記憶中係無乜笑位，呢一點已經係一個另類指標，顯示套戲有著根本上既缺憾：
.
《Tom and Jerry》卡通原版係1940年代問世，直到現在已經有近八十多年歷史。但係咪代表佢係表現手法上已經係落後於時代？非也，如果拎番數十年前既Tom and Jerry出番黎睇，你仍然可以從當中獲得大量樂趣（不管你係成人定小朋友），原因在於畫師既無窮「想像力」、高強度同跨張既「表達手法」以及無盡既生命力。
.
例如Tom比Jerry用同一種道具打中同一隻手，但係Tom 仍然可以有數以百種既表達方式表現出黎，以及展示唔同程度既「痛苦」，最後達至一個更巨大既復仇，如此類推直到完場。但無奈此一大賣點，係只合適係三十分鐘或更短時間內去做「單元式」既展示，同時創作者又無諗過點樣有機咁「融合」係90分鐘既敘事入面，變左兩邊各不討好：Tom And Jerry互相角力過場太快、無新意又無記憶度；同一時間故事亦變得不細緻。
.
而另一點我認為係缺點甚至係死因，在於創作者定位角色上既尷尬，Tom 同Jerry係動畫入面係唔講野，但同一時間所有動物都係無講野（如果有單元有動物說話過可以作出指正），咁樣至少所有動物都有同一性。但係電影入面，只有Tom 同Jerry係唔講野，但但但但但！其他動物竟然識講野溝通既？個統一性令到某Ｄ位置兩隻貓鼠變得非常尷尬，彷如啞巴。
.
呢套電影，係其他層面仲有好多好多唔同類式既沙石，例如人類角色唔知點解好低智、例如點解預告講明Tom And Jerry係同伴離家之後係紐約重遇，但正場無左回事、例如角色之間無甚火花、例如配樂係喧賓奪主……
.
《Tom And Jerry》盛載住既係我地一代人（或者只係我）既回憶，係童年尚在牙牙學語既時候，已經識得一貓一鼠大戰，而今次比我既回憶，竟然係一種巨大既失望感，可惜。
.
×☝🏽☝️☝🏼多謝投稿！有嘢想講，都歡迎各位投稿分享你嘅睇法～×
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你起頭！
.
*追蹤 instagram【 madman.movie 】有你著數！
*// https://www.instagram.com/madman.movie/ //
*
*緊貼【 電影狂人-影評情報交流平台 】獲得最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
