【蜜兒廚房】跟蜜兒食遊世界 — 大阪京都篇 | 七條甘春堂和菓子體驗班🍡
講得日本深度遊，當然要學埋日本嘅傳統文化啦！今日就黎到1865年創業至今有152年上百年歷史嘅老鋪 — 「甘春堂」，喺京都有好多間分店，其中兩間就附設和菓子教室：[甘春堂 東店] 京都市東山区川端正面東入る茶屋町511-1 [甘春堂 嵯峨野店]京都市右京区嵯峨釈迦堂大門町1-1。☝️🤓而我地選擇咗體驗地點係甘春堂東店，位於豐國神社之前。
今次學嘅係日本傳統和菓子 (わがし)，以前係進貢嘅點心黎架... 同法國甜品一樣細緻啊！簡直係食得落肚嘅藝術品。
首先，店員會請我地到地下嘅等候區，每人俾條圍裙你，上到去第二層，我地要清洗同消毒雙手，哩個過程要確保你手一定係乾淨💦👐，因為一陣都係用手整比較多。咁就可以埋位喇！一開始師傅會自我介紹，同少少和菓子嘅歷史，日本傳統和菓子 (わがし) 是以含水量多寡來區分，有分乾同生，乾菓子係同黎答謝用或節日時食嘅；生菓子就係日本重大慶典或茶道時先會食，（課程內容會隨著季節變化，每個月都有不同生菓子）所以佢亦都有講到今日要做嘅和菓子係邊幾款，每款所用嘅技巧都唔同，就由從最簡單的開始做喇～
課程全程係日語教學，另外仲會準備英語、韓語、中文食譜解說，因此唔係講日語嘅遊客都唔洗擔心。上堂前師傅已經準備好所有材料，包含各種顏色同量好晒份量嘅麵團同內餡。
今日會做三種上生菓子，一個乾菓子，係冬季限定版本 — 紅葉篇（🌸蜜兒覺得櫻花版仲靚🌸）
/ 製作過程
💚乾菓子 彩糖片（ki za to）— 紅葉🍁
有一塊彩糖片俾你，用麵粉棍整到佢薄一薄，再用模具整2塊，跟住用木棍勾線，將紅葉的葉脈表現出來。但蜜兒就貪少少，夠位整到4塊～
彩糖片係用寒梅粉（寒梅粉係：將糯米蒸成餅狀麵糰，再焗成煎餅狀，磨成粉末後便製成寒梅粉。富澤的寒梅粉特選日本產糯米製造，可以用於和菓子、豆菓子中。），砂糖同寒梅粉混合粉中加入少量水揉成。
💚生菓子 花雕甜團兒（nai li ki li）— 京嵐山 及 山茶花🌺
係用糯米粉等用水蒸後做成麵團。
京嵐山🍂係做一塊漸變嘅紅葉咁嘅，將橙色先壓扁，加入紅色再用指尖掃向下，係稍有難度造型比例精細啲，先做咗漸變果部份先，再以指尖捏合花瓣造型，然後用三角木工具刻出瓣形，尾部要用指尖拉長再修整一下就完成了。
技巧越來越難喇！😯到山茶花時係先將粉紅色收埋入白色中間半透出黎，再用濕布啲紋整出嘅，最後一壓拎粒黃色過篩網，拎筷子夾起點上花蕊，即和菓子花中間即成。
金團（kin tong）— 紅葉賀
壓過即幼藤制嘅細隔篩過濾，將料做成細小嘅條狀，最後用筷子夾起細細地咁貼上紅豆餡外層周圍包住內餡。
生菓子含水份💧較高，手嘅溫度同接觸空氣嘅時間都會影響到口感和外觀，例如太乾表面佢輕微裂開～
/ 品嘗時間
和菓子就咁食個和菓子就比較甜，最後就會有杯抹茶🍵比你即場飲同享受成果。
不過可能賞味限期係即日整就要即日食嘅關係，都好難擺多幾日～
👩🏻🍳蜜兒學後感
其實有啲似泥膠咁，但又唔可以太大力，一大力又係會做衰，所以手勢好重要，加上要經常濕下對手防黏手，係有啲難度嘅！🤔🤔不過講真，哩門傳統手藝都唔係每個日本人或日本媽媽都識整架～ 反而我又覺得幾好玩，睇下會唔會再深入啲研究再教大家啦！
❇️提提大家，去之前記得要網上預約啊！
和菓子製作體驗費用：2160円 (包含抹茶以及季節和菓子 4 樣)
和菓子製作體驗時間：每天 9 :15/11 :00/13 :00/15 :00 四個時段，上課時間約一小時又15 分鐘。
線上預約：http://www.kanshundo.co.jp/museum/make/school.html (三天前預約) (當天到到店裡也可報名。)
📍地址：京都市東山区川端正面東入る茶屋町511-1
📞電話：075-561-1318
⏰營業時間：9:00~18:00
🚃交通：巴士 — 從京都車站乘搭京都市巴士206 / 208號於「博物館三十三間堂前」下車，步行5分鐘。
🖥網址：http://www.7jyo-kansyundo.co.jp/
