旅行時身上既裝備、隨身物品，由我第一次一個人去旅行開始直到而家，有好大既轉變，因為經歷過先會知帶錯野係可以糟蹋成個旅程，所以今次分享一下打包經驗
- 隨身電腦
- 我買電腦既要求係最輕巧，要拎出街都唔會有壓力，咁樣部電腦先真係會用。去旅行時帶電腦黎做乜？其中一個用途係應付長途機，好簡單，訓唔著就用部電腦睇下電影，如果係有寫開遊記既，眼光光果陣寫下文章就掂哂
- 隔音耳筒
- 都係應付長途機既良伴，我用既係擁有降噪功能既耳筒，即使飛機內強勁噪音都搞得掂，試過聽 Jazz 都聽得好舒服，試過就會知
- 信用咭及小量美元 (US dollar)
- 帶信用咭好正常，帶美金做乜呢？又係應付長途機，今次係關轉機事。去歐洲買平機票的話，一般都要轉機 (試過響中東或印度轉機)，好多時都要停留響機場好耐，咁耐時間可能會食餐飯買下野，呢個時候用信用咭比錢就掂，不過試過唔止一次信用咭機壞左，要比現金，呢個時候美金就用得著，因為美金流通量高，試過直接比美金商店都收，唔收的話就去兌換店換當地貨幣 (不過 so far 都係直接比美金搞掂)
以上幾項都係同長途機或者轉機既旅程有關，如果轉機時間好長要訓覺的話，好多機場都有 locker 或者附費休息室 (甚至酒店)；或者可以考慮離開機場出去玩半日，試過響莫斯科轉機，要等 15 個鐘，所以搵機場人員幫忙，出左去莫斯科市中心玩
去到當地之後，電腦同耳筒都會放低留響住宿房間，因為出街玩都用唔著，跟住就換上出街玩既用品：
- 護照 (唔駛解釋卦)
- ATM 提款咭
- 用銀聯去台灣、日本拎錢已經係好方便同埋匯率好靚，原來去到巴黎同莫斯科都一樣拎到錢，完全係我意料之外
- 充電器
- 最近幾年去旅行我都只係用電話影相，無再帶過相機，因為方便輕巧而且質素好好，好多朋友、網友都唔敢相信我影既相係來自電話，況且仲可以即刻 share，因此電話就係我既相機，充電器對我黎講變得非常重要
- 地圖 app
- 出發前，我會將所有想去既地方響地圖 app 入面儲低哂。玩完一個地方之後，即刻打開地圖睇睇附近有無想去既地方，呢個玩法一來有效率，二來唔需要帶旅遊書或資料，減輕重量負擔
- 拍攝穩定棍
- 呢個係我呢半年新加既旅遊配件。試過坐船出海，本來好大浪既環境，拍完 video 出黎睇到好似風平浪靜咁，效果實在厲害
- 雨遮
- 我揀縮骨遮同埋要最輕身既，目的就係要減輕重量負擔
我既隨身旅行裝備就係得咁多，一切以輕巧為主，而最近開始會用背囊去裝哂以上既野。之前第一次去歐洲旅行，去八日但係只去荷蘭一個國家。當地非常流行同埋鼓勵以單車代替步，尤其是阿姆斯特丹 (Amsterdam)，街上面唔係單車就係行人，好少見到車輛。當時我習慣用 tote bag，以為踩單車無乜問題，實戰就知道好辛苦，因為買得多野放落 tote bag，踩單車就會好難平衡，加上當時夜晚得兩度又落雨既天氣，諗返起都慘。經歷過之後，而家好多時都改用背囊，踩單車即刻變得輕鬆
講到背囊，最近發現左有 PacSafe Intasafe 既防盗背囊，佢既物料有 RFID blocking，即係可以防止身份證同埋信用咭上面既晶片資料比人盗用；仲有隱藏既 eXomesh 防割不銹鋼絲網嵌入織物，防止比小偷𠝹開背囊偷野，而背帶都好難𠝹開。去治安差既地方旅行，帶住呢個背囊就安心好多。如果之前去巴黎果陣用佢，應該會玩得開心好多，因為每個朋友都話巴黎好危險、好易比人打劫，而且巴黎我係以踩單車為主，呢個背囊會大派用場啦
Log-on Summer Gateway 詳情 - http://bit.ly/2tOOXke
LOG-ON official page
Photo by Tung Tung Pang
都市遊魂
#分享就是力量 #SummerGetaway #去旅行帶乜野好 #外遊懶人包
