上個星期開車入西貢，諗住閒日入西貢少啲人，同埋海鮮會平啲。雖然本地及內地遊人不多，但係都有一車半車嘅外國遊客。外國遊客比較識得尊重人，講嘢冇咁大聲，所以唔會影響到我。
去到海鮮酒家區，見無論價錢同埋人流都差唔多，於是就揀咗一間我以前去過嘅嚟食。坐低叫咗個二人餐，＄388包括五個餸，算抵。雖然話免茶，但係啲酸薑蕎頭係計錢嘅，不過人哋都要做生意嘅，呢啲錢我唔會同佢計較。
先來一碟椒鹽鮮魷，真係好大碟，如果再加碗白飯應該都飽，之後就有四隻鮑魚仔，算係咁啦仲有白灼蝦添，都幾大隻。本來都幾滿意，點知佢上一條蒸石斑，一打開條魚，成條淺啡色，我招招手叫侍應埋嚟，佢睇一睇講都唔講嘢就拎走咗條魚。跟住上咗碟白菜，碟菜好大碟，但係啲菜有啲苦。到最後佢換番條海上鮮俾我，不過今次差好多啦，只係一條䱽魚，同埋你要留意下幅相，條魚上半身有一個大窿，正路應該要換，但係已經換第二條，唔通你想人哋加料咩。於是𢲡𢲡聲食完回府。呢間我以前食過，真係唔錯嘅，唔知點解今次條魚咁差！希望只係個別事件。
尋日越諗越唔順氣，於是自己走去街市買咗＄50一盤有八隻嘅鮑魚仔，另外$40半斤泰國跳跳紮嘅蝦，加埋一舊蓮藕都唔使＄100，用最簡單嘅方法，唔使20分鐘搞掂三個餸，再開支白酒，抵玩美味之餘，仲食到自己攬住個肚添😋。
#何嘉麗callmegaga #何嘉麗 #為食路上 #唔通真係要我出手至有好嘢食
