日本有句諺語話：『富士山、一度も登らぬ馬鹿、二度登る馬鹿』
意思大概就是：『無爬過富士山的人是笨蛋，爬第二次的人都係笨蛋』
真係珍珠都無咁真！
而我覺得如果你唔俾錢我再上山我係唔會再爬，
因為真係好撚辛苦。
想係到同想爬富士山既朋友講聲，
富士一年只係開幾個月，
全世界唔同地方既人同日本人，
都會趁呢個機會沖去爬山。
所以如果你要book山小屋要5月開始book喇！
我7月book既時候，
得返封山前一日既其中一間有2個位。
其實真係唔係想像中咁簡單。
我初初以為行下行下就上到頂，
但係去到六合目既時候，
我已經見到好多人途返。
心裏面仲笑鳩D老弱婦孺咁快收皮，
都唔知原來最戇居又係我地自己。
因為坐凌晨機既我一落飛機直接去富士山山腳，
到步之後已經中午12點幾，
仲未知道原來我地起步時間係好遲。
四條友仲好high咁慢慢食野同影相。
由五合目到六合目好快一個鐘已經上到去，
但由六行到七合目用左2個幾鐘先上到，
見到個鳥居仲以為自己攻到頂，
望望個錶5點，
我地先驚覺原來仲有成2合目未上，
當時既我地已經用左8成精力。
加上越向山頂進發空氣越稀薄，
呼吸就越黎越難，
行到每步心跳每分鐘160 左右。
個天已經慢慢入黑，
無左太陽既富士山，
加上海拔高度變得越黎越凍。
無哂體力既我，
背囊就好似越來越重咁。
雖然一直向上行，
但眼見人流越黎越小，
個心就好急想快d想到山小屋又好想放棄，
岩岩仲笑人地六合目走人。
依家上到七合目走又走唔到，
上又唔夠氣，
無鬼用既我又眼淺，
又不停係咁話好想返屋企。
不過呢次，
我再唔係一個人。
Elmo一手攞起我個背囊：「我咩」
就咁佢就一個人咩左2個份量人既背囊。
大佬彭同bowie 分左一個行山扙俾我，
叫我:「軒姐加油啊，我地間山小屋係9合目，你仲差小小咋」
我點可以令佢地失望呢，
雖然行幾步又停，
但咬緊牙關繼續行得一步又一步咁上。
下午6點，
無街燈既富士山變得柒黑一片，
所有人都打開頭上既頭燈，
富士山好似有好多隻螢火咁，
一點又一點，
突然又消失幾隻。
最後天公不造美，
竟然落起雨黎，
條路變得更加難行。
山小屋講到明最後check in 時間係7點半，
過左時間就唔會俾你入屋。
姐係時候開始倒數，
一個合目要個幾鐘上，
我同Elmo 住八合目半，
只要唔休息就可以趕到。
最慘既係bowie 同大佬彭，
佢地住九合目呀！
佢地真係同時間比賽，
叫我地加油打氣之後，
頭也不回急步向上沖。
我轉個頭回望Elmo，
佢因為同我攞左個背囊失去更加多體力，
行到慢到成隻龜咁，
連個咀都白哂。
於是我咩返個背囊同佢一步一驚心，
連同雨水同汗水默默咁行，
其實佢真係好man。
最後7點45分，
我地終於上到山小屋。
我地係最後2個客人到，
唔夠15分鐘就已經要食晚飯，
因為9點就會全旅館都會停止服務。
又因為山小屋係山上唯一提供食物同住宿既地方，
所以日本人全部都做返自己，
極度無禮貌！
我到今日都記得，
我地食個炸雞飯既炸雞個心係冰嫁，
就未解雪藏，
咬到sot sot 聲都無人理。
Elmo 最後買左個杯麵俾我食，
攝氏一度底下，
我雙手接過合味道咖哩味杯麵，
雖然依然唔好味，
但100度既滾水隔住發泡膠嘅溫度，
足夠溫暖我整個疲累嘅身軀。
食飽之後，
Elmo係背囊抽出2支香煙：Hinny 富士山頂食番支煙？
Sure la !
著上羽絨走出山小屋，
由無街燈污染既富士山頂俯望出城市，
我深呼吸，
感嘆我住左呢個城市3年，
佢係第2個扭轉我性格既地方，
其實佢都幾靚。
但係我左望右望，
有好多咩住背包既登山者問山小屋有仲冇位，
係佢地以為唔洗予約就可以直接住山小屋，
有啲就以為可以係山頂訓一晚，
有d就以為一日就可以登頂。
好多好多以為，
所以佢地係寒風中無得住又落雨情況下，
坐哂地下又訓唔到。
食完呢支我人生中最高3250海拔香煙之後，
我入返小屋，
其實間小屋一D都唔小囉，
睇相你會見到一行會訓二十個人，
仲要有上下格床。
唔理咁多喇，
因為第朝早要趕上是山頂睇五點日出，
所以我要2點起身開始上山。
係呢個時候，
收到Bowie 既信息，
佢話佢地都安全到步喇，
我地聽日係九合目會合。
我帶住擔心又好攰既心情，
又聽住好多人鼻鼾聲幾秒就訓著左。
因為五個鐘打後，
我將會係零下五度，
真係用手爬山上...... 下一篇：風雪交加攻頂記
#日本 #旅行すきな人と繋がりたい #富士山 #人像攝影 #旅行 #bookshop #hkig #travelphotography #travel #travelblogger #traveler #vintage #iphonexs #vsco #utravel #japan #日本 #agoda #visitkyoto #写真好きな人と繋がりたい #shorthair #explorejapan #japantravel #japan #hkiger #旅遊日記 #遊記 #長文 #長文慎入
