《容許我今晚上一上鄺俊宇身，做一個多愁善感嘅「逗號」》
話說呢兩個幾星期，我約咗好多好耐無見，甚至第一次見嘅朋友食飯...
食飯大概唔係重點吧，重點係佢哋都帶同我本新書，話要拎我簽名。呢件事令我諗起一年童年嘅往事...
話說小時候，抽yes card(可能有啲小朋友唔知咩係yes card，我唔多作解釋啦，你哋啲小朋友而家得部ipad 真係少咗好多人生樂趣)，有啲 yes card，係會邀請個個明星簽個名，之後佢就會印九萬幾張再不停俾人抽，而當時我有懷疑過，根本唔係明星簽，係yes 自己嘅員工簽上去嘅。
我呢啲咁白痴嘅小朋友，有試過扮明星練習簽名，而簽名嘅重點係，要學大人咁，好地地寫咗自己個英文名之後會撩兩撩，畫花個簽名，總之搞到個簽名好似俾八號颱風吹風咁先叫型。
而我最白痴唔只係扮明星練習自己簽名，仲要揾啲紙仔不停簽自己個名，然後派俾朋友，再同朋友講「好好保留我個簽名，第日我成名之後，個簽名就會好值錢，好多人想要」。
每次我諗返起呢件事，都覺得好丟架... 因為當時我睇咗妙手仁心，覺得陳慧珊好型，於是我當年簽咗好多annie 嘅名，俾咗好多我嘅朋友。如果今日佢哋再拎返個張簽咗annie 嘅紙俾我睇，我會好想死。
※※※※※※※
呢兩個星期，好多朋友都話好想要我嘅簽名，平時我簽得最多嘅就係信用卡，我真係估唔到我簽嘅唔係銀行簽名，都有咁多朋友話想要。
我其實好明白我個簽名嘅意義，就係朋友們都好為我開心，所以約朋友食飯，好耐無見嘅朋友，甚至第一次見嘅朋友。用簽名做一個excuse，出來見面，再不停交換大家嘅mindset，個種感覺... 好正。
我呢個星期，同唔同嘅朋友，由生活美容，政治經濟，甚至個日約朋友出來由我出書討論到亂倫，真係好正，思想exchange 呢個process，真係好有高潮好high。
※※※※※※※
有好多朋友留言問我一個問題，之前都無正面咁回答...「有無簽書會」？
我有想像過，可唔可以好似慈禧太后咁，垂簾聽政咁樣同大家簽書。「你咁唔見得人咩？」其實唔係，我唔醜(我自己覺得啦)，問題係，露面要付出嘅代價，我就唔太想承受。例如，如果俾人知我係邊個，我講職場野仲可唔可以咁暢所欲言呢？又例如，人人都知我係邊個，而我又不停講政治經濟，會唔會有一日無啦啦有人上門生擒我，捉咗我去酒泉衛星發射中心，再擲我上太空呢？
呢一切都未諗得通嘅時候，大家就俾我宅宅咁，好似鏗鏘集個啲打格受害者咁，默默地存在吧。
PS. 我好鐘意出版社 創造館 呢張promotion ad，因為我呢啲斤斤計較嘅女人，最鐘意就係我本書大，其他書細，但... 呢3本書我都有，好好睇。我有提議過，如果一次過買哂四本，就送四個作者嘅簽名出去，出版社老闆就話「咁要搞聯簽喎」，有無人買哂四本？
#姐死姐還在
#三年零八個月
#呢兩個星期應該係呢世簽最多名嘅日子
【偷窺職場獵奇】究竟姐死喺之前的三年零八個月係做乜嘅呢？
睇下姐死自己點講先：
「直至今時今日，我都唔識點話畀阿媽知我係做咩……
真係好難形容花師奶係掌管咩部門，花師奶最大嘅任務就係湊公司老細嘅富二代sss。有無睇過清朝劇集，紫禁城有個地方叫阿哥所，啲娘娘生咗阿哥之後，就會send 去阿哥所畀奶媽湊。花師奶就係嗰啲奶媽，而我，就係奶媽嘅assistant。
如果你有睇創世紀，你就會知道，所有富二代喺daddy（公司老細）未死之前，其實都無咩嘢做，《創世紀》入面，秦沛個三個仔，大仔馬德鐘，二仔葉榮毅（aka李煒棋），同三仔吳奇隆都係終日無所事事。老闆有見及此，就會交低功課畀富二代sss做，理所當然，富二代sss從來都唔會「自己的事自己做」，佢哋會推畀奶媽做，奶媽就畀我呢啲細嘅做。我就係人型蜈蚣嘅最後一個participant。我阿姐食嘅屎，一路傳，pass 咗幾轉，將舊隔過幾隔嘅屎屙入我口中。
做咗3年幾，我做咗啲咩「對社會有貢獻」嘅事？Er…… 真係無甚貢獻，虛度青春。」
———————————
閱讀理解題嚟喇：究竟姐死喺之前的三年零八個月係做乜嘅呢？
A. 人形蜈蚣第尾果節
B. 阿哥所嘅奶媽
C. 富二代嘅後宮
D. 地產大財閥嘅妹仔
E. 以上皆是
#姐死姐還在熱賣中
#各大書店有售
#買咗又睇咗嘅讀者留言話笑到肚痛
#唔敢喺地鐵睇因為驚笑到瀨屎無廁所
姐死姐還在
史兄 庸材 馬菲
