我寫唔切自己本書，但係寫得切人哋個序
【新書發佈】
今年書展，我會出新書，本書名叫做《出圖制勝》。
顧名思義，新書都係同圖表有關，係我第二本既技術分析書。話說對上果本已經係五年前架喇，當其時我都仲未正式做股評人。我記得我係寫完稿先入職既，一入職就搵老闆寫序。
今次就唔同，我已經做左近五年股評人，中間經歷左市場上好多既風風雨雨，包括2015年「大時代2.0」啦，2017年牛市，同2018年打後既中美貿易戰。响呢五年入面，我每日同無數咁多既散戶、粉絲齊上齊落，知道左佢地既心理同炒法，通常犯既係咩錯，所以能夠對症下藥。因此响新書入面，我獨立開左一個幾千字既題，專門講述散戶既「炒股五戒」！我可以肯定好岩你地睇。
同上次一樣，我並唔係要寫一本投資101、字典，包羅萬有。老實咁講句：我寫既招式係越來越窄！上次有「致勝四招」，有一個自創既保歷加通道「蝴蝶」，今次都取消埋！我寫既指標簡單到你唔信，但我話俾你知：我所寫既，足夠可以讓你賺錢有突！裡面提到既全部都係近一兩年既「近代」例子，保證update、新鮮，個別有領過軍。睇完之後，我會更加明白所有出入既原因同理據。
仲有一樣好特別既野係：今次我會教埋大家炒細價股，講既全部都係名不經傳既非藍籌、非港股通。但我唔係俾冧把，而係教大家如何去物色「妖之中既正常人」，如何去避開「妖中之妖」，讓你可以响急升急跌既行情中，賺走最有把握同穩當果截，袋袋平安！
最後，我仲加插左少少花邊、趣味野俾大家！仲記唔記得我响今年一月既時候問過大家：「我最想知道有關股評人的五件事」？响呢本書入面，我專登用左幾千字黎寫左五個行業秘聞，講真，你就算唔科水買書都好，打書釘都要睇左佢，你唔會知道原來我地呢一行係咁！五年來既人生百態，我都可以話係一一記低。
最後要多謝為我本新書寫序既兩位朋友，排名不分先後：渾水同黃耀宗（Andy）。新書既簽名會已經訂响7月19日（星期日）既下晝三點鐘，天窗出版社攤位。到時我會再提大家既！
天窗出版社ENRICH CULTURE #出圖制勝 #簽名會
