我阿爸係凶手（下）
上集：https://bit.ly/2AASVCk
估唔到，查案嘅過程中，其中一個幫我手嘅朋友，將呢件事洩露咗出去。
莫麗案搵到真凶！
呢個消息掀起軒然大波，阿爸嗰邊嘅親戚，同埋阿媽，都怨我多事，敗壞家族嘅名聲。
我手足無措，我一心想查出真相，但仲未諗清楚，查到真相後應該點做。
呢個時候，我得到好多陌生人嘅支持，佢哋讚我大義滅親。
佢哋話，雖然我阿爸已經死咗，雖然單案已經過咗四十年，但時間，並唔係縱容罪惡嘅理由。
仲有人同我講，哪怕凶手無法受到懲罰，但搵出多一個凶手，就可以更理直氣壯咁告誡世人，天網恢恢，做壞事終會被揭發。
我終於明白我嘅目標，甚至產生咗一種使命感。
我雖然一生正直，但講成就，前半生都算庸庸碌碌。
話唔定我嘅使命，就係揭破呢單懸案，只要可以揭破邪惡，我受少少苦算乜嘢，再苦，都苦唔過莫麗死前嗰四十個鐘。
但呢個時候，政府出咗一個聲明。
佢哋唔承認，我阿爸係莫麗案嘅凶手，莫麗案依然被列為懸案。
唔承認嘅理由都好簡單，喺「無罪推定」原則下，我提供嘅所有證據，都唔足以令一個人入罪。
職業係醫生、之後移咗民，當然唔係罪證；佔有慾強、唔容許背叛，只係我嘅一面之詞。
唯一嘅實際證據，就係80%相似嘅筆跡。
單憑筆跡，法庭唔會將一個人判斷為凶手。
假如阿爸仲在生，呢啲證據足以令佢有重大嫌疑，然後會有人審問佢，查佢嘅行蹤，搵出更多蛛絲馬跡……直至破案。
但阿爸已經死咗，加上事隔四十年，好多證據都搵唔番，我拚盡全力都只搵到咁多證據。
不過，現有嘅證據，加埋我對阿爸嘅了解，已經足夠令我認為，佢係凶手。
唔止係我，大部份人都認為，我阿爸係凶手㗎。
只有政府唔認同，只有墨守成規、下下都要講程序、講制度嘅政府，唔認同呢件事。
莫麗案，依然係「懸案」。
我接受唔到呢個結果，我要將呢件事傳開去，令全世界人都嚟評吓理，到底我阿爸係唔係凶手！
我將呢單案，同埋我查找證據嘅過程，寫成一本書。
本書大賣，仲有電影公司買咗版權話要拍戲，我好開心。
開心唔係在於賺到幾多錢，而係我想得到大家嘅認同，用公眾壓力去揭破邪惡。
但事情嘅發展，愈嚟愈出乎意料。
開始有一部份人認為，我阿爸唔係凶手，一切都係我屈佢，動機就係想增加本書嘅銷量、想成名、想發達……
簡直荒謬！有無人會為咗寫一本書，誣衊阿爸係變態殺人犯？
我即刻走出嚟，公開反駁呢啲荒謬嘅言論。
我反駁得愈多，反對我嘅人就愈多。
佢哋無咩實質嘅證據，但就係唔信我。
我嘅年紀愈嚟愈大，我生命中最後嘅日子，幾乎都花喺辯論上。
但直到我死前嗰日，我都無法說服所有人，應該話，至少有一半人唔信我，認為我係搏出名、搏銷量。
我將呢件事傳開去，只係想有多啲人支持我，令政府承認我嘅調查結果。
估唔到，事情傳開去後，反而多咗好多人唔信我。
或者，人總係相信自己發現嘅嘢，而唔相信人哋努力傳開去嘅結果。
你雲淡風輕地洩露一個秘密，人人視之為真相；
你聲嘶力竭地講一個結果，大家就會懷疑你嘅動機，將你講嘅嘢當成謊言。
我哋以為，我哋在乎真相，但好多時候，我哋留意嘅，係講真相嘅姿態。
－完－
真人真事改編自「The Black Dahlia黑色大理花」一案，40年代，Elizabeth Short被虐殺。
由於死狀慘絕人寰，故被稱為第二次世界大戰後，加州最駭人聽聞的慘案。
逾千人被調查，但至今尚未破案。
後來，Steve Hodel發現父親藏有Elizabeth的照片，展開調查，發現種種疑點，但都無法構成直接涉案的證據。
80年代，James Ellroy出版了驚悚小說《黑色大理花》，並相信Hodel的父親就是真凶，後來小說被改編成同名電影。
將專頁設定為「搶先看」/ "See first"，最新故仔馬上睇！
我嘅職業係：網絡獵人：https://goo.gl/esVs2E
愛情點揀好：http://bit.do/eKouB
#短故 #短篇 #小說 #陳美濤 #廣東話 #粵語 #tomatochan #我阿爸係凶手
