(8:00)
士佳：昨日同大家上完一課，未夠喉，反正做了淡，嗰市繼續陰陰跌，冇乜好講，最多平倉再提，今日再同大家上多堂心理課。近日大市下跌，純玩股票嘅朋友，有所損傷，正常不過，但我飯局聽到有同學自怨自艾，話點解無聽我講大市會跌，仍然買入港交所騰訊之流，其實，自怨自艾冇用，浪費時間，倒不如檢討一下，力求改進。大家話我技術跨啦啦之時，我總想借個機會重申我不是一直順風順水，也只是從失敗中改進而來，雖然我已在堂上講過很多次，但我覺得都值得大家一睇再睇，所以今日特意收起一貫的嬉皮笑臉，希望同學一起與我上一課。
尋日我已有在FB提及，但我驚其他所有朋友睇唔到，今日特別寫多次，講講自己之前輸錢的日子，其實這段日子確實比做小販的日子更難捱。記得2010年和舊公司搞左隻Hedge Fund，Fund Manager 是我老友，後來Fund man離開公司，我便充當其職，原來當時我的技術經已過時，加上受官司困擾，當刻投資真係鋪鋪輸，輸到連自己都唔信，整個投資節奏都錯曬，正如我係火速節目度講過，真係連牛頭角師奶都炒得叻過我，到2012年蝕了近五成資金。
後來受到停牌事件上影響，基金就交由Benny 管理，雖然唔再係由我管，但我責無旁貸，雖則困擾，但自己性格知道光是困擾沒有實際用途，所以唯有再檢討手上系統，才發現以往一直深信的勢變及型變，已不夠力戰勝無勢QE市，但我又不能親自落手參與，遂決定運用電腦分析，加入質變量變，希望電腦代替我，協助Benny打這場硬仗，在不同市況都可以找到獲利模式。初版完成並測試後，我將系統交給Benny使用，但FUND亦需要用上兩年多的時間，才升番六七成，令到總虧損收窄至10%左右。雖然捱得好辛苦，但當然希望一起收復失地，但公司被收購後再不支持Hedge Fund業務，有新客都不能收，有再好的方法，在資金有出無入下，AUM日跌，令成本不斷上升，加上公司縮減人手，只得Benny一人處理基金所有大小事務，如此情況下，亦實在難以維持表現，加上大市已升至非常唔合理嘅水平，遂主動與所有投資者一起開會商量，將利弊一一分析，最後，大家同意一起共同進退，整體一起主動關閉基金。後來大跌市來臨，大家雖然慶幸避了一刧，但我仍很遺憾唔夠時間反敗為勝，實在對不起一直支持我既朋友。
呢段經歷，我從未敢忘記，因為當中亦得到很多啟示，希望透過每次主動分享，同學可從中借鏡，投資又好，人生又好，總遇到勝敗得失，無論曾經有幾咁失敗，總有大家可取之處，終日坐困愁城，於事無補，有時反而接受失敗，擁抱失敗，自知不足，知己知彼，還有一線生機，前幾個月才剛開始入市嘅朋友，何必浪費時間怨自己，我人生大上大落，蝕的錢何其多，但蝕錢往往成為改進的起點，如果唔係就無今日既系統。此外，改用軟件後，人人讚我舖舖中，順風順水，有時難免沾沾自喜，感激不時有網友指正，亦特此為文警惕自己，不要忘記再好既系統，也只留給有準備既人，再好的成績也是由爛極的表現衍生而來，成功又好，失敗又好，對市場都要有謙卑之心，感謝網友當頭棒喝，不勝感激，期盼大家繼續互勵互勉，做足功課，積極迎接未來的挑戰。
