【輕鐵元朗站噪音問題】
輕鐵元朗站噪音問題已經滋擾YOHO居民多年，所以我地一上任就已經將呢個問題列為重點跟進嘅項目。我地觀察到近日情況越黎越惡劣，輕鐵經過彎位時所發出嘅高頻噪音嚴重影響街坊休息，有居民表示每日只有零晨一點至朝早六點可以享有片刻清靜，長期受噪音影響亦已為生心理帶黎極大壓力。
我地係2月20日首次同港鐵職員到現場視察，其間職員亦有解釋噪音問題成因同埋解決方法。
以下係當時我地認為有可能導致高頻噪音嘅原因：
路軌設計問題：彎位弧度太大，係全元朗以至成個輕鐵網絡最彎嘅彎位
人為問題：車長入彎速度過快，摩擦力引起高頻噪音
硬件質量問題：路軌及車輪老化
視察當日，我地睇到列車入彎速度唔算快，同場負責車長訓練嘅職員亦表示入彎車速係合理水平，車長並無違反守則。至於彎位弧度過大則屬於結構問題，短期內未必能夠解決，所以最後港鐵方面認為問題好大機會係由於路軌及車輪老化引致，同時承諾會係一星期內進行打磨工作，而佢地亦提過因為需要時間俾車輪「行順」，所以打磨之後一段時間（大約十日）仍會有噪音，希望市民體諒。
我地當時認為港鐵嘅解釋尚算合理，但係經過兩個幾星期情況依然無改善，所以我地就再次要求港鐵交代原因，佢地表示今次打磨之後同平時情況唔同，佢地嘅維修團隊正全力調查原因，希望我地俾多少少時間佢地，而我地亦落咗最後通牒，如果下星期亦俾唔到合理解釋，我地會發起進一步行動，包括但唔限於聯署、向環保署投訴等等。我地會繼續跟進，唔會俾港鐵用拖字訣拖到夏天（冬天要開窗噪音更滋擾）。
補充：增加隔音屏固然可以阻擋噪音，但由於果段路軌嘅上蓋係屬於新鴻基嘅臨時建築物，牽涉嘅持份者仲多，唔係話起就起，所以長遠都係要港鐵由根源解決噪音問題。
#我地日日都有跟進
#唔係淨講隔音屏就得
#元龍
#十八鄉北
#新元朗中心 #YOHOMidtown #GrandYOHO
