深夜無人睇，靜靜雞講個故仔……
《我女朋友係一個恐怖演員》下集
我嘗試同我女朋友溝通下，希望佢可以放棄呢種自殘嘅方式去做戲，回復返以前嘅生活。
「回復返以前生活？你想我變返一個出街無人叫得出你個名嘅演員呀？」阿靜一諗起以前，即使而家幾痛苦都好，都唔想變返以前咁。
「你睇下你塊臉，睇下你啲手手腳腳……全部都係瘀傷，仲要係我造成咁，係我打到你咁。你覺得作為男朋友嘅我會忍心睇住你咁咩？」我望到阿靜全身充滿傷痕就覺得心痛不已。
阿靜望一望自己，似乎佢都感受到痛苦，眼淚不自覺咁流下眼淚，然後對住我搖頭哭訴：「我唔可以停，我更加停唔到，我控制唔到……我只係唔想返去以前嘅生活，你就比我咁樣落去喇……」說罷，阿靜緊緊咁擁抱我，希望得到我體諒。
我知道已經勸服唔到佢，一切都係嗰位導演所怪，我決定要搵佢出嚟算帳。
根據阿靜比我嘅地址，終於搵到佢間公司。
我發覺門外係無門鐘，於是我就直接開門先發覺無鎖到。
開門後，剎那間令我有種沉重感覺，感覺氣氛好詭異，因為眼前有個牌寫住片場，但無任何拍攝器材喺到，成個場都係無嘢，而且傳來一陣陣刺鼻嘅氣味。
我喺走廊一直行，見到有間房外面有塊玻璃鏡，從鏡外睇到入面有幾個怪物流露出詭貫容貌喺到寫緊嘢，我嚇到呆咗，係咪道具造型定係點？
當我想再行前仔細望時，房入面班怪物似乎注意到我，於是成班回頭望向我到，我本能反應即刻轉身扮睇唔到……之後門打開了，有個人走出嚟問：「你係邊個？咩事架？」
「我……」當我再望向鏡內時，發覺頭先成班怪物消失哂，而換嚟一班工作人員無奈咁望住我。
唔通我眼花睇錯？
「我想搵嗰位叫鬼導嘅導演。」
「哦……你跟我嚟。」說罷個工作人員就帶我走，我離開時雙眼仍然不自覺咁望住房內嘅人，總覺得一切都好奇奇怪怪。
工作人員將我帶到走廊盡頭，然後指住眼前一間房說：「導演喺入面。」
我知道今次嚟嘅目的係想搵佢算帳，叫佢放棄唔好再搵阿靜做演員，於是收拾心情扮到好惡咁開門入去。
未輪到佢開口講，我已經罵咗先：「我警告你，唔好再搵我女朋友阿靜拍電影，更加唔好教佢自殘做戲嘅方法！」
導演本身寫緊嘢，見我出現，於是抬頭問：「你係阿靜個男朋友呀？」
「係呀！咁又點呀！」
「無，我只係想講，一切都係你女朋友選擇，我無逼到佢。而你女朋友個願望就係想做一個當紅嘅演員，而事實上佢真係做到，所以我唔明你喺到嘈嚟做咩？」
「係！佢而家真係做到！但就係因為你！教埋咩自殘演技，攪到阿靜不斷傷害自己！」
導演點點頭，然後企起身問：「你知唔知演員最高境界就係透過體驗去做到我想做嘅角色，所以我教阿靜都係咁，只要佢經歷過角色嘅體驗，佢一定比任何人都得更真實。」
「拍戲咋！唔通下下都要做過過來人先明呀！」
導演一陣冷笑，然後指住我話：「你平時睇電影你都覺得係假，你一定覺得套電影無癮，但我如果我話你聽個故事係真，你一定好細心更投入落去，點解？因為人類鐘意睇真實嘅嘢。」
「你都痴線嘅，同你講多哂氣，總之你放棄我女朋友喇！呢度有筆錢比你，你就當解約費。接著，我就奪門而出，心諗今次諗住打鳩佢地，但現實卻毫不容許，呢種屈結一陣屈喺人入面。
後來返到屋企，見到地下成攤血，而梳化上瞓咗一個人，望真啲原來係阿靜嚟。
我嚇得走前一睇，驚見阿靜塊臉花哂，勁多刀痕，簡直喪心痛狂。
「你又攪咩呀？」我問。
「我收到劇本……做一個毀容嘅女仔，哈哈……所以我將自己塊臉鎅花佢，咁我呢個角色就可以做得更似更真。」阿靜一路講，臉上一直滲出大量血水。
我跪喺佢身旁，個心好痛，因為我知道佢塊臉鎅痕太深……好大機會真係毀容變唔返以前咁。
最後，佢今次所拍嘅電影又爆紅大賣。
而阿靜塊臉一直都恢復唔到。
某夜，我終於忍唔住實行我嘅計劃，我決定將間公司連埋個導演所有人都要燒死。
於是我去到公司門口，按返上次嚟，呢度無人看管可以自出自入，於是我行入公司，聽到遠處有班人喺到，大概導演都喺入面，於是將電油倒落地，再離開公司鎖上電鏈後，再點火。
一點火，隨即火光紅紅，火陷一下子將公司門口包圍。
我見到啲火愈燒愈旺，我心情就更加興奮，因為阿靜終於可以擺脫班人。
我帶住興奮心情返屋企，決定今晚同阿靜食返個二人世界套餐。
但當我返到屋企打開門時，原來阿靜唔喺屋企，而枱上有一份劇本。
我打開一睇，即時雙腳發軟坐下，再忍唔住崩潰咁喊出嚟，喊得死去活來……
而劇本寫住女主角阿靜在公司拍攝期間被男朋友縱火燒死。
《完》
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
記得like and share 留言呀～～
我孔明極力推薦大家真係買本《失蹤》完整版，得返極少量。
亦係最後一次再印，記得好好珍藏呀
本書有齊《失蹤》第一季第二季／《失蹤》二／《失蹤》外傳喺入面～大把內容喺哂入面。
未入手讀者就快啲買喇 =] 係我覺得最好睇最好睇嘅書～
我嘅賣書網店：https://homingming.boutir.com/
我嘅訂閱故事：https://www.patreon.com/Homing
