呢條片頭先9點喺YouTube出咗街之後，我老友睇完即刻打嚟：「講衰同事點解唔問我呀？我有個經歷仲衰呀！」
我：「衰得過條片入面丟咗實Q個麵包嘅同事？」
「都有得揮㗎喇！」
我：「願聞其詳。」
根據呢位老友描述，有次佢出差飛紐約，咁你知有時差㗎啦，佢瞓到半夜收到隔離team某senior同事send WhatsApp嚟，內容係：「幫我買呢幾對波鞋吖，啲相喺晒度。」說畢連隨有7次WhatsApp聲響，冇錯，緊接係send咗7對波鞋相過嚟。當時係紐約凌晨3點，我老友被嘈醒，睇完冇理到佢再繼續瞓。
我忍唔住問：「好熟㗎你哋？」
「唔熟呀！喺公司見到面都唔打招呼嗰隻，佢平時都係同返啲高層玩，正宗擦鞋仔，未講完，聽埋先，然後差唔多清晨6點，佢又再send msg嚟，問我收唔收到，叫我點都confirm一句，仲話如果買到就記得連埋鞋盒拎返嚟，唔好淨係拎對鞋。」
我：「你唔係幫佢買呀？」
「冇呀，我直接回：『我得一個喼，而家又冬天，我飛嚟已經爆晒喇，一個鞋盒都裝唔落，唔知點幫你裝7對，何況我冇咁多cash，卡數未找，買唔到，你搵第二個啦，美國朝早6點咋，我要瞓覺。」
我：「果然冇令我失望。」
「返到香港之後佢仲要畀說話我聽，特登行埋嚟我個位到講：『你就威啦，叫你買幾對波鞋都發老脾。』你見過啲咁衰嘅同事未？」
未！真係未！如果係我應該爆埋粗問候佢祖宗十八代，senior大晒呀？大家都係打份工。不過我都係覺得條片入面丟咗實Q個麵包嘅同事衰啲，因為佢蝦老人家，如果你哋遇到比以上或者條片裡面更衰嘅同事，請留言講我聽，唔係打算拍「衰同事列傳」續集，純粹係想自己心理平衡下🤦🏻♂️
https://www.youtube.com/watch?v=cs2pZW_iFwM&t=14s
