由始至終，我只有一個女朋友（下）
上集：https://bit.ly/3e506mc
呢個機會，唔係拍拖嘅機會，係得知真相嘅機會。
我約Betty上我屋企飲酒，飲咗幾杯，我同佢講，我明白佢嘅心意，但因為我之前嘅經歷，我必須拒絕佢。
Betty含情脈脈咁同我講：「唔緊要，我會等你，會陪你走出陰霾。」
我估到佢會咁講，因為雯姐同清兒都講過類似嘅說話。
「我命硬克妻，同我一齊嘅女人都會死於非命。我唔想再害人，但我都唔想忍受冇愛情嘅餘生。」我拎出一把刀：「所以我決定，一死了之。」
「痴線。」Betty用力搶走我把刀。
「你依加搶走把刀有咩用呢？一個人要死，冇人攔得住。」我輕嘆一口氣。
Betty苦口婆心咁講：「你之前啲女朋友嘅死，都唔係你嘅錯，你何必怪自己？」
「但我接受唔到，我就係咁脆弱，我就係要自殺。」我答。
Betty一時語塞，諗唔到點勸我。
我指住門口：「我已經決定咗，你可以走啦。」
Betty糾結咗好耐，終於用糾結嘅神情，講出真相。
原來佢就係心心、雯姐同清兒，四個人根本就係一個人。
或者講，根本唔係人。
佢係一隻女鬼，好不容易修練到奪舍嘅法術，第一次就成為咗心心。
佢識到我，愛上我，但同我拍咗一輪拖，發現自己嘅身體開始腐爛。
佢初時以為係病，仲去咗睇醫生，但完全抑止唔到呢個情況，佢好快就「病」死咗。
由於適合奪舍嘅身體，唔係咁易搵，所以佢都飄盪咗一段時間，先搵到雯姐。
做咗雯姐之後，佢再不著痕跡咁接近我。
但佢知道幾年後，呢具身體就會腐爛，所以喺腐爛之前，佢就衝出馬路，「意外」身亡。
下一個就係清兒……
「我好愛你㗎，無論變成咩人，我都想同你一齊。」
Betty捉住我隻手：「為咗同你一齊，有時遇到適合奪舍嘅男人、細路女、豬排……我都唔會揀，我寧願等吓。」
我難以置信：「所以你殺咗好多人？」
Betty話：「唔係殺人啊。我係想話你知，你唔洗驚我會死，因為我好快就會返嚟。」
「為咗一己私欲，你將人哋嘅靈魂擠出身體，身體幾年後就會腐爛，再搵下個人……咁仲唔係殺人？」我質問佢。
Betty仲想反駁。
我好認真咁同佢講：「我冇辦法阻止你，但我接受唔到咁邪惡嘅行逕，我亦唔會同你一齊。」
我狠狠拒絕咗Betty，佢冇放棄，入咗我公司做我同事。
就算我日日都見到佢，我都冇理佢，冇接受佢嘅愛。
幾年後，Betty死咗，另一個女仔出現，我知道佢就係Betty。
但無論佢點做，我都唔會接受佢。
十年後，我患上癌症。
我到處求醫，但情況一日比一日惡劣，劇烈嘅疼痛、死亡嘅恐懼纏繞住我。
無論有咩偏方，我都去試，傾家蕩產，但換來嘅只有失望。
然後，一個女人出現喺我面前：「我係心心、雯姐、清兒、Betty……」
我問：「你嚟笑我？可憐我？」
「我愛你啊！」佢講：「所以我想救你，我有一個方法，令你可以活下去。」
我坐起身，目光灼灼咁望住佢。
「我可以教你奪舍，換一個健康嘅身體。」
為咗一己私欲，將人哋嘅靈魂擠出身體，身體幾年後就會腐爛，又要搵下一個受害者。
呢啲咁惡劣嘅行為，我……接受咗。
我唔想死，我唔想繼續痛落去，於是，我換咗一副身體。
我終於意識到，原來我冇我想像中咁有原則。
我可以理直氣壯咁譴責Betty，但當件事發生喺我身上，受苦嘅係我，我就毫不猶豫咁違背咗我嘅原則。
原來，有時候，人可以遵守原則，只係因為原則同自己冇利益衝突。
如果遵守原則，會深深地傷害自己，
咁仲可以遵守原則，先係真正嘅原則。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #由始至終我只有一個女朋友
